Muqdisho: Khasaaro ka dhashay iskahorimaad hubeysan oo ka dhacay caawa degmada Xamar weyne
Axad, June, 02, 2019 (HOL) - Ugu yaraan hal qof ayaa geeriyooday afar kalana waa ay ku dhaawacmeen,kaddib markii booliska iyo koox
burcad ah ay isku rasaaseeyeen degmada Xamar weyne.
Taliye ku-xigeenka Booliska, Sakiya Xuseen
ayaa sheegtay kooxda burcadka ah ee boolis la-dagaallantay inay dhac u geysteen
dad shacab ah oo u adeegganayay munaasabadda ciidda.
"Ciidammada boliiska degmada
X/Weyne ayaa ku guuleystay in ay gacanta ku soo dhigaan 3 burcad hubeysan oo
dhacaayay shacabka suuqa ka soo doontay adeega ciida. Burcadka ayaa dagaalamay,
israsaaseyn ka dib sadaxdii burcad oo mid dhaawac yahay ayaa gacanta lagu
dhigay."
"Seddax shacab ayaa dhaawac fudud ka
soo gaaray hal kalena ku dhintay israsaaseynta burcadka oo galay goob
dukaan." sida waxaa sheegtay Sakiya Xuseen, taliye ku-xigeenka
booliska.
Suuqyada caasimadda Muqdisho ayaa
waxaa ka jira mashqul badan, iyadoo dadweynaha ay isku diyaarinayaan
munaasabadda ciidda, taas ayaa dhalisay mararka qaar inay kooxo burcad ah dhac
u geystaan shacabka.
Iman Mohamed Jama, Hiiraan.com
[email protected]
