Dowladda Soomaaliya oo sheegtay in la qabanayo shirar looga hadlayo arrimaha Shidaalka
Isniin, June, 03, 2019 (HOL) - Qoraal uu soo dhiggay bartiisa Twitter-ka
Wasiir kuxigeenka Wasaaradda Batroolka Soomaaliya Maxamuud Cabduqaadir Hilaal
ayuu ku sheegay in Shirka koowad lagu qabanayo Turkiga,isla markaana ay ka qeyb
geli doonaan Shirkado laga leeyahay dalkaas, kuwaas oo daneynaya Shidaalka
Soomaaliya.
Waxaa kaloo uu intaa ku daray in shirka Labaad uu ka dhici doono dalka
Mareykanka si la mid ah ay ka soo qeyb-geli doonaan Shirkado laga leeyahay
dalkaas,kuwaas oo daneynaya Shidaalka Soomaaliya.
Laakiin ma’uusan shaacin waqtiga rasmiga ah ay
shirarkaasi dhici doonaan, balse waxaa la xasuustaa khilaafkii xooganaa ee
ka dhashay shirkii looga hadlayay Arrimaha shidaalka ee ka qabsoomay magaalada
London ee dalka Ingiriiska.
Waxaa jira dood weyn oo wali ka taagan
sharciga Batroolka ee uu dhawaan meel mariyay Baarlamaanka Soomaaliya kaa oo u
dhaxeeya dowladda dhexe iyo maamul gobolleedyada oo horay u dalbaday in arintaa
dib loo dhiggo si looga yeesho wadatashi guud.
C/raxmaan Diini, Hiiraan Online
[email protected]
