Maamulka Xarrakada Mujaahidiinta Al-shabaab ee Beledweyne oo Sako u qeybiyay dad masaakiin ah (SAWIRRO)
Sabti, 27, November, 2010 (HOL) Iyada oo dhamaan marka la eego goballada iyo deegaannada ay gacanta ku hayaan maamulka Xarrakada Mujaahidiinta Al-shabaab ee Bartamaha iyo Koofurta dalka Soomaaliya goor hore laga bilaabay ururita Sakada oo dib loo siinayo dadka tabaaleysan ee u baahan ayaa waxaa xarunta maamulka goballka Hiiraan markii ugu horeysay dad danyar ah loogu qeybiyay sako laga soo ururiyay ganacsatada magaalada.
Madaxa Sakada maamulka Xarrakada Mujaahidiinta Al-shabaab ee magaalada Beledweyne Shiikh Bashiir Xassan Cabdulle ayaa HOL u sheegay in talaabadani tahay mid maamulku ku doonayo in lagu caawiyo dad tabaaleysan, waxaana uu intaa ku darray in iyada loo la gudanayo waajib Diini ah maamulku gartay in dib loogu caliyo sakada laga qaaday dadka wax heysta kuwa danyarta ee aan waxba hali karin.
''Waan ku faraxsanahay Sakada uu maamulku na soo gaarsiiyay waana uga mahad celineynaa maamulka Xarrakada Al-shabaab gacanta uu noo fidiyay,'' ayeey tiri mid ka mid ah haweenkii halkaa lagu gudoonsiiyay Sakada.
Waa markii ugu horeysay oo uu maamulka Xarrakada Mujaahidiinta Al-shabaab ee goballka Hiiraan Sako u qeybiyo dad danyar ah, maadaama ay u aheyd maamulka markii ugu horeysay oo uu ka bilaabo goballka talaabada sakada looga qaadayo dadka wax heysta gaar ahaan ganacsatada.
C/raxmaan Diini, Hiiraan Online
diini@hiiraan.comBeledweyne, Soomaaliya
