2014-08-27
Today from Hiiraan Online:  _
Wararka Maanta- Arbaco, Sept 11, 2013
Shirweynaha maamul u sameynta gbollada Koofurta iyo Galbeedka Somalia oo Maanta ka furmay Magaalada Baydhabo



Arbaco, September 11, 2013 (HOL) — Magaalada Baydhabo ayaa waxaa ka furmay maanta shir-weyne lagu dhisayo maamul goboleed. Shirka ayaa ka furmay  xaruntii hore ee baarlamaanka Soomaaliya uu ku lahaa Baydhabo.

Maamul-gobeelka shirkan lagu dhisayo waxaa loogu magac daray maamul-goboleedka konfur-galbeed Soomaaliya. Waxgarad, aqoonyahanno iyo siyaasiyiin kasoo jeeda gobollada maamulka loo sameynayo ayaana kasoo qayb galay.

Ergooyinka shirkan ka qayb gelayaa waxay ka kala yimaadeen gudaha dalka iyo dibaddiisa sidoo kale waxay ka yimaadeen gobollada Shabeelada Hoose, Jubada Hoose, Bay  iyo Bakool. Iyadoo la sugayo ergooyinkii ka imaanayay gobollada Gedo iyo Jubbada Dhexe.

Furitaankii shirka waxaa ka hadlay guddooomiyaha gobalka Bay, Cabdi Aadan Hoosoow isagoo soo dhaweeyay ergooyinka soo gaaray Baydhabo ee ka qaybgalaya shirka, sheegeyna in amniga degmada Baydhabo la xasilin doono, shir-weynahuna uu u socan doono sidii looga talo-galey.

Sidoo kale, waxaa ka hadlay shrka guddoomiyaha haweenka, Xaawo Sonkorey iyo nabadoonnada gobalka Bay qarkood, iyagoo ugu baaqay ergooyinka soo socda in ay sida ugu dhaqsi badan u yimaadaan, inkastoo xildhibaanada kasoo jeeda deegannadaasi aysan weli magaalada Baydhabo soo gaarin.

Waxaa kaloo maanta ka hadley furitaanka shirka wasiirkii hore ee arrimaha dibadda Soomaaliya, Cabdullaahi Xaaji Xasan Mad-nuur, isagoo xusay in shirkani uu yahay mid lagu dhisi doono maamul gobaleed rasmi ah oo ay heshiis ku yihiin dhammaan goballada Koonfurta Soomaaliya.

Dhanka kale, wararka qaar ayaa sheegaya in wasiirkii hore ee arrimaha dibadda uu yahay musharrax u tartami doono xilka madaxweynimo ee maamulka lagu sameynayo shirka ka furmay magaalada Baydhabo.

Hiiraan Online, Baydhabo




Post your comments

2013-09-11 10:59 AM EST
Arbaco, September 11, 2013 (HOL) — Madaxweynaha Soomaaliya, Xasan Sheekh Maxamuud ayaa maanta khudbad ka jeeediyey furitaanka shirka ka hortaga burcad-badeedda ee ka socda magaaladda Dubai ee dalka Isutagga Imaaraadka Carabta.

2013-09-11 10:15 AM EST
Arbaco, September 11, 2013 (HOL) — Ra’iisul Soomaaliya, Cabdi Faarax Shirdoon (Saacid) ayaa maanta dalka dib ugu soo laabtay kaddib safarro uu ku tagay dalalka Jabuuti, Sucuudiga iyo Yemen, halkaasoo uu heshiisyo kala duwan kula soo saxiixday hay’addo iyo wadammo, waxaana safarkiisa ku wehliyay xubno ka tirsan golaha wasiirrada xukuumadda Soomaaliya.

2013-09-11 9:36 AM EST
Arbaco, September 11, 2013 (HOL) — Shirkadda diyaaradaha Ethiopian Airlines ayaa joojisay duulimaadyadii ay ku tegi jirtay Somalialnd iyadoo aan la ogeyn sababta rasmiga ah ee keentay inay shirkaddaas joojiso socdaalkii ay ku tegi jirtay Somaliland.

2013-09-11 9:35 AM EST
Arbaco, September 11, 2013 (HOL) — Mas'uuliyiin ka tirsan maamulka gobolka Hiiraan, saraakiisha ciidamada Jabuuti ee howlgalka AMISOM, odayaal, waxgarad iyo qaar ka mid ah qurba joogta ka soo jeeda gobolka ayaa maanta kormeeray dhismaha mid ka mid ah jidadka ugu muhiimsan magaalada Beledweyne.

2013-09-11 7:50 AM EST
Arbaco, September 11, 2013 (HOL) — Xarakada Al-shabaab ayaa maanta ku toogatay degmada Buulo-burte ee gobolka Hiiraan, laba dhallniyaro oo mid ka mid ah ay ku sheegeen inuu ahaa jaasuus u shaqeynayay dalal shisheeye inkastoo aysan sheegin magacyadooda, halka ruuxa kalena ay ku eedeeyeen inuu ahaa tuug dhacayay gaadiid xamuul ah oo ay ciidamadooda amnigu soo qabteen.

2013-09-11 5:07 AM EST
Arbaco, September 11, 2013 (HOL) — Ciidamada maamulka KMG eee Jubba ayaa howlgallo ay xalay ilaa saaka ka sameeyeen gudaha magaalada Kismaayo ayay kusoo qabqabteen tiro dad ah oo ku eedeysan falal lidi ku ah ammaanka.

2013-09-11 3:33 AM EST
Arbaco, September 11, 2013 (HOL) — Saraakiil ka tirsan milateriga Somalia ayaa lagu wadaa inuu maalmaha soo socda tababar socon doona muddo hal sano ah uu ugu furmo dalka Turkiga, kaasoo qayb ka ah heshiiskii ay horay u gaareen dowladda Soomaaliya iyo dowladda Turkiga.

2013-09-11 3:11 AM EST
Arbaco, September 11, 2013 (HOL) — Madaxweynaha Soomaaliya, Xasan Sheekh Maxamuud iyo wafdi uu hoggaaminayo ayaa xalay gaaray Dubai oo ka tirsan imaaraadka carabta, halkaasoo uu ka furmayo shir looga hadlayo ka hortagga burcad-badeedda.

2013-09-11 3:02 AM EST
Arbaco, September 11, 2013 (HOL) — Kulan ballaaran oo shalay ka dhacay magaalada Brussels ee xarunta dalka Belgium ayaa lagu soo dhaweeyay danjiraha cusub ee Soomaaliya ay u magacowday dalkaas, Cali Siciid Fiqi, iyadoo shirkaas ay ka qaygbaleen mas'uuliyiin, jaaliyadaha Soomaaliyeed ee ku nool dalka Belgium, culummo iyo odayaal.

2013-09-11 2:58 AM EST
Arbaco, September 11, 2013 (HOL) — Guddoomiyaha baarlamaanka Soomaaliya, Prof. Maxamed Sheekh Cismaan (Jawaari) ayaa sheegay in howsha ugu weyn ee hortaalla baarlamaanka ay tahay dib u eegis lagu sameeyo dastuurka dalka, inta looga ansixinayo afti dadweyne.