Isniin, September 04, 2006(HOL): Waxaa maalintii seddexaad ku kulansan magaalada Khartoum ee dalka Suudaan labo wafdi oo kala metelaya dowladda Federaalka iyo Maxkamadaha Ismaalka oo isku haya aayo ka talinta dalka Soomaaliya.
Prof. Ibraahim Xasan Caddow oo ah Hoggaamiyaha Wafdiga Maxkamadaha iyo Cawad Axmed Xasharo oo ka mid ah Wafdiga Dowladda Federaalka ayaa labaduna waxay sheegeen in ay rajo wanaagsan ka qabaan in miro lagu farxo ay ka soo baxaan shirka ay Khartoum u fadhiyaan, inkastoo ay ka gaabsadeen waxyaabaha ay rasmi ahaan ka wada hadlayaan.
Labadii maalmood ee aynu ka soo gudubnay ayaa waxaa shirka hareeyay is-mari waa ka dhashay ajendayaasha shirka oo ay ku jireen qodobo ku saabsan arrimaha amniga iyo Siyaasadda. Maxkamadaha waxay qabaan in arrinta amniga la soo hormariyo, si dhaqsi la isugu af-garto in ciidamada Itoobiyaanka ah dalka laga saaro, in aan ciidamo kale oo IGAD ka socda la keenin iyo in aan la soo hubeynin Hoggaamiye kooxeedyadii ay Maxkamadaha Muqdisho ka ceyriyeen, halka Dowladda Federaalkana ay qabto in arrimaha siyaasadda marka hore laga hadlo, iyadoo haddii ay taasi dhacdo oo la heshiiyana la isla meel dhigi karo qodobada kale ee ku saabsan amniga, dhaqaalaha iyo dib u dhiska dalka.