Madaxweynaha oo warqadaha aqoonsiga ka guddoomay safiirka cusub ee Talyaaniga (SAWIRRO)
Isniin, September 26, 2016 (HOL) —
Madaxweynaha Somalia, Xasan Sheekh, ayaa maanta Waraaqaha Aqoonsiga Danjirenimo
ka Guddoomay Safiirka cusub ee Talyaaniga u Fariisan doona Soomaaliya.
Xasan Sheekh iyo Danjiraha dalka Taliyaaniga
Carlo Campalina oo beddelaya safiirkii hore ee Talyaaniga ayaa yeeshay kulan, kaasoo
ay Diirada ku saareen xiriirka u dhexeeya labada dal iyo sidii loo sii xoojin
lahaa maadaama Soomaaliya iyo Talyaaniga uu ka dhexeeyo xiriir taariikhi ah, Waxaana
la isku soo qaaday in la Xoojiyo Taageerada ay Dowladda Talyaanigu siiso DF Soomaaliya
iyo Maashaariicda Cusub ee ay ka ulinayso Waddanka.
Sidoo kale, Madaxweynaha Somalia
ayaa uga mahad-celiyey Dowladda Talyaaniga sida ay u Garab-taagan tahay Xukuumadda iyo Shacabka Soomaaliyeed. Wuxuuna ka Dalbaday in ay kordhiyaan taageeradooda.
Dhanka kale Wasiirka ku xigeenka arrimaha dibadda Somalia Axmed Cali Kadiye oo shirka goob-joog ka ahaa, ayaa xusay in kulanka Waxyaabaha looga hadlay ay ugu Muhiimsaneyd in danjiraha cusub shaqadiisa lagu gacan siiyo, Xukuumadda Talyaanigana ay ka qayb-galka
Horumarka Soomaaliya sii waddo.
Ugu dambeyn, Safiirka Talyaaniga
Carlo Campalina ayaa isaguna sheegay inuu ku faraxsan yahay in loosoo magacaabo
Danjiraha Waddankiisa ee Somalia, isla markaana uu Dowladda iyo Shacabka Talyaaniga
ay billaabi doonaan Mashaariic Horumarineed oo lagu Taageerayo Soomaaliya.
Maxamed X. Xuseen, Hiiraan Online
[email protected]
Muqdisho, Soomaaliya
