Xarakada Al-shababa oo fariin digniin u dirtay shacabka dalka Burundi
Isniin, Oktoobar 24, 2011 (HOL) — Warsaaxafadeed ay Xarakada Al-shabaab soo saartay maanta oo Isniin ah ayaa waxay digniin ugu dirtay shacabka dalka Burundi oo ay kumannaan ciidammo ah ka joogaan Soomaaliya.
"Tan iyo markii ay Xarakada Al-shabaab badashay qorshaha dagaal ee Muqdisho bishii Ogoosto ee sannadkan, dagaalku wuxuu galay waji cusub. Natiijada dagaalka ayaa waxay noqontay in ciidamada AMISOM ay kasoo baxaan saldhigyadii ay ku jireen ayna dibadda yimaadaan, waxaana baxay inaysan awood u lahayn inay ku dagaalamaan dhulka cidlada ah," ayaa lagu billaabay warsaxaafadeedka Al-shabaab kasoo baxay.
Sidoo kale, warsaxaafadeedka ayaa lagu sheegay in ciidamada Burundi ee ku sugan Muqdisho loogu geystay xasuuq dagaalkii ka dhacay degmada Dayniile 20-kii bishan, iyadoo Al-shabaab ay sheegtay inay ku dishay 150-askari, iyagoo sheegay in tani ay daboolka ka qaadday muhiimadda dagaallada Muqdisho.
"Warbaahinta gudaha iyo kuwa caalamiga ah waxay filimo iyo sawirro ka qaateen maydadka 76-askari oo ay Al-shabaab soo bandhigtay, kuwaasoo xirnaa dharka lagu yaqaan ciidamada Burundi, balse AMISOM waxay diiday dhimashada askartaas iyagoo doonaya inay si khalad ah wax u tusaan qoysaska askarta dhintay," ayay Al-shabaab ku sheegtay warsaxaafadeedka.
Xarakada Al-shabaab ayaa qoraalkeeda ku sheegtay in xasuuqii ka dhacay Muqdisho uu cadeyn u yahay in Muqdisho aan laga doonayn ciidamo shisheeye, balse fariintooda ay tahay mid si gaar ah ugu wajahan shacabka dalka Burundi.
"Caruurtiinna waxay dhibaatooyin fool xun u geysanayaan shacabkeenna aan waxba galabsan ee Soomaaliyeed. Waxaana mar walba idiin soo dirnaa inaan ciidamadiinna la baxdaan, waxaa muuqata inaad ku faraxsan tihiin inay caruurtiinu ku dilaan kumannaan shacab Soomaaliyeed oo isugu jira rag duqeymo, ayna ka barakaciyaan guryahooda iyo xaafadahooda," ayay Al-shabaab ku sheegtay warsaxaafadeedkeeda.
Qoraalka kasoo baxay Al-shabaab waxaa lagu sheegay kala bar caruurta Soomaaliyeed aysan aadin iskuullo, iyagoo sheegay in ciidamada Burundi ay wadaan qorshayaaha ay ku burburinayaan dhismayaasha iyo dhammaan kaabayaasha dhaqaalaha. Dagaallada socdana waxay sababayaan in kumannaan caruurtiinna ah lagu dilo Muqdisho iyagoo u dagaalamaya qaab calooshood-u-shaqeytenimo ah iyadoo qaar kalaena la qabto.
"Askartiina ku dhimatay Muqdisho waxaa lagu jiiday wadooyinka, waxayna daadsan yihiin wadooyinka iyadoo aan loo sameyn wax aas ah. waxayna shacabka Muqdisho ku daawadaan wadooyinka askartiinna aad jeceshihiin," ayaa warsaxaafadeedka mar kale lagu sheegay.
Ugu dambeyn, waxaa shacabka Burundi la kala dooransiiyay inay ciidamadooda sida ugu dhaqsiyaha badan ugala baxaan Soomaaliya, haddii kalena dib loogu celin doono maydadka askartooda. Iyadoo lagu soo gabgabeeyay warsaxaafadeedka, Aad uga fikira mustaqbalka caruurtiinna.
Maxamed Xaaji Xuseen, Hiiraan Online
[email protected]
Muqdisho, Soomaaliya
