Wararka Maanta: June 17, 2006

Wararka Maanta- Sabti- June 17, 2006


·	Ma dhab baa in Muuse Suudi iyo Bashiir Raage ay Doon ka raaceen Xeebta Liido, Xamarna ay isaga baxeen?
·	Dibadbax lagu taageerayay Maxkamad Islaami ah oo looga dhawaaqay Gobolka Hiiraan oo ka dhacay Magaalada Beledweyne
·	Magaalada Jowhar oo laga hirgeliyay Ciidamo Deegaan oo suga ammaanka kadib markii ay dilaaceen Kooxo Burcad ah



		Ma dhab baa in Muuse Suudi iyo Bashiir Raage ay Doon ka raaceen Xeebta Liido, Xamarna ay isaga baxeen? Sabti, June 17, 2006(HOL): Shalay gelinkii dambe iyo Xalay ayuu warkaasi si xooggan u soo shaac baxayay kadib markii Muuse Suudi iyo Bashiir Raage oo ka tirsanaa Isbaheysigii La dagaalanka Argagixisada ee laga itaal roonaaday laga waayay fariisimahoodii Degmooyinka C/Casiis iyo Kaaraan. Halka ay qabteen Hoggaamiyayaashaas ayay warar kala duwan ka soo baxayaan, wararka qaarkood waxay sheegayaan in Doon ka qaaday Xeebta Liido ay u qaaday dhinaca Deegaano ay ka soo jeedaan oo Gobolka Shabeelaha Dhexe ka tirsan, halka warar kalena ay sheegayaan in Doontaas ay u qaaday Markab Badda dhex yaala oo ay leeyihiin Ciidamada Mareykanka, kaasi oo Diyaarado saaran ay u sii qaadeen dhinaca dalalka desriska oo aan rasmi ahaan la shaacin. Warar ku dhow dhow fariisinka Muuse Suudi ayaa sheegaya in halkaasi ay haatan ka socoto qaban qaabo ay wadaan Odayaal iyo Culumaa'udiin ka soo jeeda Beesha Daa'uud, iyadoo la doonayo in halkaas laga sameeyo Maxkamad Islaami ah oo hoos tagta Beeshaas. Qabanqaabada sameynta Maxkamaddaas waxaa wada Siyaasiyiin ay ka mid yihiin Muxyaddiin Xasan Afrax oo Xildhibaan ka soo noqday Dowladdii C/qaasim Salaad Xasan iyo C/llaahi Shiikh Xasan oo ka tirsan Siyaasiyiinta Beesha Daa'uud. Muxyaddiin Xasan Afrax ayaa sheegay in Maxkamadda laga sameynayo fariisinkii Muuse Suudi ay tahay mid ay sameysanayaan Beesha Daa'uud, wuxuuna caddeeyay in ay Maxkamaddaas dadka ku dhaqi doonto Shareecada Islaamka, isagoo hoosta ka xariiqay in aysan saameyn ku yeelan doonin Maxkamadda ay sameynayaan mid ay soo wadeen Siyaasiyiin iyo Waxgarad ka soo jeeda Beesha Mudullood, kuwaasi oo maalmihii tegay Shirar ku lahaa Mowlaca Shiikh Muxyaddiin Celi. Bixitaanka Muuse Suudi iyo Bashiir Raage ayaa wuxuu ku soo beegmayaa iyadoo dorraad uu ku dhawaaqay Guddoomiye ku xigeenka Midowga Maxkamadaha Islaamka Shiikh C/qaadir Cali Cumar in aan laga yeeli doonin Hoggaamiyayaashii ku bahoobay Isbaheysigii La-dagaalanka Argagixisada in ay shaar qabiil soo gashadaan markii laga itaal roonaaday, wuxuuna ugu baaqay in ay hubkooda Maxkmadaha ku soo wareejiyaan. Horayna Xubno ka tirsan Isbaheysigii bur buray ee La-dagaalanka argagixisada ayaa waxay u kala carareen Tuulooyin ka tirsan Gobollada Dalka, halka kuwo kalena ay dalka dibadda uga baxeen, waxayna arrimahaas oo dhan ku soo beegmayaan iyadoo gacan ku heyntii magaalada Muqdisho ay la wareegeen Midowga Maxkamadda Islaamka oo muddo afar Bilood ah Muqdisho kula dagaalamayay Xubnihii Isbaheysiga La-dagaalanka Argagixisada. Salaad Iidow Xasan (Xiis) Hiiraan Online [email protected] Mogadishu, Somalia



		Dibadbax lagu taageerayay Maxkamad Islaami ah oo looga dhawaaqay Gobolka Hiiraan oo ka dhacay Magaalada Beledweyne Sabti, June 17, 2006(HOL): Dibad-bax kii ugu balaarnaa inta la xasuusan yahay oo soo mara gobolka Hiiraan, laguna taageerayay Maxkamaddii dhawaan looga dhawaaqay Gobolka iyo Midowga Maxaakiimta Islaamiga ah ayaa waxaa uu ka dhacay Fagaaraha Isbitaalka weyn ee Gobolka Hiiraan. Isku soo baxan oo ay soo qaban qaabiyeen Xubaha Ururka la magac baxay Midnimada iyo Bad-baada Umadda Soomaaliyeed oo ah kuwa qeybta ka qaatay hirgalinta Maxkamadda ayaa intii aysan bilaaban ka hor ka qeyb-galayaashu waxaa ay socdo dheer ku soo mareen Guud ahaan magaalada, iyagoo intaas kadibna isugu soo uruuray fagaaraha oo ay kala hadleen Culimaa'udiinka Maxkamadda. Qudbadihii la jeediyay oo ah kuwo u badan Guubaabo iyo in dadku ka qeyb-qaataan hirgelinta Shareecada Islaamka, ayaa waxaa xusid mudan in ay ku jireen Qodobo siyaasadeed oo qaar ka mid ah culimadu soo hadal qaadeen. Shiikh Ibraahim Jiiley oo ka mid ahaa culimadii ugu cad cadeed ee ka hadashay dibad baxa ayaa sheegay in marnaba haddii ay yihiin dadka Gobolka aysan Ogolaan doonin in ciidamo shisheeye la keen Gudaha dalka, waxaana uu soo hadal qaaday sida uu yiri warar laysla dhaxmaray oo sheegaya in culimadu duulaan ku yihiin qeybo ka mid ah dhulka Ethiopia taasoo uu ku tilmaamay in ay tahay arin aan sal la heyn, balse waxaa uu ka dhawaajiyay in dowlada Ethiopia Laftirkeeda looga baahan yahay in ay tixgeliso jiritaan Umadda Soomaaliyeed iyo deris wanaaga. Dhanka kale waxaa ay shacabka ku booriyeen culimadu in laga digtoonaado in jiraan kuwo u adeegaya sida uu hadalka u dhigay Gaalada oo ku sugan Gudaha Gobolka, kuwaasi oo xitaa laga yaabo in joogaan goobta dibad baxu ka dhacayay waa sida uu Shiikha hadalka u dhigaye. Dadka ka soo qeyb-galay isku soo baxa oo ahaa kuwo wajiyadooda laga dheehan karay Qiiro aad u weyn ayaa ku dhawaaqayay erayo dhamaantood ku saleysan taageerada Maxkamadaha ka hergalay gudaha dalka iyo sida aysan marnaba u ogolaan doonin in dalka Soomaaliya lagu sameeyo faragalin shisheeye. Ka hor inta uusan dibad baxani bilaaban ayaa waxaa ka dhacay gudaha magaalada Isku dhac dhex maray ciidamada Maxkamdaha iyo ciidamada ka amar qaata guddoomiyaha Gobolka Yuusuf Dabageed oo doonayay in ay joojiyaan qabsoomida isku soo baxa, taasoo qasabtay intii uu socday dibad baxa in ciidamada maxkamadu iyagoo hubeysan ay gaaf wareegaan hareeraha goobata banaanbaxa ka dhacayay. Waxaa xusid mudan in qaar ka mid ah culimadu ka dhawaajiyeen in ay xiriir rasmi ah la leeyihiin Midowga Maxkamada Islaamiga ah maadaama ay ka siman yihiin fikirka la xiririra ku dhaqanka shareecada Islaamka,waxaana qodobkaasi uu ahaa mid ay ku jahwareer sanaayeen markii hore Bulshada Gobolka Hiiraan oo su'aalo badan iska weydiinayay wax kacdoonku ku saleysan yahay. Taageerada ay muujiyeen Bulshada Gobalka ayaa ishaareysa sida shacabku ugu ooman yahay in lagu dhaqo shareecada Islaamka, Gaar ahaana loo soo celiyo amnigii iyo kala dambeyntii oo ay sheegeen in uu maamulka Gobolka ku fashilmay. C/raxmaan Diini, Hiiraan Online [email protected] Beledweyn , Somalia



		Magaalada Jowhar oo laga hirgeliyay Ciidamo Deegaan oo suga ammaanka kadib markii ay dilaaceen Kooxo Burcad ah Sabti, June 17, 2006(HOL): Wararka naga soo gaaraya magaalada Jowhar ee gobolka Shabeelaha Dhexe oo ay ka taliyaan Midowga Maxkamadaha Islaamka ayaa sheegaya in halkaasi laga hirgeliyay ciidamo Deegaan oo suga ammaanka magaaladaas. Sameynta ciidamadan ayaa waxaa kalifay sida wararku nagu soo gaarayaan kadib markii ay habeenadii la soo dhaafay ay magaaladaas ka dilaaceen kooxo burcad ah oo dadka dhaca, guryahana jabsada, kuwaasi oo ka faa'iideysanaya xaaladda kala guurka ah ee ay ku jirto Magaalada Jowhar. Guddoomiyaha Midowga Maxkamadaha Islaamka Shiikh Shariif Shiikh Axmed oo Jowhar ku sugan ayaa sheegay in ciddii lagu helo iyadoo gacmaha kula jirta falal tuuganimo ah shareecada Islaamka la hor geyn doono, isagoo ugu baaqay dadka Magaalada in ay la shaqeeyaan oo ay gacan siiyaan ciidamada deegaanka ee la sameeyay, kuwaasi oo loo soo xushay in ay yihiin kuwo dadka iyo deegaankaba kaga aqoon badan Maleeshiyooyinka Maxkamadaha. Dadka qaarkood ayaa sheegaya in intii uu Magaalada Jowhar ka talinayay Maamulkii Maxamed Dheere ay magaalada ahayd mid nabdoon oo maamul adag ku hoos jirtay, iyadoo xiligaas dadku ay gaareen in ay habeenkii iska seexan karaan iyadoo guryahooda ay u furan yihiin albaabada. Waxyaabaha ay haddaba Dadka Reer Jowhar ka faa'iideen qabsashadii Midowga maxkamadaha Islaamka ayaa waxay tahay iyadoo aan haatan laga qaadeynin lacag tiro badan oo uu canshuur ahaan uga qaadi jiray Maamulkii Maxamed Dheere, taasi oo ganacsiga dadka caqabad ku ahayd, maciishadiina sare u qaaday. Salaad Iidow Xasan (Xiis) Hiiraan Online [email protected] Mogadishu, Somalia

Contact:[email protected]
Copyright � 2006 Hiiraan Online