3/28/2024
Today from Hiiraan Online:  _
Wararka Maanta- Talaado, Mar 5 , 2013
Wasiiradda Arrimaha Bulshada Somalia Drs. Maryan Qaasim oo la Hadashay Jaaliyadda Soomaaliyeed ee UK (SAWIRRO)


Talaado, March 05, 2013(HOL): Munaasabad lagu soo dhaweynayay Wasiirka Wasaaradda Horumarinta iyo Adeegga Bulshada Drs. Maryan Qaasim ayaa lagu qabtay magaalada London ee caasimadda dalka Britain.

Munaasabaddan ayaa waxxaa soo qabanqaabisay Jaaliyadda Soomaalida ee UK, waxaana ka qeybgalaya dad aad u faro badan oo ka socday qeybaha bulshada Soomaaliyeed ee UK ku nool, kuwaasi oo si weyn u daneynayay in ay dhegeystaan khudbadda wasiirradda oo ka mid ah wasiirrada ugu firfircoon Xukuumadda Federaalka Soomaaliya.

Wasiirradda oo la hadashay Soomaalida UK ayaa warbixin ka bixisay wasaaradda ay madaxda ka tahay iyo waxyaabihii u qabsoomay muddadii 100-ka maalmood ahayd ee ay jirtay, waxayna sheegtay in ay waxyaabo badan u qabsoomeen, ayna waxqabadkaas buug ahaan u soo saareen.


Waxay sheegtay Wasiirraddu in Wasaaradaha ay metesho oo ah kuwii ay bulshada Soomaaliyeed ugu baahi badnaayeen ay xoogga saartay sidii ay wax looga qaban lahaa baahiyaha aas aasiga ah sida caafimaadka, waxbarashada iyo wixii kale ee adeegyo bulsho ah. Bisha September ee soo socota ayay sheegtay in hal milyan oo Arday ay waxbarasho lacag la’aan ah u dareeri doonaan, iyadoo ardaydaasna ay yihiin kuwo aan waxbarasho helin muddadii 22-ka sano ahayd ee uu burbursanaa dalka Soomaaliya.

Manhajka ardaydaas wax ku baran doonaan oo la mideynayo ayay sheegtay in uu yahay mid Soomaali ah, iyadoo taasina looga gudbi doono manhajyadii kala gedisnaa ay wax looga baran jiray dugsiyo si gaar ah loo leeyahay, waxayna dadka Soomaaliyeed ee dibadaha ku nool ka codsatay in ay gacan ka geystaan soo celinta adeegyadii bulshada haddii ay ahaan lahayd in ay dhaqaale uga qeybqaataan iyo in ay aqoontooda uga qeybqaataan.

Drs. Maryan Qaasim ayaa safarkeeda UK wuxuu noqonayaa midkii ugu horreeyay tan iyo markii loo magacaabay xilka wasaaradahan la isku biiriyay, inkastoo safarkeeda uu ahaa mid gaar ah. Dhanka kalena Drs. Maryan Qaasim ayaa hadal ka jeedin doonta daarta Chatham house.














Ibrahim Omar Baafo, Hiiraan Online
[email protected]
London, UK













Click here
3/5/2013 1:08 PM EST
Talaado, Maarso 05, 2013 (HOL) — Ra'iisal wasaaraha Soomaaliya, Cabdi Faarax Shirdoon ayaa maanta booqday goob maqaaxi ah oo xildhibaanno ka tirsan baarlamaanka ay ku geeriyoodeen, kuwaasoo kala ahaa: Yuusuf Mire Seeraar iyo C/weli Ow-Maxamuud, kadib markii qof waxyaabaha qarxa isku soo xiray uu isku qarxiyay 02, May 2012, xilli ay halkaas xildhibaannadu u joogeen howlo shaqo.

3/5/2013 12:51 PM EST
Talaado, Maarso 05, 2013 (HOL) — Madaxweynaha Soomaaliya, Xasan Sheekh Maxamuud oo safar ku jooga dalka Qatar ayaa khudbad dhinacyo badan taabanaysay ka jeediyay caawa telefishinka Al-jazeera, isagoo markii dambena su’aalo uga jawaabay dadkii dhageysanaya khudbadiisa.

3/5/2013 12:48 PM EST
Tuesday, March 05, 2013 (HOL) - Xilli la sugayo natiijada doorashada ayaa daqiiqado ka hor waxaa xaafada Islii ka dhacay labo qarax oo is daba joog ah.

3/5/2013 11:29 AM EST
Talaado, Maarso 05, 2013 (HOL) — Ra'iisal wasaaraha Soomaaliya, Cabdi Faarax Shir-doon (Saacid) iyo wafdi ballaaran oo uu hoggaaminayo ayna ka mid yihiin guddoomiye ku-xigeenka koowaad ee baarlamaanka, Jeylaani Nuur Iikar, wasiirada arrimaha gudaha, gaashaandhigga, wasiir ku xigeenno, xildhibaanno iyo saraakiil ciidan ayaa gaaray degmada Caabudwaaq ee gobolka Galgaduud.

3/5/2013 10:51 AM EST
Talaado, Maarso 05, 2013 (HOL) — Golaha wasiirrada Puntland oo maanta isugu yimid kulankoodii todobaadlaha ahaa ayaa ka hadlay arimo dhowr ah oo ay kamid yihiin ammaanka, xaaladda abaaraha iyo maamul u sameynta gobollada Jubbooyinka iyo Gedo.

3/5/2013 9:00 AM EST
Talaado, Maarso 05, 2013 (HOL) — Maxkamadda ciidamada qalabka sida ee Puntland - laanteeda gobollada Bari, Karkaar iyo Sanaag- ayaa maanta xukun ku riddey sadex nin oo dhalinyaro ah, kuwaas oo lagu soo eedeeyey in ay ka tirsanaayeen ururka Al-shabaab.

3/5/2013 8:59 AM EST
Talaado, Maarso 05, 2013 (HOL) — Kooxo hubeysan ayaa xalay gurigiisa ka kaxaystay wiil dhallinyaro ah oo lagu magacaabi jiray, Maxamed Nuur Shacbaan oo 20-jir ahaa iyagoo toogtay markii ay guriga u jirsadeen hal KM, iyadoo ku dhuftay rasaas badan oo keentay in lagu aaso halkii lagu dilay.

3/5/2013 7:12 AM EST
Talaado, Maarso 05, 2013 (HOL) — Madaxweynaha Somaliland, Axmed Maxamed Maxamuud Siillaanyo, ayaa maanta qasriga madaxtooyadda ku soo dhoweeyey qaar ka mid ah ardayda dugsiyadda sare ee magaaladda Hargeysa.

3/5/2013 7:08 AM EST
Talaado, Maarso 05, 2013 (HOL) — Dagaalyahanno badan oo Al-shabaab ka tirsan ayaa ku dhintay qarax weyn oo shalay gellinkii dambe si lama filaan ah uga dhacay degmada Buulo-burte ee gobolka Hiiraan, iyadoo aanay jirin wax war ah oo Al-shabaab kasoo baxay.

3/5/2013 6:51 AM EST
Talaado, Maarso 05, 2013 (HOL) — Inta la ogyahay 10-qof oo dhinacyadii dagaalamay ah ayaa ku dhintay tiro intaas ka badanna dhaawacyo ayaa kasoo gaaray dagaal culus oo duleedka degmada Afgooye ku dhexmaray ciidamada dowladda Soomaaliya iyo kuwa Al-shabaab.

3/5/2013 5:05 AM EST
Talaado, March 05, 2013(HOL) - Uhuru Kenyatta ayaa wali hogaaminaya doorashada, isagoo helay 54% codadka la tiriyay oo gaaraya 4 milyan oo cod.

3/5/2013 2:11 AM EST
Talaado, Maarso 05, 2013 (HOL) — Tirinta doorashooyinka madaxnimo ee dalka Kenya ayaa waxaa weli ku horreeya Uhuru Muigai Kenyatta oo u tartamaya isbahaysiga Jubilee, iyadoo uu ku xigo ra’iisul wasaarihii Kenya, Raila Amollo Odinga.

3/5/2013 1:28 AM EST
Talaado, Maarso 05, 2013 (HOL) — Hay’adda xuquuqda aadanaha ee Amnesty International ayaa ugu digtay golaha ammaanka ee Qaramada Midoobay inay cunno-qabteynta hubka ee 21-ka sano saaran Soomaaliya ay ka qaadaan, taasoo xubnaha goluhu ay qorsheynayaan inay go’aan ka gaaraan berri oo Arbaco ah.