Axad, June, 02, 2019 (HOL) -Ciidamada dowlad maamul gobolleedka Galmudug oo saacadihii ugu danbeeyay dhaqdhaqaaqyo ciidan ka waday gobolka Galguduud ayaa gaaray deegaanno ay horay gacanta ugu hayeen xoogagga Al-shabaab.
Taliyaha ciidamada howlgalkan sameeyay Cabdullaahi Cabdi Raage ayaa sheegay in ciidamadu gaar ahaan howlgalkooda ka sameeyeen deegaanka Bulacle oo dhawaan la sheegay in ay tageen dagaalyahanno ka tirsan Ururka Al-shabaab.
Wuxuu sheegtay taliyuhu in ay halkaa ugu tageen saanad ciidan oo sida uu hadalka u dhigay ay ka carareen xoogagga Al-shabaab dhawaanna warbaahinta u soo bandhigi doonaan.
Waxaa uu ugu baaqay dadka kunool degaanka Bulacle in aysan soo dhaweyn Al-Shabaab, islamarkaana ay la shaqeeyaan ciidanka maamulka Galmudug.
Gobolka Galguduud qeybo ka mid ah waxaa wali maamula oo gacanta ku haya dagaalyahannada Ururka Al-shabaab.
C/raxmaan Diini, Hiiraan Online[email protected]