3/29/2024
Today from Hiiraan Online:  _
Wararka Maanta- Jimco, Mar 29, 2013
Madaxweyne Xasan Sheekh oo sheegay in Askarigii lagu helo dambi wax laga weydiin doono arrintiisa sarkalkii Xukumayay

Jimco, Maarso 29, 2013 (HOL) — Madaxweynaha Soomaaliya ayaa sheegay inay socdaan baaritaanno ku saabsan eedeymaha ku saabsan in ciidamada dowladda ay dhibaatooyin u geystaan shacabka Soomaaliyeed oo ay ahayd inay difaacaan, isagoo xusay in haddii askari lagu helo dambi wax laga weydiin doono sarkaalkii xukumayay.

Xasan Sheekh Maxamuud ayaa sheegay inay aad uga xun yihiin in askarta dowladda algu eedeeyo inay kufsi iyo dhibaatooyin kale u geystaan dadka shacabka, gaar ahaan kuwa jira xeryaha qoxootiga.

“Waxaa aad loogu eedeeyaa ciidamadeenna inay dhibaatooyin u geystaan shacabka; aad iyo aad ayaana arrintaas uga xunnahay - aad iyo aad ayaan u daba-taagannanay kuwa dhibaatada geysanaya, waayo ciidmada ma ahan in dadkii ay difaaci lahaayeen ay dhibaateeyaan,” ayuu yiri madaxweyne Xasan Sheekh.

Madaxweynuhu wuxuu sheegay in askariga dambiga lagu helo keliya uusan yeelan doonin eedda, balse sarkaalka xukumana la weydiin doono xilliga uu dambiga galay sarkaalka iyo sababtii uu ugu guuleysan waayay inuu ka hor-istaago askarigiisa dambiga uu galay.

Sidoo kale, madaxweynuhu wuxuu sheegay in tallaabada ay qaadayaan aysan ahayn oo keliya ciqaab, balse ay askarta u sameyn doonaan tababarro ku saabsan sidii loo bari lahaa asluubta iyo dhowrista xuquuqda Aadanaha.

“Ciidamadeenna waan siin doonaa tababarro lagu horumarinayo waajibaadka askariga, waxbarasho iyo inay dhowraan xuquuqda aadaanaha, taasoo aan rajeynayno inay wax badan ka bedesho askariga,” ayuu yiri Xasan Sheekh.

Dhanka kale, madaxweynaha Soomaaliya wuxuu sheegay in haweenka ay yihiin sharafta shacabka Soomaaliyeed, aysanna ogolaan karin inay si cad ugu ciyaaraan sharaftas koox yar oo xumaatay, isagoo guud ahaan dadka Soomaaliyeed ugu baaqay inay qaybtooda ka qaataan ilaalinta xuquuqda aadanaha iyo dhowrista haweenka Soomaaliyeed.

Ugu dambeyn, madaxweynuhu wuxuu sheegay in xukuumaddu aysan aqbali doonin in horjoogayaasha kaamamku ay dhibaatooyin u geystaan dadka ku jira xeryaha barakacayaasha, markii madaxda dowladdu ay u tagaanna ay muujiyaan wanaag, markii laga soo tagana ay dadka meelo ku xareystaan ayna dhibaateeyaan.

Maxamed Xaaji Xuseen, Hiiraan Online
[email protected]
Muqdisho, Soomaaliya













Click here
3/29/2013 3:44 PM EST
Khamiis, Maarso 28, 2013 (HOL) - Duqa magaalada Ottawa ee dalka Kanada Jim Watson oo ay wehliyaan xubno ka tirsan madaxda degaanada magaalada Ottawa ayaa guddoonsiiyey Fartuun Cabdisalaam Adan abaalmarin ay ku muteysatay howlaha sama-falka oo ay ka waddo magaalada Moqdisho. Xafladdaas oo ay soo abaabuleen hay'adda "City for All Women Initiative" laguna qabtay xaruunta magaalada Ottawa (City Hall)

3/29/2013 2:32 PM EST
Jimco, Maarso 29, 2013 (HOL) — Madaxweynaha Soomaaliya, Xasan Sheekh Maxamuud ayaa maanta safar shaqo ku tagay dalka Imaaraadka Carabta oo ka mid ah dalalka ku yaalla Khaliijka Carabta, isagoo caawa wadahadallo la yeeshay dhaxal-sugaha dalkaas, Maxamed Bin Zayed Al-Nahyan, iyagoo uga hadlay kulankooda arrimo la xiriira: ammaanka, dib u heshiisiinta harumarka iyo siyaasadda.

3/29/2013 1:29 PM EST
Jimco, Maarso 29, 2013 (HOL) — Roobabkan oo billowday saqdii dhexe ee xalay oo socday illaa barqonimadii maanta ayaa waxay ka da’een deegaanno iyadoo degaannadaas ay kasoo baxayaan in roobabku ay geysteen khasaare isugu jirta naf iyo maal.

3/29/2013 12:49 PM EST
Jimco, Maarso 29, 2013 (HOL) — Ra'iisul wasaaraha Soomaaliya, Cabdi Faarax Shirdoon (Saacid) iyo wafdigii uu hoggaaminayay oo gellinkii dambe ee maanta dib ugu soo laabtay Muqdisho, ayaa warbaahinta uga warbixiyay natiijada kasoo baxday wadahalladii Kismaayo iyo kulamadii uu la qaatay qaybaha kala duwan ee bulshada Kismaayo.

3/29/2013 10:29 AM EST
Jimco, 29 Maarso, 2013(HOL) :- Ciidamo aad u tiro badan oo katirsan dowladda Soomaaliya islamarkaasina mudooyinkii u danbeeyay ku sugnaa duleedka magaalada ayaa maanta gudaha usoo galay magaalada Kismaayo, iyadoona ciidamadani la dajiyay saldhigyo ku yaal gudaha magaalada.

3/29/2013 10:13 AM EST
Jimco, 29 Maarso, 2013(HOL) - Wafdigii uu hogaaminayay ra’isul wasaaraha dowladda Federaalka Soomaaliya ee maalmihii ugu danbeeyay ku sugnaa magaalada Kismaayo ayaa maanta dib ugu laabtay magaalada Muqdisho ee caasimadda dalka Soomaaliya.

3/29/2013 3:47 AM EST
Jimco, Maarso 29, 2013 (HOL) — Xaflad ballaaran oo lagu sagootinayey 135 arday oo ka qalin jebiyey fasalka afraad ee dugsiga sare ayaa shalay galab ka dhacday xarunta dugsiga sare Imaamu Shaafici ee magaalada Boosaaso.

3/29/2013 3:05 AM EST
Jimco, Maarso 29, 2013 (HOL) — Ururka Qaranka Suxufiyiinta Soomaaliyeed ee NUSOJ ayaa soo dhaweeyay xukunkii ay maxkamadda ciidamada ku ridday gacan ku dhiiglihii dilay wariye Xasan Yuusuf Absuge, iyadoo xoghayah guud ee NUSOJ, Cumar Faaruuq uu xukunkaas ku tilmaamay mid hoos u dhigaya dilalka loo geystay suxufiyiinta Soomaaliyeed.

3/29/2013 2:29 AM EST
Jimco, Maarso 29, 2013 (HOL) — Wadahadalladii u dhexeeya xukuumadda Soomaaliya iyo maamulka KMG ah ee Kismaayo ayaa guul-darro ku dhammaaday kaddib markii la isku fahmi waayay wadahadallo socday shantii maalmood ee lasoo dhaafay.

3/29/2013 1:58 AM EST
Jimco, Maarso 29, 2013 (HOL) — Dhallinyaro kooxo-kooxo u abaabulan ayaa la sheegay inay dhibaatooyin isugu jira dhac iyo kufsi ka geystaan xilliyada habeenkii ah magaalada Hargeysa ee xarunta Somaliland, iyadoo taliyaha booliiska uu sheegay inay xirxireen kooxo kuwaas ka mid ah.

3/29/2013 1:42 AM EST
Jimco, Maarso 29, 2013 (HOL) — Madaxweynaha Soomaaliy, Xasan Sheekh Maxamuud ayaa sheegay inay rajeynayaan inay helaan hubkii ugu horreeyay tan iyo markii laga qaaday cunno-qabateyntii hubka ee saarnayd Soomaaliya in ka badan 20 sano, si ay u xoojiaan ciidamadooda dagaalka kula jira Al-shabaab.