6/23/2017
Today from Hiiraan Online:  _
Wararka Maanta- Sabti, May 2 , 2009
PROF. DALXA: “Haddii aan qaldanahay na saxa, laakin ha nagu sixina Madfac iyo Bastoolad”


Guddoomiye ku xigeenka koowaad ee Baarlamaanka- Prof. Maxamed Cumar Dalxa
Sabti, May 02, 2009(HOL): Guddoomiye ku xigeenka labaad ee Baarlamaanka Soomaaliya Prof. Maxamed Cumar Dalxa ayaa isagoo ka hadlayay xaflad lagu maamuusayay maalinta shaqaalaha Adduunka oo shalay lagu qabtay Magaalada Muqdisho wuxuu ka hadlay dhibaatooyinka dhexyaalla dowladda Soomaaliya iyo xoogagga hubeysan ee ka soo horjeeda.

Prof. Dalxa waxaa uu sheegay in shacbka Soomaaliyeed ay muddo sanado ah ku soo jireen dhibaatooyin aan horay uga dhex dhicin dadka Soomaaliyeed, wuxuuna sheegay in dhibaatooyinkaas ay ka mid yihiin in la dilay dad masjid ka soo baxay, kuwaasi oo qaarkood ay ahaayeen Xildhibaanno ka tirsan Dowladda Soomaaliya.

“Xildhibaan Cabdalla Deerow ayaa la dilay isagoo ka soo baxay Masjid uu Salaadda Jimcaha ku soo tukaday, waxaa la dilay Xildhibaan Maxamed Cusmaan Maye oo ka soo baxay Masjid uu ku soo tukaday Salaadda Taraawiixda, Xildhibaan Timir ayaa sidoo kale la dilay, Bambo la rabay in lagu dilo Xildhibaan Maxamed Xuseen Raage ayaa waxaa ku dhintay wiilkiisii curadka ahaa, Aniga iyo Xildhibaan Cusmaan Caato waxaan ka badbaaday Weerar bambaano ah oo lagu soo qaaday guri aan deganeyn”ayuu yiri Guddoomiye ku xigeenka labaad ee Baarlamaanka Soomaaliya Prof. Maxamed Cumar Dalxa.

“Waan qaldami karnaa Bani’aadam ayaan nahay, haddii aan qaldannahay na saxa, laakin ha nagu sixina Madfac iyo Bastoolad”ayuu yiri Prof. Dalxa oo intaas ku sii daray in haatan ay Xildhibaannada ka baqayaan in ay Salaadda Masjidyada ku soo tukadaan, iyagoo ka baqaya in la dilo.

Waxaa uu ka sii hadlay Prof. Dalxa kala cararka ku dhacay Dadka Soomaaliyeed iyo sida ay Qaaradaha Adduunka ugu kala firireen, “Soomaaliya waxaa la dhihi jiray waa isku af iyo isku dhaqan, haddii sida aan nahay aan ku sii soconno waxaa dhici doonta in ay dalka yimaadaan dad Soomaaliyeed oo kala afaf ah, waayo Soomaalida dibadaha u baxay caruurta ay dhaleen waxay ku hadlayaan afafka looga hadlo dalalka ay joogaan, waxaana iska cad in ay imaan doonaan wiilal iyo gabdho dhahaya akhuunaa…akhuunaa”ayuu mar kale yiri Prof. Maxamed Cumar Dalxa oo intii uu hadlayay ay aad u qoslayeen dadkii khudbaddiisa dhegeysanayay.

Ugu dambeyntiina, Guddoomiye ku xigeenka koowaad ee Baarlamaanka Soomaaliya Prof. Maxamed Cumar Dalxa waxaa uu ugu baaqay shacabka Soomaaliyeed in ay aayahooda ka tashadaan, isla markaana ay iska saaraan xumaanta ay laabta isugu hayaan, isagoo caddeeyay in aaney dadka Soomaaliyeed marna kala maarmi karin.

Salaad Iidow Xasan (Xiis), Hiiraan Online
[email protected]
Muqdisho, Soomaaliya





Post your comments

5/2/2009 10:49 AM EST
Sabti, May 02, 2009(HOL): Madaxweynaha Soomaaliya Shiikh Shariif Shiikh Axmed oo maanta shir jaraa’id ku qabtay magaalada Muqdisho ayaa wuxuu shirkiisa jaraa’id ku soo qaatay arrimo ay ka mid ahaayeen, madaafiic dhawaan lagu duqeeyay xaafado ka tirsan Muqdisho, kuwaasi oo ay dad badan ku dhinteen, aragtidiisa ku aadan dib ugu soo noqoshada Shiikh Xasan Daahir ee Dalka Soomaaliya, socdaal uu dalka dibaddiisa ku tegay, go’aankii Baarlamaanka ee ahaa in dalka lagu xukumo shareecada Islaamka iyo warar sheegayay in ay Dowladda Soomaaliya dhul ka iibsatay Dowladda Kenya.

5/2/2009 10:47 AM EST
Sabti, May 02, 2009(HOL): Kooxo Burcad Badeed Soomaali ah ayaa waxay maanta markab ka qafaasheen Badweynta Hindiya, iyadoo markabkaas oo kuwa shixnadaha qaado ahna laga leeyahay Dalka Greece.

5/2/2009 10:46 AM EST
Sabti, May 02, 2009(HOL): Waddadaan Laamiga ah ee Dhismaheedu ka socday Magaalada Kismaayo ayaa qeyb ka mid ah la furay, halka inta hartayna uu wali dhismaheedu sii soconayo. Wadadan ayaa maanta la arkayay iyadoo Gaadiidka noocyadiisa kala duwan ay adeegsanayaan sida kuwa dadweynaha, kuwa xamuuka qaado iyo kuwa raaxada.

5/2/2009 6:15 AM EST
Sabti, May 02, 2009(HOL): Sarkaal sare oo ka tirsan Qaramada Midoobay ayaa sheegay in loo baahan yahay in maxkamad la soo taago dadkii dembiyada dagaal ka geystay Dalka Soomaaliya.

5/2/2009 6:14 AM EST
Sabti, May 02, 2009(HOL): Ciidamada Badda NATO ee ku sugan Xeebaha Soomaaliya, gaar ahaan kuwa Dalka Portugal ayaa waxay qabteen Kooxo Burcad Badeed Soomaali ah, kuwaasi oo doonayay in ay qabsadaan Markab laga leeyahay Dalka Norway.