3/18/2024
Today from Hiiraan Online:  _
Wararka Maanta- Axad, Sept 15, 2013
Wasiirka Warfaafinta Xukuumadda Soomaaliya oo si Caro leh uga Jawaabay qoraal ay Warbaahinta Somalida Qaarkood baahiyeen

Axad, September 15, 2013 (HOL) — Wasiirka wafaafinta dowladda Soomaaliya C/llaahi Ciilmooge Xirsi ayaa si caro leh uga jawaabay qoraal lagu baahiyay qaar ka mid ah war-baahinta Soomaalida, isgaoo qoraalkaas ku tilmaamay mid been abuur ah.

Qoraal uu wasiirku soo gaarsiiyay HOL ayuu ku xusay, in warqaddaasi ay tahay mid uu qoray qof magaciisa ku sheegay Chopra, loogana hadlay heshiis ay dowladda Soomaaliya la gashay shirkad laga leeyahay dalka Turkiga oo lagu magacaabo FAVORI LLC,  taasoo beddeleysa shirkadda SKA oo horay maamulka garoonka magaalada Muqdisho loogu wareejiyey.

Wasiirku wuxuu intaas raaciyey in heshiiska shirkadda FAVORI LLC ay ansixiyeen golaha wasiirrada xukuumadda Soomaaliya  bishii Juun 2013, iyadoo loo saaray guddi ay ku jiraan laba xubnood oo wasiirro ah hirgelinta heshiiskan si ay labada shirkadooda ula kala wareegaan maamulka garoonka 15-ka bishan oo maanta ku beegan.

“Qoraalkan waa been abuur cusub oo ay baahiyeen warbaahinta ay leeyihiin dagaal-oogayaasha iyo   qas-wadayaasha, waana mid lagu doonayo in lagu xumeeyo sumcadda saraakiisha dowladda iyo dadka xurmada ku leh bulshada dhexdeeda,” ayuu wasiirku ku yiri qoraalka uu soo gaarsiiyay HOL.

Sidoo kale, wasiirku wuxuu ku sheegay qoraalkiisa, in qoraalkan been abuurka ah lagu xusay inuu yahay mid kasoo baxay xafiiskiisa, ayna warbaahinta warkan baahisay ay u isticmaaleen saxiixiisa oo ay koobbi ku sameeyeen si bulshada ay uga dhaadhiciyaan qoraalkan been abuurka ah.

“Qoraalkan waa mid ay been abuureen warbaahinta hoggaamiye kooxeedyada iyo cadowga nabadda-diiddan, mana joojin doonaan inta laga horgeynayo sharciga si loola xisaabtamo. Dhab ahaan qoraalkani ma ahayn mid kasoo baxay xafiiskeyga, waxaana taas caddeyn u ah inuusan lahayn tixraac lambareed, waxaana qoraallada aan lambarka lahayn ay caddeynayaan inay yihiin kuwo la been abuuray,” ayuu wasiirku hadalkiisa ku daray.

Ugu dambeyn, wasiirka warfaafintu wuxuu sheegay in fariin uu kaga digayo warqaddaas uu u diray dhammaan madaxda warbaahinta xushmadda leh, isagoo ugu baaqay inay iska qabtaan kuwa magacooda iyo sharaftooda wax u dhimaya.

Maxamed Xaaji Xuseen, Hiiraan Online
[email protected]
Muqdisho, Soomaaliya













Click here
9/15/2013 3:10 PM EST
Axad, September 15, 2013 (HOL) — Dajire Nicholas Kay oo ah wakiilka gaarka ah ee u qaabilsan Qaramada Midoobay Soomaaliya ayaa sheegay in shirka Somalia loogu qabanayo magaalada Brussels ee dalka Belgium uu yahay mid muhiimad weyn u leh Soomaaliya uuna ka duwan yahay shirarkii horay loogu qaban jiray.

9/15/2013 1:34 PM EST
Axad, September 15, 2013 (HOL) — Ugu yaraan shan qof ayaa ku geeriyooday 30 qof oo kalena wy ku dhaawacmeen shil gaari oo ka dhacay deegaanka kala-bayrka oo ku yaalla duleedka degmada Buulo-burte ee gobolka Hiiraan.

9/15/2013 12:43 PM EST
Axad, September 15, 2013 (HOL) — Madaxweynaha Somaliland, Axmed Maxamed Maxamuud (Silaanyo), ayaa maanta xadhiga ka jaray, qaar kalana dhagax dhigay mashaariic fara badan oo laga hirgaliyey magaaladda Berbera ee gobolka Saaxil.

9/15/2013 11:56 AM EST
Axad, September 15, 2013 (HOL) — Kulan uu baarlamaanka Soomaaliya ku yeelan lahaa maanta xaruntiisa Muqdisho ayaa baaqday kaddib markii ay iman waayeen xildhibaannadii uu ku furmi lahaa kooramka, iyadoo mid ka mid ah mudanayaasha baarlamaanka uu ka hadlay arrintan.

9/15/2013 11:37 AM EST
Axad, September 15, 2013 (HOL) — Magaalada Baydhabo ee xarunta u ah gobolka Bay ayaa waxaa ka socda abaabulka dibadbax looga soo horjeedo shirka shirka Brussels ka furmaya, kaasoo lagu wado inuu berri magaaladaas ka dhaco.

9/15/2013 11:21 AM EST
Axad, September 15, 2013 (HOL) — Shirkadda SKA Air & Logistic oo haysay garoonka maamulka Muqdisho saddexdii sano ee lasoo dhaafay ayaa maanta ku wareejisay howlaha garoonka iyo maamulkiisa shirkad lagu magacaabo FAVORI LLC oo laga leeyahay dalka Turkiga, taasoo dib u habeyn ku sameyn doona garoonka.

9/15/2013 11:20 AM EST
Axad, September 15, 2013 (HOL) — Wasiirka arrimha gudaha iyo amniga Qaranka, C/kariin Xuseen Guuleed iyo xubno wasiirro ah ayaa kormeer ku sameeyay maanta mashruuca dowladda Turkiga ay ka waddo magaalada Muqdisho kaasoo lagu dayactirayo waddooyinka muhiimka ah, isagoo uga mahadceliyay dowladda Turkiga howsha dayactirka ah ee ay waddo.

9/15/2013 11:20 AM EST
Axad, Sebtember 15, 2013 (HOL)-Kulan looga hadlayey sidii loo adkeyn lahaa ammaanka gobolka Mudug aya maanta ka dhacay magaala madaxda gobolkaas ee Gaalkacayo.

9/15/2013 10:47 AM EST
Axad, September 15, 2013 (HOL) —Dowladda Soomaaliya ayaa maanta xabsiga dhigtay, Sheekh C/qaadir Maxamed Soomoow oo ka mid ahaa culummada Ahlusunna waljamaaca garabkooda Muqdisho, iyadoo aan la ogeyn sababta ramsi ah ee loo xiray.

9/15/2013 10:25 AM EST
Axad, September 15, 2013 (HOL) — Madaxweynaha Somalia, Xasan Sheikh Maxamud iyo wafdi heer sare ah oo uu hoggaaminayo ayaa maanta gaaray magaalada Brussels ee xarunta dalka Belgium, halkaasoo uu maalinta berri ah ka furmayo shirka higsiga cusub ee Soomaaliya.

9/15/2013 10:15 AM EST
Axad, Sebtember 15, 2013 (HOL)- Wefdi uu horkacayo madaxweynaha Puntland C/raxmaan Sheekh Maxamed (Faroole) ayaa maanta gaarey xarunta dalka Biljamka ee Brusells, halkaasoo uu berri ka furmayo shirka New Deal ee looga hadlayo sanadkan dib-u-dhiska dalka Soomaaliya.

9/15/2013 3:49 AM EST
Axad, September 15, 2013 (HOL) — Shirkad laga leeyahay dalka Turkiga oo lagu magacaabo FAVORI LLC ayaa maanta si rasmi ah ula wareegaysa gacan ku haynta maamulka garoonka diyaaradaha caalamiga ah ee Muqdisho, iyadoo xilka kala wareegaysa shirkadda SKA Air & Logistic oo saddexdii sano ee lasoo dhaafay haysay maamulka garoonka diyaaradaha.

9/15/2013 2:29 AM EST
Axad, September 15, 2013 (HOL) — Madaxweynaha dowladda Soomaaliya, Xasan Sheekh Maxamuud iyo wafdi ballaaran oo uu hoggaaminayo ayaa xalay u ambabaxay magaalada Brussels ee dalka Belgium, halkaasoo lagu wado in maalinta berri ah uu ka furmo shir looga hadlayo dib u dhiska dalka Soomaaliya.