Khilaaf soo Dhex-galay Maamulka Gobolka Bay iyo Mas'uuliyiinta Maamulka oo dacwad ka Gudbiyay Guddoomiyaha
Axad, May 19, 2013 (HOL) — Maamulka cusub ee gobolka
Bay ayaa la sheegay inuu soo dhexgalay khilaaf aa aad u xooggan, kaasoo keenay
inay joogsato wadashaqeyntii u dhexeysay guddoomiyaha gobolka iyo xubnaha kale
ee maamulka gobolkaas ku jira.
Guddoomiye ku xigeen gobalka Bay, Mustaf
Ibraahim Cali (Masuuse) ayaa hadal uu warbaahinta siiyay ku sheegay inaysan
wadashaqeyn ka dhexeysa maamulka gobal, kan degmooyinka iyo guddoomiyaha Gobalka
Bay, Cabdi Aadan Hasoow, isagoo sheegay in guddoomiyuhu uu noqday kaligii
taliye.
“Ma jirto wax wadashaqeyn ah oo ka
dhexeysa maamulka gobal iyo kan degmooyinka, kaddib markii mas’uul walba uu
billaabay inuu ku dhawaaqo wixii uu rabo,” ayuu Mustaf Masuuse ku yiri hadalkii
uu siiyay warbaahinta.
Guddoomiye ku xigeenka ayaa hadalkiis ku
daray inay warqad dacwo ah u qoreen wasaaradda arrimaha gudaha iyo amniga
Qaranka ee xukuumadda Soomaaliya iyo nabaddoonnada Digil iyo Mirifle.
“Cabdi Aadan Hasoow weligiis ma uusan
imaan xafiiska goblka Bay iyo kan degmada, wuxuu xafiis ka dhigtay gurigiisa, meeshaas
ayuuna qaabilaad ku sameeyaa, taas ayaana nagu kalliftay inaan dacwad u gudbinno
wasaaradda arrimaha gudaha iyo amniga iyo ugaasyada Digil Mirifle,” ayuu guddoomiye
ku xigeenku hadalkiisa raaciyay.
Maamulka gobolka Bay ayaa waxaa
horraantii sannadkan loo magacaabay in uu bedelo maamulkii halkaas ka talinayay
ee uu guddoomiyaha u ahaa C/fitaax Geeseey, iyadoo tan iyo xilligaas uusan
maamulkan ka bixin khilaaf u dhexeeya mas’uuliyiinta maamulka.
Guddoomiyaha gobolka Bay, Cabdi Aadan
Hesoow oo lagu eedeeyay inuu noqday kaligii taliye ayaan weli ka hadlin
eedeynta kaga timid ku xigeenkiisa, iyadoo tani ay caddeyn u tahay inuu jiro
khilaaf xooggan oo u dhexeeya maamulka gobolka Bay.
Hiiraan Online , Baydhabo
