2014-09-02
Today from Hiiraan Online:  _
Wararka Maanta- Sabti, Sept 14, 2013
Midowga Yurub oo rajo-weyn ka qaba in shirka Soomaaliya loogu qabanayo Brussels uu horseedi doono dib u dhiska Somalia



Sabti, September 14, 2013 (HOL) — Dowladda Soomaaliya iyo dalalka deeq-bixiyeyaasha ah ayaa lagu wadaa inay maalinta Isniinta ah ee soo socota ku saxiixaan magaalada Brussels ee xarunta dalka Belgium heshiis ku saabsan dib u dhiska Soomaaliya oo socon doona muddo saddex sano ah, iyadoo ay saraakiisha Midowga Yurub sheegeen in dib u dhiskaas ay ku bixi doonto in ka badan hal bilyan oo EURO.

Shirka Brussels ayaa rajeynayaa inuu fure u noqdo dib u soo celinta amniga Soomaaliya 22-sano oo colaado sokeeye iyo deggenaasho la’aan ka jirtay tan iyo markii xukunka laga tuuray dowladdii dhexe ee Soomaaliya 1991-kii.

Nick Westcott oo ah sarkaal ka tirsan Midowga Yurub isla markaana ah mid qaalbsan arrimaha Afrika ayaa sheegay in shirka Isniinta furmaya uu yahay mid salka u dhigaya siyaasadda iyo dib u dhiska Soomaaliya.

“Waxaan billaabaynaa si aan u aragno 20-sano oo colaado ah kaddib dalka Soomaaliya oo u dhaqaaqay sidii uu dib ugu dhismi lahaa,” ayuu Westcott u sheegay wariyeyaal uu kula hadlayay xarunta Midowga Yurub ee Brussels.

28-ka dal ee Midowga Yurub uu ka kooban yahay ayaa ah kuwa ugu badan ee gargaarka siiya Somalia iyo ciidamada AMISOM ee ku sugan Soomaaliya, kuwaasoo dowladda Somalia ka caawinaya dagaallada ay kula jirto xoogagga Al-shabaab ee xukuumadda Soomaaliya ka horjeeda.

Madaxweynaha Soomaaliya, Xasan Sheekh Maxamuud iyo beesha calaamka ayaa lagu wadaa inay Isniinta saxiixaan heshiiska higsiga cusub (New Deal), iyadoo heshiiskan qodobbada uu diiradda saarayo ay ka mid yihiin amniga, siyaasadda, cadaaladda, dhaqaalaha iyo howlaha kale ee dowladda.

Deeq-bixiyeyaasha caalamka ayaa bixinaya dhaqaalaha dib loogu dhisayo dalka Soomaaliya, iyadoo heshiiskan ay dowladda Soomaaliya ku sheegtay mid ay rajeynayso inuu hagi doono deeqaha ay calaamka ka hesho.

Saraakiisha Midowga Yurub ma aysan sheegin dhaqaalaha la filayo shirkaas lagu ballanqaado, balse il wareed ka tirsan Midowga Yurub ayaa dhaqaalaha ay rajeynayaan in shirkan lagu ururiy uu yahay mid ka badan hal billion oo EURO oo lacagta Midowga Yurub ah.

Shirka Brussels ayaa waxaa ka qaybgalaya in ka badan 50 ergay, kuwaasoo ka kala socda dalalka Afrika, Mareykanka, Japan, Shiinaha, dalalka ku yaalla Khaliijka Carabta iyo sidoo kale kuwa Midowga Yurub.

Sidoo kale, Soomaaliya waxay maalinta Isniinta ah ku biiri doontaa heshiiska CONTONOU, kaasoo ah heshiis ka dhexeeyay dalalka Afrika, kuwa Yurub iyo kuwa baasifigga loo yaqaan.

Midowga Yurub ayaa horay u ballanqaadday inay Soomaaliya siinayso lacag dhan 1.2 bilyan oo EURO inta u dhexeysa sanadaha 2008 illaa 2013. Iyadoo sidoo kale ka fulisay Soomaaliya mashaariic kala duwan oo ay ku xoojinayso ammaanka, kuwaasoo ay ka mid yihiin howlgalka la dagaalanka- burcad-badeedda iyo tababarrada la siinayo ciidamada milateriga Soomaaliya.

Maxamed Xaaji Xuseen, Hiiraan Online
maxuseen@hiiraan.com
Muqdisho, Soomaaliya





Post your comments

2013-09-14 3:02 PM EST
Sabti, September 14, 2013(HOL) :- Sakariye Yaquub Cabdi waa Wiil 4 sano jir ah ,waxuuna dhashey sanadkii 2010kii,isagoona ku dhashey Magaalada Luuq ee Gobolka Gedo,waxuuna tan iyo markii uu dhashey uu la xanuunsan yahay Cudurka Neerfaha oo jirkiisa oo dhan saameeyey,mana fadhiisan karo,waxaana dhibaya wax cunista waxa keliya ee uu isticmaalo ayaa ah Caanaha oo cabitaankooda ay ku adagtahay.

2013-09-14 1:44 PM EST
Sabti, September 14, 2013 (HOL) — Xarakada Al-shabaab oo dowladda kula jirta dagaal ayaa ka hadashay shir ay culummada Soomaaliyeed Muqdisho kusoo gabgabeeyeen, shirkaas oo laga soo saaray fadwo ka dhan ah ururka Al-shabaab.

2013-09-14 11:49 AM EST
Sabti, September 14, 2013 (HOL) — Fannaanada weyn ee Soomaaliyeed, Hibo Maxamed Gudoon (Hibo Nuura) ayaa maanta xaflad soo dhaweyn ah oo weyn loogu sameeyay xarunta Rugta ganacsiga Soomaaliyeed, iyadoo kulan la qaadatay mas’uuliyiinta rugta.

2013-09-14 11:19 AM EST
Sabti, September 14, 2013 (HOL) — Madaxweynaha Somaliland Md. Axmed Maxamed Maxamuud (Siilaanyo) ayaa maanta xadhiga ka jaray dugsiga Tobabarka Saraakiisha Ciidamadda Militariga Somaliland ee Dararweyne ee gobolka Maroodi-jeex.

2013-09-14 9:42 AM EST
Sabti, September 14, 2013 (HOL) — Hay’adda samafalka Hormuud Telecom Foundation ayaa iyadoo ka jawaabaysa codsiga qaar ka mid xoogsatada ku xamaalata gaari-gacannada ayaa 40 ruux oo ka mid ah waxay u qaybisay gaari-gacanno ay ku shaqeystaan.

2013-09-14 8:47 AM EST
Sabti, September 14, 2013 (HOL) — Saraakiil ka socta ciidamada booliiska howlgalka midowgga Africa AMISOM oo maanta gaaray magaalada Beledweyne ayaa kulamo kala duwan waxaa ay la qaateen mas'uuliyiinta maamulka gobolka, saraakiisha ciidamada booliiska maamulka iyo kuwa Jabuuti ee howlgalka Midowga Afrika ee AMISOM.

2013-09-14 8:37 AM EST
Sabti, September 14, 2013 (HOL) — Iskaashatada gaadiidka BL-ka ee gobolka Bari, ayaa cabasho xooggan ka muujiyey ammarro ay dhowaan si wada jir ah usoo saareen wasaaradaha amniga; howlaha guud iyo gaadiidka iyo taliska ciidamada booliska ee Puntland.

2013-09-14 8:30 AM EST
Sabti, September 14, 2013 (HOL) — Wafdi uu horkacayo hogaamiyamaha maamulka KMG ah ee Jubba, Sheekh Axmed Maxamed Islaam (Sh. Axmed Madoobe) ayaa maanta ka duulay magaalada Kismaayo, waxaana wafdiga uu kusii jeeda magaalada Nairobi halkaasoo la filayo inuu uga sii ambabaxo magaalada Brussels ee dalka Biljimka.

2013-09-14 8:30 AM EST
Sabti, September 14, 2013 (HOL) — Kulan lagu taageerayay fatwadii laga soo saaray shirkii culumaa'uddiinka Soomaaliyeed ayaa maanta ka dhacay magaalada Muqdisho, iyadoo lagu dalbaday in la dhaqan-gelinayo qodobadii kasoo baxay shirkii culummada ee shanta maalmood socday Muqdisho.

2013-09-14 7:56 AM EST
Sabti, September 14, 2013 (HOL) — Ra’iisul wasaaraha Soomaaliya, Cabdi Faarax Shirdoon (Saacid) ayaa si weyn u cambaareeyay qaxayadii dhacaan ka dhacay magaalada Muqdisho iyo Kismaayo ee ay dadka badan naftooda ku waayeen, isagoo ku tilmaamay inay ahaayeen kuwo axmaqnimo ah oo lagu dilay dad shacab ah.

2013-09-14 3:16 AM EST
Sabti, September 14, 2013 (HOL) — Ergayga Qaramada Midoobay ee arrimaha Samalia, Nicholas Kay oo la hadlayay xubnaha golaha ammaanka ee Qaramada Midoobay Khamiistii lasoo dhaafay ayaa amaanay horumarka ay ku tallaabsatay Soomaaliya, isagoo xusay inaan la oran karin dhibaatadii Soomaaliya way dhammaantay.

2013-09-14 2:40 AM EST
Sabti, September 14, 2013 (HOL) — Xildhibaannada baarlamaanka Somalia ayaa waxay maanta kulan ay ku dhageysanayaan xaruntooda Muqdisho waxay ku dhageysan doonaan warbixinno ku saabsan xaaladaha gobollada dalka iyo nolosha dadka ku nool.

2013-09-14 2:21 AM EST
Sabti, September 14, 2013 (HOL) — Golaha ammaanka Qaramada Midoobay ayaa soo dhaweeyay heshiiskii ay magaalada Addis Ababa ee dalka Itoobiya ku kala saxiixdeen dowladda Soomaaliya iyo maamulka Jubba bishii Ogoosto ee aynu soo dhaafnay, iyagoo labada dhinac ugu baaqay inay meel mariyaan qodobbadii heshiiskaas.