Jen. Goobaale oo Muqdisho lagu aasay iyo Madaxweynaha Somalia oo ka hadlay dilkiisa (SAWIRRO)
Isniin, September 19, 2016 (HOL) —
Jen. Maxamed Rooble Jimcale (Goobaale) oo shalay lagu dilay Qarax Baabuur oo ay Mas’uuliyaddiisa
sheegatay Al-shabaab, ayaa maanta lagu aasay Muqdisho, waxaana ka hadlay
dilkiisa Madaxweyne Xasan Sheekh Maxamuud.
Madaxweynaha Somalia oo
hadal kooban jeediyay tukashada salaadda Jinaasada kaddib ayaa sheegay in
marxuumka uu ahaa Geesi ka wada dhintay Shacabka Soomaaliyeed, naftiisana u
huray inuu cadowga ka dul kiciyo dadka iyo dalka.
“Allah u naxariisto
marxuumka. Waxaan mar kale tacsi u dirayaa qoyskii, eheladii, ciidanka xoogga dalka
iyo shacabka Soomaaliyeed ee uu ka baxay. Wuxuu kasoo baxay kaalintii kaga
aaddanayd ciribtirka Al-shabaab oo haatan gabbalkooda uu sii dhacayo,’’ ayuu
yiri Xasan Sheekh.
Sidoo kale, Madaxweynaha ayaa
marxuumka Ilaahay uga baryey inuu naxariistii janno ka waraabiyo, qoyskii iyo
eheladii iyo shacabka Soomaaliyeedna ee ka baxayna uu samir iyo iimaan ka
siiyo.
Tukashada Salaadda Jannaasada
ee Jen. Goobaale, waxaa sidoo kale ka qaybgaley RW Cumar C/rashiid, xubno ka
tirsan labada gole, madaxda maamullada Galmudug iyo Koonfuur Galbeed,
saraakiisha Ciidamada Qalabka Sida ee Somalia iyo xubno ka tirsan Qoyska Marxuumka.
Ugu dmbeyn, Marxuumka ayaa
waxaa la geeriyooday toddoba ka mid ah ilaadiisii gaarka ahaa ee la socday, waxaana
ku dhaawacmay tiro kale oo ilaaladiisa ka mid ahaa, waxaana weerarka dilkiisa sheegatay
Al-shabaab.
Maxamed X. Xuseen, Hiiraan Online
[email protected]
Muqdisho, Soomaaliya
