3/19/2024
Today from Hiiraan Online:  _
Wararka Maanta- Jimco, Feb 22, 2013
Hay'adda HRW oo uga digtay Dowladda Netherlands inay Qoxootiga Somalida ah ee dalkeeda ku nool ay dib u celiso


Jimco, Feberaayo 22, 2013 (HOL) — Hay’adda xuquuqda aadanaha ee Human Rights Watch oo fadhigeedu yahay dalka Mareykanka ayaa uga digtay xukuunadda Netherlands ama Holland in qoxootiga Soomaalida ah ee dalkeeda ku nool oo ay magangalyada u diidday inay dib ugu celiso Soomaaliya.

Warbixin ay ha’yaddu soo saartay ayay ku sheegtay in Soomaaliya ay weli ka jirto xaalad khatar ah, iyadoo xustay in Al-shabaab ay weli ka taliyaan dhul ballaaran ayna khatar ku hayaan dadka shacabka ah.

“Soomaaliya weli waa dhul halis ah oo aan cago adag ku taagnayn oo kooxo hubeysan sida Al-shabaab ay qamaaamayaan oo khatar aan la saadaalin karin iyo halis aan cidna loo aabbo yeelayn ay ku hayaan dadka shacabka ah,” ayaa lagu yiri warbixinta HRW.

Hay’addu waxay sheegtay in xilligan aan dadka magan-galyo doonka ah lagu celin karin gudaha Soomaaliya, maadaama aanu jirin ammaan dhab ah oo la isku halleyn karo khatarta Al-shabaabna ay weli muuqato.

Dowladda Holland ayaa waxay laba sano ka hor joojisay siyaasadeedii ahayd inay qoxootiga aan sharciga lahayn dib ugu celiso Soomaaliya, balse bishii December ee sannadkii hore wasaaradda garsoorka ee Netherlands waxay warqad u dirtay baarlamaanka taasoo ay ku sheegayso in Soomaaliya ay tahay ammaan laguna celin karo qoxootiga.

Inkastoo dowladda Soomaaliya ay horumar dhinaca ammaanka ah sameysay lixdii bilood ee ay jirtay ayaa haddana HRW waxay leedahay Al-shabaab weli dhul ballaaran ayay ka talisaa, waxayna beegsanaysaa dadka shacabka ah iyagoo ku sheegaya inay jaajuusiin u yihiin dowladda.

Labadii qof ee ugu horreysay ee la doonayay in dib loogu celiyo Soomaaliya ayaa la doonayay in toddobaadka lasoo qaado, balse daqiiqadihii ugu dambeeyay ayaa waxay maxkamadi xukuntay in la joojiyo safarka, kaddib markii labada qof ay rafcaan ka qaateen xukunkooda musaafurinta ah.

Dalka Holland ayaa noqonaya dalkii ugu horreeyay oo ka tirsan Midowga Yurub oo go’aansada inay dib u celiso Qoxootiga Soomaalida ah dalkooda, iyadoo hay’adda HRW ay sheegtay inay hayso warbixinno sugan oo ay ku doonayaan dalalka Sweden, Denmark iyo Britain inay qoxootiga dib ugu celiyaan Soomaaliya.

Maxamed Xaaji Xuseen, Hiiraan Online
[email protected]
Muqdisho, Soomaaliya













Click here
2/22/2013 2:00 PM EST
Jimco, Feberaayo 22, 2013 (HOL) — Doorashadii baarlamaaniga ee dalka Jabuuti ayaa lasoo gabgabeeyay fiidnimadii caawa, kaddib markii hal saac oo dheeri lagu kordhiyay codbixinta oo lagu waday inay soo xiranto 6:00 maqribnimo ee maanta.

2/22/2013 12:42 PM EST
Jimco, February 22, 2013(HOL): Ibraahim Nuur Qalinle oo ka mid ah Soomaalida ku nool waddanka Sweden, gaar ahaan Magaalada Goteborg ayaa isagoo ku sugan magaalada Muqdisho ee caasimadda dalka Soomaaliya waxaa uu la hadlay TV-ga Sweden ee SVT, wuxuuna sheegay in Soomaali badan oo caalamka daafihiisa ku nool ay ku fekerayaan in ay ku laabtaan dalkooda hooyo ee Soomaaliya.

2/22/2013 12:20 PM EST
Jimco, Feberaayo 22, 2013 (HOL) — Mudaharadayaal careysan ayaa cagta mariyay habeenkii xalay ahaa guriga uu degmada Boorame ka deggenaa guddoomiye ku xigeenkii gobolka Awdal, Cabdinuur Sugaal iyo guri uu deggenaa aabbihii oo labaduba ku yaalla hal xaafad.

2/22/2013 12:11 PM EST
Jimco, Feberaayo 22, 2013 (HOL) —Ciidammo boolis ah ayaa habeen hore fiidkii gudaha u galay xarunta telefsihinka RAYO-TV iyagoo albaabbada u laabay xaruntii telefishan uu ku lahaa magaalada Boorame, iyadoo shacab ka careysan xarigaas ay xalay mudaaharaad ka dhigeen magaaladaas.

2/22/2013 11:57 AM EST
Jimco, Feberaayo 22, 2013 (HOL) — Mas’uuliyiin u kala hadlay dowladda Soomaaliya iyo Turkiga ayaa shaaca ka qaaday in Soomaali badan oo doonaya inay galaan dalalka Yurub ay baasaboorro faalso ah ama la been abuuuray ay ku raacaan diyaaradda Turkish Airlines oo ah diyaaradda keliya ee duulimaadyo caalami ah ku tagta Muqdisho.

2/22/2013 11:20 AM EST
Jimco, Feberaayo 22, 2013 (HOL) — Wafdi uu hoggaaminayo ra’iisul wasaare ku xigeenka dalka Turkiga, Barker Buzdag oo uu ka mid yahay wasiirka horumarinta dalkaas, Cevdet Yilmaz ayaa berri safar ku imaanaya magaalada Muqdisho ee xarunta Soomaaliya.

2/22/2013 2:28 AM EST
Jimco, Feberaayo 22, 2013 (HOL) — Xukuumadda Federaalka Soomaaliya ayaa sheegtay in ammaanka magaalada Muqdisho ee caasimadda dalka Soomaaliya uu yahay mid aad uga wanaagsan sidii uu ahaan jiray, waxayna xukuumaddu Sheegtay in magaaladu uu ka soconayo horumar iyo ganacsi baaxad leh.

2/22/2013 1:46 AM EST
Jimco, Feberaayo 22, 2013 (HOL) — Safaaradda Soomaaliya ee Koonfur Afrika ayaa ku guuleystay inay fasaxdo dad doonayay inay dib ugu laabtaan dalkooda hooyo ee Soomaaliya, kuwaasoo xayirnaa muddo ka badan seddex bilood kaddib markii waaxda socdaalka ee dalka Koonfur Afrika joojisay safarkooda.

2/22/2013 1:07 AM EST
Jimco, Feberaayo 22, 2013 (HOL) — Ciidamo gaar ah oo loo yaqaan RRU iyo kuwa nabadsugidda Somaliland ayaa ka billaabay xilliyada magaalada Hargeysa xiliyada habeenkii ah howgallo lagu sugayo ammaanka, kuwaasoo ay ku qab-qabteen dad badan oo shacab ah.

2/22/2013 1:06 AM EST
Jimco, Feberaayo 22, 2013 (HOL) — Guddoomiyaha baarlamaanka Somalia, Prof. Maxamed Sheekh Cismaan Jawaari ayaa safar shaqo oo qaadanaya muddo saddex maalmood ah ku tagay dalka Kenya, kaddib hal toddobaad oo uu booqasho ku joogay dalka Itoobiya, iyadoo lagu wado inuu la kulmo madaxda dalkaas.

2/22/2013 1:01 AM EST
Jimco, Feberaayo 22, 2013 (HOL) — Dalka Jabuuti ayaa waxaa saakay ka billowday doorashada baarlamaaniga ah ee dalkaas, iyadoo shacabku ay soo dooranayaan 65-ka xidhibaan ee uu ka kooban yahay baarlamaanka Jabuuti.