11/28/2021
Today from Hiiraan Online:  _
Wararka Maanta- Arbaco, Aug 1 , 2012
Madaxweynaha Soomaaliya iyo Wafdi uu hoggaaminayo oo tagay Degmada Balcad ee Gobolka Shabeellada dhexe

Arbaco, Ogoosto 01, 2012 (HOL) — Madaxweynaha DKMG ah ee Soomaaliya, Shariif Sheekh Axmed iyo wafdi uu hoggaaminayo ayaa maanta tagay degmada Balcad ee gobolka Shabeellada dhexe oo 30-km dhinaca waqooyi kaga beegan Muqdisho.

Booqashada madaxweynaha ayaa waxay salka ku haysaa sidii uu ugu kuurgeli lahaa xaaladda ammaan ee degmadaas, halkaasoo ay ciidamada dowladda iyo AMISOM ay kala wareegeen Al-shabaab bishii Juun ee sannadkan.

Shariif Sheekh oo ay booqashadiisa ku wehliyeen wasiirro, xildhibaanno iyo saraakiil ciidan ayaa wuxuu la kulmay waxgaradka degmada, isagoo ka dalbaday inay gacan ku siiyaan ciidamada dowladda sidii ay ammaanka u adkeyn lahaayeen.

"Waxaan uga mahadcelinaynaa shacabka Balcad gacanta ay ka geysteen sidii looga saari lahaa halkan (Balcad) Al-shabaab, waxaana idinka dalbanaynaa inaad sugidda ammaanka gacan ka geysataan," ayuu yiri Sheekh Shariif.

Sidoo kale, waxgaradkii uu kulanka la qaatay goobta ka hadlay ayaa iyaguna soo dhaweeyay in degmada Balcad ay ka mid noqoto degmooyinka ay dowladda KMG ah ka taliso, waxayna sheegeen inay gacan ka geysan doonaan xaqiijinta ammaanka.

Ugu dambeyn, madaxweynaha Soomaaliya ayaa sheegay in dowladda KMG ah ay qorsheynayso inay dib u howlgeliso warshadda dharka ee Balcad, wuxuuna mahad u celiyay dadkii gacanta ka geystay in la badbaadiyo.

Booqashada uu madaxweynuhu ku tagay degmada Balcad ayaa waxay noqnaysaa tii labaad oo uu degmadaas ku tago tan iyo markii ay ciidamada DKMG ah AMISOM kala wareegeen Al-shabaab. Waxayna booqashadan ay kusoo beegmaysaa iyadoo la xusuusto in madaxweynuhu uu laba maalmood ka hor booqday degmada Afgooye.

Maxamed Xaaji Xuseen, Hiiraan Online
[email protected]
Muqdisho, Soomaaliya













Click here
8/1/2012 6:33 PM EST
Khamiis, August 02, 2012(HOL): Magaalada Gaalkacyo ee Gobolka Mudug ayaa waxaa maanta ka dhacday doorashada madaxweynenimada maamulka Galmudug, taasi oo ay u tartameen labo musharrax oo xilkaas isu soo taagay.

8/1/2012 9:48 AM EST
Arbaco, Ogoosto 01, 2012 (HOL) — Wakiilka xoghayaha guud Qaramada Midoobay ee arrimaha Soomaaliya, danjire Augustine Mahiga ayaa sheegay inay jiraan xubno doonaya in lasoo magacaabo xildhibaanno ay iyagu wataan, isagoo sheegay inaan la aqbali karin arrinaas.

8/1/2012 9:27 AM EST
Arbaco, August 01, 2012 (HOL) - Safaarada Soomaalida ayaa bilowday deeq raashin ah oo la gaarsiinayo dadka saboolka ah ee ku nool xaafada Islii ee Soomaalidu ay ku badantahay.

8/1/2012 7:11 AM EST
Arbaco, Ogoosto 01, 2012 (HOL) — Munaasabad siweyn loo soo qaban qaabiyay kana dhacday saldhiga baliiska magaalada Baladweyne ee xarunta gobollka Hiiraan ayaa waxaa ka qeyb-galay guddoomiyaha gobollka Hiiraan, saraakiisha dowladda Itoobiya, iyo taliska ciidamada Jabuuti ee AMISOM.

8/1/2012 7:05 AM EST
Arbaco, Ogoosto 01, 2012 (HOL) — Dhamaan deegaanada Puntland waxaa maanta si weyn looga xusay, 1-da August oo ku beegan sanad guuradii 14-aad ee kasoo wareegtey xiligii dhidibada loo taagay maamul goboleedka Soomaaliyeed ee Puntland sanadkii 1998.

8/1/2012 5:09 AM EST
Arbaco, Ogoosto 01, 2012 (HOL) — Ergada ansixinta dastuurka qabyadaha ee Soomaaliya ayaa ku ansixiyay dastuurka cod aqlabiyad ah iyadoo ay jireen xubno ka diiday ansixinta iyo kuwo ka aamusay.

8/1/2012 4:32 AM EST
Arbaco, Ogoosto 01, 2012 (HOL) — Diyaarado nooca dagaalka oo aan illaa imika la garaneyn cida iska leh ayaa shalay ilaa maanta si weyn ugu dulwareegaya magaalada Kismaayo, iyadoona diyaaradahani ay qalqal ku abuureen shacabaka ku dhaqan magaalada Kismaayo ee xarunta gobolka jubbada hoose.

8/1/2012 4:04 AM EST
Arbaco, Ogoosto 01, 2012 (HOL) — Ugu yaraan 10-qof oo dhinacyadii dagaalamay ka tirsan ayaa ku dhintay dagaal culus oo ciidamada dowladda KMG ah, kuwa Kenya iyo xoogagga Al-shabaab ku dhexmarya deegaanka Faafax-dhuun ee gobolka Gedo.

8/1/2012 3:17 AM EST
Arbaco, Ogoosto 01, 2012 (HOL) — Halkan hoose ka daawo(Live)shirka golaha ansixinta DASTUURKA qabyada ah ee Soomaaliya, iyadoo codeynta oo gacan taag ah ay ka billaabatay xarunta uu shirku ka socdo.

8/1/2012 3:01 AM EST
Arbaco, Ogoosto 01, 2012 (HOL) — Weerarro ismiidaamin ah ayaa lagu qaaday maanta xarunta uu shirka uga socday ergooyinka ansixinta dastuurka, waxaana mas'uuliyiin ka tirsan dowladda ay sheegeen inay ku dhinteen qaraxyadaas labadii qof ee xambaarsanaa, sidoo kalena aysan jirin cid kale oo ay dhimasho kasoo gaaray.