HALYEEY CABDI BILE CABDI: Orod-yankii Somaaliyeed oo soo gaaray Garowe
Cabdi Bile Cabdi oo la socda Mas'uuliyiin Isboorti
Talaado, 28 December, 2010 (HOL) − Orod-yanka Soomaaliyeed ee caanka ah Cabdi Bile Cabdi ayaa lagu arkay fagaaraha Sports-ka mudo ka dib ,waxaana uu ka soo qayb galay ciyaartii ay galabta kuwada yeesheen garoonka Mire Awaare ee Garowe gobollada Banaadir iyo Nugaal.
Waxaa Cabdi Bille markii uu garoonka soo galay uu gacan qaaday qaar kamid ah masuuliyiinta dowlada ee garoonka ku sugnaa ,isagoo ay ka muuqatay farxad aad u badan oo ku aadan ka soo qaybgalka ciyaaraha gobollada.
"Aad ayaan ugu faraxsanahay in aan imaado dhulkayga Hooyo ,anigoo waliba daawanaya ciyaaro noocaan oo kale ah oo ay mudo iigu danabaysay "ayuu yiri Cabdi Bille mar uu la kulmayay madax ka tirsan Puntland.
Cabdi Bile Cabdi ayaa wax lagu farxo ku tilmaamay ciyaaraha gobollada ee ka soconaya magaalada Garowe,isagoo xusay in uu jeclaan lahaa Soomaaliya oo nabad ah idilkeed.
"Waxaan maamulka Puntland ugu mahadcelinayaa sida quruxda badan ee howshan ay isugu diyaariyeen,mana qiyaaso karo dareenkayga la xiriira ciyaarahan gobolladu ay ku tartamayaan " ayuu hadalkiisa ku daray.
Cabdi Bile Cabdi waxaa uu noqday qofkii ugu horeeyay oo Soomalia ah oo ku guuleesta tartanka Oradka caalamiga ah oo la ordo 1500 meter, tartankaasi oo lagu qabtay magaalada Roma ee dalka Talyaaniga sanadkii 1987-dii.
Ugu danbayntii orod-yankan Soomaaliyeed ayaa la filayaa in uu si dhamaystiran warbaahinta uga waramo qorshaha uu ku yimid magaalada Garowe ,waxaana ay wada kulmi doonaan madaxwaynaha Puntland C/rixmaan Maxamed Faroole sida la sheegay.
Faisel Maxamed Hassan, Hiiraan Online
[email protected]
Bosaaso,Soomaaliya
