2014-07-29
Today from Hiiraan Online:  _
Wararka Maanta- Axad, Sept 15, 2013
Shil Gaari oo dhimasho iyo dhaawac ay kasoo gaartay 35 ruux oo Maanta ka dhacay Duleedka Degmada Buulo-burte


Axad, September 15, 2013 (HOL) — Ugu yaraan shan qof ayaa ku geeriyooday 30 qof oo kalena wy ku dhaawacmeen shil gaari oo ka dhacay duleedka degmada Buulo-burte ee gobolka Hiiraan.

Dadka dhintay iyo kuwa dhaawacmay ayaa waxay ahaayeen rakaabkii la socday gaariga, kaasoo kasoo ambabaxay deegaanka Halgan, kuna soo jeedey magaalada Muqdisho.

Isbitaalka degmada Buulo-burte ayaa la geeyay dadkii dhaawacmay iyo kuwii dhintay, iyadoo dhakhaatiirta isbitaalkaas ay sheegeen inay xaalado kala duwan ku sugan yihiin dadkii dhaawacyadu soo gaareen.

Howl-wadeennada isbitaalka Buulo-burte ayaa sheegay in dadweynaha ku nool degmadaas ay dhiig u shubeen dadkii dhaawacyadu soo gaareen oo qaarkood dhaawacyo halis ah qabay lagu sameeyey qaliinno kala duwan.

Saraakiil u hadlay Al-shabaab oo gacanta ku haysa degmadaas oo booqday isbitaalka ayaa sheegay in dhaawacyada dadkan qaarkood ay yihiin kuwo aad halis ah u ah, balse ma aysan sheegin in loo qaadayo Muqdisho iyo in kale.

Ma ahan markii ugu horreysay oo shil khasaaran oo kale geystey uu ka dhaco gobolka Hiiraan, balse wuxuu noqonayaa kii ugu horreeyay sannadkan oo uu ka dhasho khasaare intan le’eg.

Rogmashada gaadiidka xamuulka ah ayaa inta badan loo aaneeyaa inay sababto xamuulka oo aad looga badiyo iyo waddooyinka oo burbursan, iyadoo maydadka dadkii ku dhintay shilkaas isla maanta lagu aasay degmada Buulo-burte.

Maxamed Xaaji Xuseen, Hiiraan Online

maxuseen@hiiraan.com
Muqdisho, Soomaaliya





Post your comments

2013-09-15 3:10 PM EST
Axad, September 15, 2013 (HOL) — Dajire Nicholas Kay oo ah wakiilka gaarka ah ee u qaabilsan Qaramada Midoobay Soomaaliya ayaa sheegay in shirka Somalia loogu qabanayo magaalada Brussels ee dalka Belgium uu yahay mid muhiimad weyn u leh Soomaaliya uuna ka duwan yahay shirarkii horay loogu qaban jiray.

2013-09-15 12:43 PM EST
Axad, September 15, 2013 (HOL) — Madaxweynaha Somaliland, Axmed Maxamed Maxamuud (Silaanyo), ayaa maanta xadhiga ka jaray, qaar kalana dhagax dhigay mashaariic fara badan oo laga hirgaliyey magaaladda Berbera ee gobolka Saaxil.

2013-09-15 11:56 AM EST
Axad, September 15, 2013 (HOL) — Kulan uu baarlamaanka Soomaaliya ku yeelan lahaa maanta xaruntiisa Muqdisho ayaa baaqday kaddib markii ay iman waayeen xildhibaannadii uu ku furmi lahaa kooramka, iyadoo mid ka mid ah mudanayaasha baarlamaanka uu ka hadlay arrintan.

2013-09-15 11:37 AM EST
Axad, September 15, 2013 (HOL) — Magaalada Baydhabo ee xarunta u ah gobolka Bay ayaa waxaa ka socda abaabulka dibadbax looga soo horjeedo shirka shirka Brussels ka furmaya, kaasoo lagu wado inuu berri magaaladaas ka dhaco.

2013-09-15 11:21 AM EST
Axad, September 15, 2013 (HOL) — Shirkadda SKA Air & Logistic oo haysay garoonka maamulka Muqdisho saddexdii sano ee lasoo dhaafay ayaa maanta ku wareejisay howlaha garoonka iyo maamulkiisa shirkad lagu magacaabo FAVORI LLC oo laga leeyahay dalka Turkiga, taasoo dib u habeyn ku sameyn doona garoonka.

2013-09-15 11:20 AM EST
Axad, September 15, 2013 (HOL) — Wasiirka arrimha gudaha iyo amniga Qaranka, C/kariin Xuseen Guuleed iyo xubno wasiirro ah ayaa kormeer ku sameeyay maanta mashruuca dowladda Turkiga ay ka waddo magaalada Muqdisho kaasoo lagu dayactirayo waddooyinka muhiimka ah, isagoo uga mahadceliyay dowladda Turkiga howsha dayactirka ah ee ay waddo.

2013-09-15 11:20 AM EST
Axad, Sebtember 15, 2013 (HOL)-Kulan looga hadlayey sidii loo adkeyn lahaa ammaanka gobolka Mudug aya maanta ka dhacay magaala madaxda gobolkaas ee Gaalkacayo.

2013-09-15 10:47 AM EST
Axad, September 15, 2013 (HOL) —Dowladda Soomaaliya ayaa maanta xabsiga dhigtay, Sheekh C/qaadir Maxamed Soomoow oo ka mid ahaa culummada Ahlusunna waljamaaca garabkooda Muqdisho, iyadoo aan la ogeyn sababta ramsi ah ee loo xiray.

2013-09-15 10:25 AM EST
Axad, September 15, 2013 (HOL) — Madaxweynaha Somalia, Xasan Sheikh Maxamud iyo wafdi heer sare ah oo uu hoggaaminayo ayaa maanta gaaray magaalada Brussels ee xarunta dalka Belgium, halkaasoo uu maalinta berri ah ka furmayo shirka higsiga cusub ee Soomaaliya.

2013-09-15 10:15 AM EST
Axad, Sebtember 15, 2013 (HOL)- Wefdi uu horkacayo madaxweynaha Puntland C/raxmaan Sheekh Maxamed (Faroole) ayaa maanta gaarey xarunta dalka Biljamka ee Brusells, halkaasoo uu berri ka furmayo shirka New Deal ee looga hadlayo sanadkan dib-u-dhiska dalka Soomaaliya.

2013-09-15 3:49 AM EST
Axad, September 15, 2013 (HOL) — Shirkad laga leeyahay dalka Turkiga oo lagu magacaabo FAVORI LLC ayaa maanta si rasmi ah ula wareegaysa gacan ku haynta maamulka garoonka diyaaradaha caalamiga ah ee Muqdisho, iyadoo xilka kala wareegaysa shirkadda SKA Air & Logistic oo saddexdii sano ee lasoo dhaafay haysay maamulka garoonka diyaaradaha.

2013-09-15 3:27 AM EST
Axad, September 15, 2013 (HOL) — Wasiirka wafaafinta dowladda Somalia, C/llaahi Ciilmooge Xirsi ayaa si caro leh uga jawaabay qoraal lagu baahiyay qaar ka mid ah war-baahinta Soomaalida, isgaoo qoraalkaas ku tilmaamay mid been abuur ah.

2013-09-15 2:29 AM EST
Axad, September 15, 2013 (HOL) — Madaxweynaha dowladda Soomaaliya, Xasan Sheekh Maxamuud iyo wafdi ballaaran oo uu hoggaaminayo ayaa xalay u ambabaxay magaalada Brussels ee dalka Belgium, halkaasoo lagu wado in maalinta berri ah uu ka furmo shir looga hadlayo dib u dhiska dalka Soomaaliya.