Aqoon isweydaarsi ku wajahan Soomaalida Qurbaha ku nool oo lagu qabtay Magaaladda Stockholm ee Dalka Sweden
Isniin, February 19, 2007(HOL): Waxaa maalintii Sabdiga ahayd lagu qabtay magaalada Stockholm ee dalka Sweden, aqoon isweydaarsi ay soo qaban qaabisay Xarunta Cilmi Baarista iyo Wadatashiga Somaaliyeed (CRD-Somalia), kana qayb-qaateen Hay’adda CARE Somalia/South Sudan iyo qaar ka mid Jaaliyadda Soomaaliyeed ee ku dhaqan Dalka Sweden.
Barnaamijkan oo looga doodayay qaabka dadka qurbaha ku nool ay uga qayb-qaadan lahaayeeen hurumarinta iyo ka qayb-qaadasha howlaha nabadeed ee dlaka ka jira, ayaa waxaa warbixin dheer ka soo jeediyay Jabriil Ibrahim Abdulle, Madaxa Xarunta Cilmi-Baarista iyo Wadatashiga (CRD-Somalia) Jabriil waxaa si dheer uga hadlay, daruufaha Soomaalida dibadda ku haysata, Dhibtaada Dalka gudihiisa ka jirta iyo fursadaha ka jira dalka gudihisa una furan dadka Soomaaliyeed ee qurbaha ku nool. Jabril waxaa uu ku nuux-nuux-saday sida ay lama huraan u tahay in “Somalia Diaspora” ay noqdaan kuwo isku duuban. Dowlada Sweden waxaa ay ka mid tahay Dowladaha sida fir-fircoon ugu dhex jira arimaha Soomaaliya waana lama huraan in ay heleen Jaaliyad la shqeeysa isla markaana talo midaysan ka siisa da’ddalada ay doonayaa in ay ku caawiyaan shacabka Soomaaliyeed.
Sidoo kale waxaa kulankaasi ka hadlay, Dr Yacquub oo ah nin aqoonyahan ah mudo dheerna ku noolaa dalka Sweden, Dr Yacquub waxaa uu soo bandhigay warbixin dheer oo ku saleesan cilmi-baaris uu ku sameeyay dhibka haysta umadda Somaliyeed ee qurbaha ku nool, gaar ahaan kuwa ku nool dalka Sweden. Warbixintu waxaa ay si toos u taabanaysay arimaha u baahan in culays la saaro kuwaasoo sahli kara in umadda Somaaliyeed ay ka qab-qaataan hurumarinta dadka Sweden ayagana ay uga faa’iidaysn lahaa fursadaha ka jira oo ay u fidisay dowlada Sweden.
Kulan waxaa kaloo ka hadlay, Mohmed Bashir, oo ah Sarkaal ka tirsan Hay’adda CARE Somalia/ South Sudan, oo ka hadlay muhiimada ay umadda Somaliyeed u leedahahay in Somali Diaspora ay midoobaan. Mohmed Bashir waxaa uu sheegay in ay adagtay in Soomaaliya dib u soo noqoto hadii aan la helin Somali Diaspora oo isku duuban. Aqoonyahanadii iyo wax garadkii ka soo qayb galay waxaa ay ka doodeen qodobo dhowr ah oo ay ka mid ayaaheed,
Sidii la isugu xiri lahaa Soomaalida ku kala qob-qoban wadanka dibadiisa
Sidii kor loogu qaadi lahaa magaca Soomaaliya , gaar ahaan dalalka dadka somaliyeed ku nool yihiin Sidii loo abuuri lahaa dad u dooda kana tala bixiya danaha Soomaalida
Qaabkii iyo sifii loo caawin lahaa dowlada Sweden oo iyada mas’uuliyad dheeraad ah iska saartay sidii ay u kaalmeyn lahayd shacabka Somaliyeed.
Abuuritaan isku xir ururadda Bulshada Rayidka ah ee dalka ka jira iyo Somali Diaspora.
Afkaartii halkaa lagu soo gudbiyay waxaa ururin-doono Xarunta Cilmi Baarista iyo Watashaiga Somaliyeed (CRD-Somalia) oo dibna ugu soo celin doonta dadka ka soo qayb-galay, sidoo warbixinta waxaa lala wadaagi doonaa dadka Soomaaliyeed ee ku dhaqan qurbaha. Talooyinka kulankaan ka oo baxay iyo kuwo kale oo laga soo ururin doono Soomaalida ku nool dalal badan oo qurbaha ah, waxaa ay ka mid noqondoono talooyin wax loogu qabanayo Soomaalida qurbaha ku nool iyo Shacabka Soomaaliyeed oo u omaan kaalmada Soomaalida dibada dalkiisa ku nool.
Salaad Iidow Xasan (Xiis), Hiiraan Online
[email protected]
Mogadishu, Somalia
