3/19/2024
Today from Hiiraan Online:  _
Wararka Maanta- Jimco, July 12, 2013
Ururka Siyaasadeedka Wadajir oo Maanta sheegay inuusan ka Qayb-gelayn Doorashooyinka Golayaasha Deegaanka Puntland


Jimco, July 12, 2013 (HOL) — Urur-siyaasadeedka Wadajir oo kamid ah 6-da urur-siyaasadeed ee Puntland ayaa maanta shaaciyey in uusan ka qayb geli doonin doorashada goleyaasha deegaanka ee Isniinta soo socota la filayo in ay ka qabsoonto deegaanada Puntland.

Madaxda ugu sareysa ururka oo maanta shir-jaraa'id ku qabtay xafiiskooda magaalada Garoowe ayaa sheegay in kaddib markii ay qiimeeyeen arrimo badan ay isla qaateen in aysan ka qayb gelin doorashada soo socota.

Axmed Ibraahim Cawaale oo ah xog-hayaha guud ee ururka Wadajir ayaa ugu horeyn goobta ka hadlay, wuxuuna tilmaamay in kaddib markii ay darseen xaaladda siyaasadeed ee Puntland ay usoo baxday in doorashadu aysan qaabkii loogu tala galay u dhici doonin, sidaas darteedna ay qaadaceen ka qaybgal keeda.

"Waxan halkan idiinku yeernay inaad makhraanti ka ahaataan inaanan ka tanaasulnay doorashooyinkii Puntland...markii aan wax badan darisnay waxa hadda socda iyo xaalada ay Puntland ku sugan tahay waxan go'aan ku gaarnay inaanan ka qayb gelin doorashooyinka dhacaya.." Mudane Cawaale ayaa yiri.

Guddoomiye ku-xigeenka ururka Luul Jaamac Aw-nuur ayaa iyaduna shirkaas jaraa'id ka sheegtay in ururkoodu uu kamid yahay kuwa ugu taageerada badan, sababta ay doorashada u qaadaceenna aan loo fahmi karin in ay taageero badan waayeen.

Arrintan ayaa kusoo aadeysa xilli labo maalmood keliya ay ka harsan yihiin wakhtiga ay dhici doonto doorashada goleyaasha deegaanka, kaas oo ah maalinta isniinta ee ay taariikhdu ku beegan tahay July 15, 2013.

Horay doorashada goleyaasha deegaanka Puntland waxaa u qaadacay dhowr urur-siyaaseed inkasta oo ay qaarkood dib go'aankaas uga laabteen. Ururka Wadajir ayaa labeynaya urur-siyaasadeedka Midnimo oo isagu mar sii horeysey shaaciyey in uusan ka qaybgeli doonin doorashada goleyaasha deegaanka Puntland oo ah tii ugu horeysey ee nooceeda ah ee ka dhacda Puntland.

Maxamed Salaad Xaaji Dirir, Hiiraan Online
[email protected]
Puntland, Soomaaliya













Click here
7/12/2013 3:15 PM EST
Jimco, July 12, 2013 (HOL) — Madaxweynaha Somaliland Mudane Axmed Maxamed Maxamuud (Siilaanyo), ayaa xadhiga ka jaray idaacad cusub oo FM ah oo khaas u ah quraanka karriimka iyo Axaadiista Nabiga NNKHA oo lagu soo kordhiyay idaacadda Radio Hargeysa.

7/12/2013 1:20 PM EST
Jimco, July 12, 2013 (HOL) — Sideed sano ayaa kasoo wareegtay markii kooxo hubeysan ay xalay oo kale ku toogteen gurigiisa oo ku yaalay degmada Wadajir C/qaadir Yaxye Sheekh Cali oo ka mid ahaa mas’uuliyiintii hay’adda cilmi-baarista iyo wadashiga CRD.

7/12/2013 12:40 PM EST
Jimco, July 12, 2013 (HOL) — Ra,iisal wasaaraha Soomaaliya, Cabdi Faarax Shirdon (Saacid) ayaa cambaareeyay weerarkii is-miidaaminta ahaa ee lala beegsaday gellinkii dambe ee maanta gaadiid ay wateen ciidamada AMISOM, isagoo tacsi u diray dhamaan qoysaskii dadkii rayidka ahaa ee wax-yeelladu kasoo gaartay weerarkaas.

7/12/2013 11:47 AM EST
Jimco, July 12, 2013(HOL)—Suxufiyiinta Soomaaliyeed ayaa sheegay in Dowladda Soomaaliya ay meel marisay sharci qabyo qoraal ah, kaasi oo ay u arkayaan in uu yahay mid xaaladda ku sii adkeyn doona warfidiyeennada Soomaaliyeed oo xaalado ka dhan ah xuquuqdooda aas-aasiga ah la kulmayay sanadihii aynu ka soo gudubnay.

7/12/2013 10:29 AM EST
Jimco, July 12, 2013(HOL) :- Shir maanta ka dhacay xarunta jaamacadda Kismaayo islamarkaana ay goobjoog ka ahaayeen madaxda ugu sareeysa maamulka Jubbaland iyo ergadii soo dhistay maamulka ayaa waqti kordhin loogu sameeyay madaxweeynaha maamulka si uu u soo dhameystiro qeybaha ka dhisman maamulka.

7/12/2013 9:12 AM EST
Jimco, July 12, 2013 (HOL) — Inta la ogyahay shan ruux oo ka mid ah kuwii uu dagaalku u dhexeeyay ayaa ku dhintay sagaal kalena dhaawacyo ayaa ka soo gaaray dagaal ciidamada dowladda Soomaaliya iyo kuwa Al-shabaab ku dhexmaray manta degmada Awdheegle ee gobolka Shabeellada Hoose.

7/12/2013 8:47 AM EST
Jimco, July 12, 2013 (HOL) — Weerar Ismiidaamin ah ayaa goor dhow lala beegsday gaadiid ay wateen ciidamada AMISOM oo marayay agagaarka xarunta hay’adda UNDP ay ku leedahay Muqdisho, iyadoo weerarkaas ay ka dhasheen khasaarooyin isugu jira dhimasho iyo dhaawac.

7/12/2013 8:42 AM EST
Jimco, July 12, 2013 (HOL) — Koox dabley ah ayaa xalay abbaare 12:kii habeennimo jidka u galay gaari nooca xamuulka qaada ah oo ka tegey magaalada Boosaaso, kaas oo marayey inta u dhexeysa tuulooyinka Kalabery iyo Kob-dhexaad oo qiyaastii 70km magaalada Boosaaso bariga ka xiga.

7/12/2013 4:57 AM EST
Jimco, July 12, 2013 (HOL) — Jaaliyadda Soomnaaliyeed ee ku nool xarunta labaad ee dalka Britain ee Birmingham ayaa xaflad soo dhaweyn ah xalay u sameeyay wafdi xildhibaanno ah oo uu hoggaaminayay guddoomiye ku xigeenka labaad ee baarlamaanka Soomaaliya, Mahad Cabdalla Cawad oo socdaal shaqo ku jooga Britain.

7/12/2013 4:13 AM EST
Jimco, July 12, 2013 (HOL) — Madaxweynaha Puntland C/raxmaan Sheekh Maxamed Faroole ayaa ugu baaqay shacabka ku nool Puntland inay ka qayb-qaataan doorashooyinka golaha deegaanka oo billaaban doona Isniinta soo socota oo ku beegan 15-ka bishan July.