Mudaharaad xalay ka dhacay Magaaladda Boorama ee Gobolka Awdal iyo ciidammo badan oo la geeyay Magaaladaas
Khamiis, December 08, 2011 (HOL) − Mudaharaad balaadhan ayaa xalay ka dhacay magaaladda Boorama ka dib markii shalay xabsiga loo taxaabay nin siyaasi ah oo lagu eedeeyey in warar aan haboonayn ka sheegay warbaahinta.
Siyaasigan la xidhay oo magaciisa la yidhaa Maxamed Jaamac Abgaal ayaa lagu sababeeyey xadhigiisa inay ka dambaysay wax lagu tilmaamay inuu war fidmo abuuur ah oo ku saabsan mashaqadii ka dhacday deegaanka Seemaal ee saddexda nin lagu dilay warbaahinta ku faafiyey.
Mudaharaadkan oo socday dhawr saacadood ayaa dadkii isku soo baxay waxay iskugu yimaadeen meel aan ka fogayn saldhiga magaaladda Boorama, halkaas oo ciidamada Booliskuna rasaas kaga jawaabeen, iyagoo ka baqay inay isla soo jiidhaan dadku balse markii dambe rasaas badan oo cirka loo ridayey ayaa dadkii lagu kala dareeriyey, inkastoo rasaaskii la riday aanay cidi wax ku noqon. Haseyeeshee, Waxa xalay ilaa maaanta la keenay magaaladda Boorama Ciidamo aad u badan, kuwaas oo adkayn doona amniga magaalada.
Sidoo kale waxa isaguna magaaladda Hargeysa lagu xidhay Suldaanka beesha lagu tuhunsan yahay inay falkan saddexda qof lagu dilay ka dambeeyeen, Suldaan Xuseen Aw Muuse Cirday, inkastoo uu falkii dhacay cambaareeyey hadana waxa loo xidhay sidii dadkii falkan gaystay loo soo heli lahaa, isla markaana lagu cadaadinayaa in beeshan lagu tuhmayo falkaasi usoo qaban lahaayeen dadkii falkan gaystay.
Dhinaca kale, guddoomiyaha gobolka Awdal, Axmed Xaddi Sidci ayaa kulan la yeeshay waxgaradka iyo Odayaasha beesha saddexda qof lagaga dilay deegaanka Seemaal ee Gabiley iyo Baki u dhexeysa ee gobolka Awdal, waxaanu sheegay inay isla afgarteen inay xukuumadda Somaliland ka sugaan soo qabashadda dadkii falkaasi ka dambeeyey, isla markaana loogu mahadnaqo tallaabooyinka muhiimka ee ilaa hadda ay qaaday xukuumaddu.
Shirkan guddoomiyaha iyo waxgaradka beesha wax laga dilay ayaa ka qabsoomay hotel Rays ee magaaladda Boorama, halkaas oo ay iskula afgarteen in laga dhursugo soo qabashada dhagar qabayaashii dilkaasi foosha xun gaystay.
Barkhad-Ladiif M. Cumar, Hiiraan Online
barkhadladiif@hiiraan.com
Hargeysa, Somaliland
