RA’IISAL WASAARAHA SOOMAALIYA: “80% dadka Muqdisho waxay ku nool yihiin degmooyinka ay dowladda gacanta ku heyso, dhawaanna waxaan qaadi doonnaa tallaabooyin isbedel muuqda keeni doona”
Ra'iisal Wasaaraha Soomaaliya-Maxamed Cabdullaahi Maxamed (Farmaajo)
Jimco, January 14, 2011(HOL): Ra’iisal Wasaaraha Soomaaliya Maxamed C/llaahi Maxamed oo maanta shir jaraa’id ku qabtay magaalada New York oo uu ku sugnaa ayaa wuxuu sheegay in dowladdiisa ay wax weyn ka qaban doonto xaaladda Dalka, gaar ahaan Ammaanka iyo dib u heshiisiinta, wuxuuna carrabka ku dhejiyay in ay dowladdiisa dooneyso in ay ciribtirto Al-Shabaab oo sida uu yiri xiriir la leh argagixiso dibadda ah.
Wuxuu codsi xooggan u jeejiyay caalamka oo uu ka codsaday in ay gargaar deg deg ah la gaaraan dad gaaraya 2.5 Milyan oo ku macluulsan gudaha Soomaaliya. Kaddib wuxuu sheegay in Xukuumaddiisa oo ka kooban 18 Wasiir oo aqoon iyo tayo leh ay ka shaqeyneyso dib u heshiisiinta, ayna ku shaqeyneyso maamul-wanaag. Wuxuu intaas ku daray in Xukuumaddiisa ay dooneyso ina y dalka ka xoreyso xoogagga ka soo horjeeda oo taageerada caalamka la’aanteed aysan wax weyn ka qaban Karin.
Wuxuu ka hadlay heshiis ay Xukuumaddii hore la gashay shirkad Saracen International oo ammaanka qaabilsan, wuxuuna caddeeyay in ay arrintaas dhawaan caddeyn doonaan, wuxuuna ku gaabsaday in uu xafiiska joogo ilaa hadda 50 maalmood.
Ra'iisal Wasaare Farmaajo iyo Xoghayaha guud ee Q/Midoobay- Ban Ki-Moon
Waxaa la weydiiyay sida ay ugu sahlanaaneyso ina y la dagaallamaan Xoogagga ka soo horjeeda, wuxuuna sheegay in ay dib u qaabeeyeen, isla markaana mushaarooyin siiyeen muddo sanado ah, niyaddoodana ay hadda wanaagsan tahay, diyaarna ay u yihiin ay wajahaan sida uu u yiri cadawgooda.
“80% dadka Muqdisho waxay ku nool yihiin degmooyinka ay dowladda gacanta ku heyso, dhawaanna waxaan qaadi doonnaa tallaabooyin isbedel muuqda keeni doona oo dhinaca ammaanka ah”ayuu yiri Ra’iisal Wasaaraha Soomaaliya Maxamed C/llaahi Maxamed oo tilmaamayay inta ay Xukuumaddiisa ka xukunto Magaalada Muqdisho.
Abaaraha Soomaaliya ayaa wax laga weydiiyay, wuxuuna sheegay in ay dhibaato xooggan oo abaareed ka jirto Soomaaliya, wuxuuna codsi u jeediyay caalamka oo uu ka dalbaday in uu gargaar deg deg ah la soo gaaro dadka abaaraha la dhibaateysan.
“Ilaa iyo hadda waxaa na soo gaaray hal Markab oo uu noogu deeqay dalka UAE oo aan uga mahadcelineyno kaalmadaas, waxaana caalamka ka rajeyneynaa in ay gargaar midkaas la mid ah na soo gaarsiiyaan”ayuu yiri Ra’iisal wasaaraha Soomaaliya Maxamed C/llaahi Maxamed.
1.jpg)
Ra'iisal Wasaare Farmaajo iyo Danjiraha Mareykanka u fadhida UN-ka Ms. Susan Rice
Waxaa wax laga weydiiyay dhalinyaro Al-Shabaab ka soo goosatay oo dowladda isu soo dhiibay iyo sida ay arrintaas ku suurtagashay, wuxuuna yiri “Arrimahaas waa qeyb ka mid ah howsha aan ku jirno, kaliya ma ahan in dagaal wax lagu wado, waxaan raadineynaa maslaxad iyo sidii soomaaliya aan nabad ugu soo dabaali lahayn, taasi waxay noo soo suurtagelisay in Al-Shabaab ay dhalinyaro badan ka soo goostaan, dhawaanna waxaan rajeyneynaa in ay Dhalinyaro kale ka soo goostaan waayo Al-Shabaab waa Argagixiso oo dhalinyarada xoog ku qafaasha, annagana waxaan dhahnay waxaan idin siineynaa waxbarasho ee ka soo taga, taasina wey dhacday”.
Waxaa la weydiiyay labo su’aalood oo muhiim ahaa kuwaasi oo kala ahaa cidda UN-ka u joogta Soomaaliya maadaama ay jireen saraakiil Soomaaliyeed oo isku qabsaday metelaadda Soomaaliya ee UN-ka iyo su’aasha kale oo ahayd in waqtiga dowladdan uu ku egyahay August 11 2011, sidaas darteed waxa ay sameynayaan, labadaas su’aalood wuxuu kaga jawaabay Ra’iisal Wasaaraha.
“UN-ka waxaa noo jooga Danjire , maantana halkan ayuu ila joogay, arrintaas oo mid khaas ah, waxaan u xalin doonnaa si khaas ah. Arrinta ku saabsan waqtiga dowladda ee sii dhamaanaya, waxaan ka fekereynaa wixii aan yeeli lahayn August 11 2011 kaddib, bilaha soo socda ayaan ogaan doonnaa, isla markaana caddeyn doonnaa dariiqyada noo furan ”ayuu yiri Ra’iisal Wasaaraha Soomaaliya Maxamed C/llaahi Maxamed.
Ra'iisal Wasaare Farmaajo, Danjiraha Somalia ee UN-ka Dr. Cilmi Axmed Ducaale & Inj. Yariisow
Su’aasha ugu dambeysa ee la weydiiyay Ra’iisal Wasaaraha Soomaaliya ayaa waxaa ahayd in markii xilka loo magacaabay uu sheegay in 100-ka maalmood ee ugu soo horreeya ay wax badan qaban doonaan, in uu weli rajadaas qabo iyo in uu rajadaas dhigay, Alle rajada nagama qaado, waxa lagu nool yahay waa rajo, boqolkii maalmood maanta waxaa laga joogaa 49, waxyaabo badan waan qabannay, waxyaabo bandanna waa noo harsan yihiin, waxyaabaha aan qabannay waxaa ka mid ah in aan dadka Soomaaliyeed u sheegnay in ay dowladdan dowladdoodii tahay oo aan isku xirnay dadka dibadda jooga iyo kuwa gudaha jooga, waxaan qabannay in aan Ciidankeeda mushaar siinnay muddo dheer kaddib,haddana ay diyaar u yihiin in ay cadawgooda wajahaan, waxaan dib u heshiisiin dhex dhignay beelo walaalo ah oo ku dagaallamay gobollada dhexe, kuwaasi oo wada hadal kaddib heshiis gaaray.
Salaad Iidow Xasan (Xiis), Hiiraan Online
[email protected]
