3/19/2024
Today from Hiiraan Online:  _
Wararka Maanta- Arbaco, Sept 11, 2013
Ra’iisul Wasaaraha Somalia oo Dalka dib ugu soo laabtay kana Warbixiyey Safarradiisii Dibadda (SAWIRRO)


Arbaco, September 11, 2013 (HOL) — Ra’iisul Soomaaliya, Cabdi Faarax Shirdoon (Saacid) ayaa maanta dalka dib ugu soo laabtay kaddib safarro uu ku tagay dalalka Jabuuti, Sucuudiga iyo Yemen, halkaasoo uu heshiisyo kala duwan kula soo saxiixday hay’addo iyo wadammo, waxaana safarkiisa ku wehliyay xubno ka tirsan golaha wasiirrada xukuumadda Soomaaliya.

Mudane Saacid ayaa waxaa garoonka kusoo dhaweeyey xubnaha golaha wasiirrada, xidlhibaanno, saraakiil iyo dadweyne aad u tiro badan, kuwaasoo ka kala yimid degmooyinka gobolka Banaadir, uuna hoggaaminayay guddoomiyaha gobolka Banaadir ahna duqa Muqdisho, Maxamuud Axmad Nuur (Tarsan), isagoo ra’iisul wasaaruhu ka warbixiyay natiijada safarkiisa, gaar ahaana heshiisyo horumarineed oo ay lasoo galeen isaga iyo wafdigiisu urur-weynaha Islaamka OIC iyo dawladda Yemen.

Ra'iisul wasaare Saacid ayaa ugu horreyntii xusay in safarkiisu uu isugu jiray cibaado iyo shaqo, maadaama ra’iisul wasaaraha iyo xubnihii la socday ay tageen magaalada barakeysan ee Makka Al-Mukaramah, halkaa oo ay kusoo cimraysteen ayna alle uga baryeen dalka inuu helo xasilooni iyo barwaaqo.

Sidoo kale, ra’iisul wasaaraha ayaa xusay in dalalka ay socdaalka ku tageen isaga iyo wafdigiisa ay lasoo galeen heshiisyo kala duwan oo muhiim ah oo ku aadan dhinacyada iskaashiga dhaqaalaha, ganacsiga iyo maal-gashiga, waxbarshada iyo dhaqanka.

Wuxuu ra’iisul wasaaruhu si gaar ah u xusay heshiis ay xukuumaddu la soo gashay urur-weynaha Islaamka (OIC), kaasoo dhigayay in ururku uu Soomaaliya ka taageero dhinacyada, horumarinta adeegyadda bulshada iyo kaabayaasha dalka, wax-soo-saarka kala duwan ee dalka, daymaha oo dib loo eego, soo noolaynta mashaariicdii hore ee bankiga islaamka uu ka fulin jiray dalka Soomaaliya, tayaynta howl-qabadka hay’adaha dowladda.

Dhanka kale, Saacid ayaa ammaan iyo bogaadin u jeediyay dalka Jabuuti iyo hoggaankiisa, wuxuuna xusay inay sameeyeen horumar iyo furfurnaan ku aaddan dhinaca siyaasada iyo dhaqaalaha, isagoo tusaale usoo qaatay dekedo cusub oo laga hirgeliyay dalka Jabuuti intii ay booqashada ku joogeen dalkaas, wuxuuna tilmaamay inay kawada hadleen madaxweynaha Jabuuti, Ismaaciil Cumar Geelle sidii loo horumarin lahaa dekedaha Soomaaliya.

Ugu dambeyn, ra’iisul wasaaraha Soomaaliya ayaa soo dhaweeeyey heshiis ay dowladda Soomaaliya iyo maamulka Jubba kala saxiixdeen; wuxuuna ugu baaqay shacabka Soomaaliyeed inay taageeraan kana qeyb qaataan sidii loo dhaqan gelin lahaa heshiiskaasi oo qayb ka ah hanaanka dib u heshiisiineed ee ay dawladdu ku howlan tahay.

Mas’uuliyiinta Yemen oo uu ka mid ahaa wasiirka caafimaadka, Dr Axmad Qaasim Al-Cansi ayaa si heer sare ah ra’iisul Wasaaraha iyo wafdigiisa ugu soo sagootiyay halkaasoo booqasho rasmi ah wafdigu ay ku joogeen maalmihii lasoo dhaafay.






Maxamed Xaaji Xuseen, Hiiraan Online
[email protected]
Muqdisho, Soomaaliya













Click here
9/11/2013 10:59 AM EST
Arbaco, September 11, 2013 (HOL) — Magaalada Baydhabo ayaa waxaa ka furmay maanta shirweynihii lagu dhisayo maamul goboleed, kaasoo si rasmi ah uga furmay xarunta baarlamaanka Soomaaliya uu ku lahaa Baydhabo.

9/11/2013 10:59 AM EST
Arbaco, September 11, 2013 (HOL) — Madaxweynaha Soomaaliya, Xasan Sheekh Maxamuud ayaa maanta khudbad ka jeeediyey furitaanka shirka ka hortaga burcad-badeedda ee ka socda magaaladda Dubai ee dalka Isutagga Imaaraadka Carabta.

9/11/2013 9:36 AM EST
Arbaco, September 11, 2013 (HOL) — Shirkadda diyaaradaha Ethiopian Airlines ayaa joojisay duulimaadyadii ay ku tegi jirtay Somalialnd iyadoo aan la ogeyn sababta rasmiga ah ee keentay inay shirkaddaas joojiso socdaalkii ay ku tegi jirtay Somaliland.

9/11/2013 9:35 AM EST
Arbaco, September 11, 2013 (HOL) — Mas'uuliyiin ka tirsan maamulka gobolka Hiiraan, saraakiisha ciidamada Jabuuti ee howlgalka AMISOM, odayaal, waxgarad iyo qaar ka mid ah qurba joogta ka soo jeeda gobolka ayaa maanta kormeeray dhismaha mid ka mid ah jidadka ugu muhiimsan magaalada Beledweyne.

9/11/2013 7:50 AM EST
Arbaco, September 11, 2013 (HOL) — Xarakada Al-shabaab ayaa maanta ku toogatay degmada Buulo-burte ee gobolka Hiiraan, laba dhallniyaro oo mid ka mid ah ay ku sheegeen inuu ahaa jaasuus u shaqeynayay dalal shisheeye inkastoo aysan sheegin magacyadooda, halka ruuxa kalena ay ku eedeeyeen inuu ahaa tuug dhacayay gaadiid xamuul ah oo ay ciidamadooda amnigu soo qabteen.

9/11/2013 5:07 AM EST
Arbaco, September 11, 2013 (HOL) — Ciidamada maamulka KMG eee Jubba ayaa howlgallo ay xalay ilaa saaka ka sameeyeen gudaha magaalada Kismaayo ayay kusoo qabqabteen tiro dad ah oo ku eedeysan falal lidi ku ah ammaanka.

9/11/2013 3:33 AM EST
Arbaco, September 11, 2013 (HOL) — Saraakiil ka tirsan milateriga Somalia ayaa lagu wadaa inuu maalmaha soo socda tababar socon doona muddo hal sano ah uu ugu furmo dalka Turkiga, kaasoo qayb ka ah heshiiskii ay horay u gaareen dowladda Soomaaliya iyo dowladda Turkiga.

9/11/2013 3:11 AM EST
Arbaco, September 11, 2013 (HOL) — Madaxweynaha Soomaaliya, Xasan Sheekh Maxamuud iyo wafdi uu hoggaaminayo ayaa xalay gaaray Dubai oo ka tirsan imaaraadka carabta, halkaasoo uu ka furmayo shir looga hadlayo ka hortagga burcad-badeedda.

9/11/2013 3:02 AM EST
Arbaco, September 11, 2013 (HOL) — Kulan ballaaran oo shalay ka dhacay magaalada Brussels ee xarunta dalka Belgium ayaa lagu soo dhaweeyay danjiraha cusub ee Soomaaliya ay u magacowday dalkaas, Cali Siciid Fiqi, iyadoo shirkaas ay ka qaygbaleen mas'uuliyiin, jaaliyadaha Soomaaliyeed ee ku nool dalka Belgium, culummo iyo odayaal.

9/11/2013 2:58 AM EST
Arbaco, September 11, 2013 (HOL) — Guddoomiyaha baarlamaanka Soomaaliya, Prof. Maxamed Sheekh Cismaan (Jawaari) ayaa sheegay in howsha ugu weyn ee hortaalla baarlamaanka ay tahay dib u eegis lagu sameeyo dastuurka dalka, inta looga ansixinayo afti dadweyne.