Jaceyl ku haya dartiis adigoo Rag ah Dhar Dumar ma u xiran lahayd?

Isniin, November 14, 2005(HOL): Jawaabta su'aashan waxaan ka helnay dhalinyaro Rag ah oo jooga magaalada Jowhar, kuwaasi oo ku labistay dharkii Dumarka, gaar ahaan Xijaabka iyo hoos-gashiyo kale sabab la xiriirta Jaceyl hayay dartiis.

Dhacdadan ayaa waxay ka dhacday Xaafadda Kulmis ee degmada Jowhar, waxaana soo shaac bixiyay Ciidamada Ammaanka gobolka Shabeelaha Dhexe, kuwaasi oo iyagu u xil saaran sugidda ammaanka iyo in ay la socdaan dhaqdhaqaaqyada dadka bacdamaa ay uu ku sugan yihiin Madaxda dowladda Federaalka Soomaaliyeed.

Ciidamada Ammaanka Degmada Jowhar oo howshoodii shaqo ku guda jira ayaa xalay waxay gudaha Xaafaddaas joojiyeen labo qofood oo mid ka mid ah uu ku labisnaa dharka Dumarka xirtaan, gaar ahaan Xijaabka, iyadoo midka kalena uu qabay Dharka Ragga ay xirtaan, haddaba markii labadaas dhalinyarada ah laga dhawaajiyay oo magacyadooda la weydiiyay ayay labadiiba noqdeen labo wiil, waxayna taasi ku noqotay ciidamadii ammaanka wax aysan maleysan karin bacdamaa qofkii qabay dharka Dumarka ay ka sugayeen cod Dumar, hayeeshee uu u soo baxay cod Rageed oo weyn.

Labadan wiil ee dhalinyarada ah ee midkood iska soo dhigay Dumarka ayay ciidamada xabsi u taxaabeen, iyadoo arrintoodana baaris lagu hayo, inkastoo wareysigii ugu horeeyay ee ay bixiyeen-na ay ku sheegeen in ay la xiriirto sabab jaceyl iyo hinaaso gelin lala damacsanaa gabar ku ballan furtay mid ka mid ah labada wiil.

Labada Wiil ee la xiray, gaar ahaan midka aan dharka dumarka wadan ayaa ku dooday in uu falkaas u sameeyay isagoo doonayay in uu saaxibkiis ku maseyriyo gabar uu jeclaa oo nin kale ka raacday, si buu yiri ay ugu maleyso in uu isna gabar kale la socdo, hayeeshee howlgalkaas waa uu ka dhicisoobay, wuxuuna u soo dedejiyay in xabsi la dhigo, isla markaana su'aalo badan laga weydiiyay wixii uu falkaas u sameeyay.

Waa Jaceyl iyo xaaladihiisee dhawaan ayay magaalada Muqdisho, gaar ahaan xaafadda Siinaay ka dhacday arrin la xiriirtay ballan-fur guur, taasi oo sababtay in wiilkii looga baxay ballan uu mindi qudha kaga jaro gabadhii uu jeclaa ee ballanta uga baxdo.

Salaad Iidow Xasan (Xiis), Hiiraan Online
sxiis@hiiraan.com
Mogadishu, Somalia

Maxaa ka jira in Wafdi sare oo ka socda Dowladda Itoobiya ay ku sugan yihiin magaalada Jowhar?

Isniin, November 14, 2005(HOL): Wararka ka imaanaya magaalada Jowhar ee xarunta Gobolka Shabeelaha Dhexe ayaa sheegaya in Bandow lagu soo rogay qeybo ka mid ah magaaladaas xalay kadib markii ay shalay soo gaareen Wafdi sare oo ka socda Dowladda Itoobiya.

Ilo Muhiim ah oo ku sugan magaalada Jowhar ayaa waxay sheegeen in wafdigan aan tiradiisa la sheegin ay ku jiraan mas'uuliyiin uu ka mid yahay Wasiirka Arrimaha Dibadda Dowladda Itoobiya Syoum Mosfen oo uu la socdo Danjiraha Dowladda Itoobiya ee Arrimaha Soomaaliya Cabdi Casiis Axmed Aadan.

Waxaa aad u yar wararka laga heli karo goobta wafdigaas la dejiyay kadib markii loo diiday in ay saxafiyiintu tagaan isla markaana si weyn loo adkeeyay ammaankeeda, waxaase haddiiba ay jirto imaanshaha Wasiirka Arrimaha Dibadda ay noqoneysaa markii ugu horeysay muddo 15 sanadood ah oo uu Wasiir ka socda Dowladda Itoobiya uu yimaado Dalka Soomaaliya.

Wararku waxay intaas ku darayaan in Wafdigani ay kulamo la leeyihiin Madaxweyne C/llaahi Yuusuf Axmed, Wasiirka Arrimaha Dibadda Xukuumadda Federaalka Danjire C/llaahi Shiikh Ismaaciil iyo Guddoomiyaha Maamulka Gobolka Shabeelaha Dhexe Maxamed Cumar Xabeeb (Maxamed Dheere), inkastoo aan la ogeyn waxyaabihii ay ka wada hadleen labada dhinac.

Warar kale oo warkan hore ka duwan isla markaana Jowhar ka soo gaaraya Xafiiska HOL ee magaalada Muqdisho ayaa sheegaya in wafdigan uusan ka mid ahayn Wasiirka Arrimaha Dibadda Itoobiya, hayeeshee uu imaan doono maalamaha soo socda, iyadoo xubnahan Jowhar uga sii hormarayna ay yihiin kuwo u sii gogol xaarayay tegitaankiisa Jowhar.

Dowladda Itoobiya ayaa inta badan waxaa eedeyn u jeediya xubnaha labada Gole ee Dowladda Federaalka kuwooda Muqdisho ku sugan oo ku dooda in Dowladda Itoobiya ay hub siiso garabka Dowladda Federaalka ee Jowhar ku sugan, iyadoo eedeyntaasna ay beeniyaan xubnaha Dowlada Federaalka ee Jowhar xarunta ka dhigtay.

Si kastaba arrintu ha ahaatee tegitaanka Wafdigan ee magaalada Jowhar ayaa wuxuu ku soo beegmayaa iyadoo dhawaan dib loo dhigay shir ay Wasiirrada Arrimaha Dibadda Dalalka IGAD ku yeelan lahaayeen magaalada Jowhar, iyadoo dib u dhigista shirkaasna uu ku dhawaaqay Wasiirka Arrimaha Dibadda Uganda oo haatan ah Shir guddoonka Wasiirada Arrimaha Dibadda, kaasi oo Dowladda Federaalka garabka Jowhar ku wargeliyay in uu gadaal ka soo sheegi doono waqtiga shirkaas la qaban doono.

Salaad Iidow Xasan (Xiis), Hiiraan Online
sxiis@hiiraan.com
Mogadishu, Somalia

Madaxweyne ku xigeenka Puntland oo berri u imaanaya magaalada Gaalkacyo wada tashi ku saabsan xasilinta Ammanaka Gobolka Mudug

Isniin, November 14, 2005(HOL): Wararka ka imaanaya magaalada Gaalkacyo ee xarunta Gobolka Mudug ayaa sheegaya in uu diyaargarow xoog leh ka socdo magaaladaas, kaasi oo lagu soo dhaweynayo wafdi uu hoggaaminayo Madaxweyne ku xigeenka Maamul goboleedka Puntland Md. Xasan Daahir Af-Qurac oo lagu wado in uu berri gaaro magaaladaas.

Maanta ayaa dad badan iyo mas'uuliyiin ka tirsan maamulka Gobolka Mudug waxay ku sugnaayeen Xarunta madaxtooyada, iyagoo u maleynayay in uu wafdiga Madaxweyne ku xigeenka u imaanayay, balse waxay mar dambe mas'uuliyiinta gobolka dadkaasi u sheegeen in uu dib u dhacay imaanshaha Wafdigaas.

Guddoomiyaha Maamulka Gobolka Mudug Shiikh Daahir Nuur Daahir ayaa sheegay in imaanshaha Madaxweyne ku xigeenka ee magaalada Gaalkacyo ay la xiriirto sidii ay uga wada tashan lahaayeen sii adkeynta xasiloonida ka jirta Gobolka iyo in ay ka wada tashadaan xaaladda uu ku sugan yahay Madaxweynaha Puntland Jen. Cadde Muuse oo iminka ku sugan Dalka Jarmalka.

Warar kale ayaa sheegaya in isbitaal ku yaala dalka Jarmalka Qalliin lagula sameeyay Madaxweyne Cadde Muuse, iyadoo Qalliinkaasina uu ku aadanaa dhinaca Keliyaha oo la sheegay in uu Madaxweynaha ka xanuunsanayay, iyadoo ay xaaladdiisaasna iminka ka soo reyneyso, inkastoo horay u soo baxeen warar sheegayay in Isbitaal ku yaala Dalka Pakistan uu suurtagelin waayay Qalliinkan, kadib markii ay Dhaqaatiirta Pakistan ay sheegeen in uu Madaxweynuhu qabo xanuuno kale oo aan saamaxeynin in madaxweynaha la jeexo iyadoo aan la daweynin.

Salaad Iidow Xasan (Xiis), Hiiraan Online
sxiis@hiiraan.com
Mogadishu, Somalia