2014-08-01
Today from Hiiraan Online:  _
Wararka Maanta- Arbaco, Sept 11, 2013
Xarakada Al-shabaab oo degmada Buulo-burte ku toogtay dhallinyaro ay ku kala Eedeeyeen basaasnimo iyo Tuugo


Arbaco, September 11, 2013 (HOL) — Xarakada Al-shabaab ayaa maanta ku toogatay degmada Buulo-burte ee gobolka Hiiraan, laba dhallniyaro ah oo mid ka mid ah ay ku sheegeen inuu ahaa jaasuus u shaqeynayay dalal shisheeye , halka ruuxa kalena ay ku eedeeyeen inuu ahaa tuug dhacayay gaadiid xamuul ah oo ay ciidamadooda amnigu soo qabteen.

Qaadiga maxkamadda Al-shabaab ee gobolka Hiiraan ayaa sheegay in labada dhallinyarada ah ay ku caddaadeen dambiyadii lagu soo oogay ayna dil ku xukumeen, iyadoo isla goobta lagu toogtay.

Labada nin ee la toogtay ayaa waxaa lagu kala magacaabi jiray: Axmed Nuur Sheekh Cali oo lagu eedeeyay jaasuunimo iyo Liibaan Cabdi Fiidoow oo isna lagu eedeeyey  inuu ahaa tuug lasoo qabtay isagoo dhac u geysanayay gaadiid xamuul waday.

Boqolaal dadaweyne ah ayaa ku sugnaa goobta uu dilku ka dhacay iyadoo ay dhallinyaradan toogteen kooxo Al-shabaab ka tirsan oo wajiyada ay u qarsanaayeen, kuwaasoo dhowr jeer ka toogtay madaxa.

Wararka qaarkood ayaa sheegaya in labada dhalliyarada ah ay horay uga mid ahaayeen xoogagga Al-shabaab, inkastoo saraakiisha Al-shabaab eek u sugnaa goobtaas aysan sheegin ciddii ay ka tirsanaayeen.

Guddoomiyaha gobolka Hiiraan ee Al-shabaab, Sheekh Maxamed Mire oo ka hadlay goobta ayaa sheegay in qof walba oo lagu qabto isagoo faraha kula jira waxyaabo kasoo horjeeda ku dhaqanka shareecada Islaamka ay ku fulin doonaan xukunno noocan oo kale ah.

“Shareecada Islaamka waa waxa keliya ee aan nafteenna u hurayno, waana sii wadi doonnaa, innagoo cid walba oo lagu qabto dambiyo noocan oo kale ah waxaan marsiin doonna shareecada Islaamka waxay ka qabto,” ayuu yiri guddoomiyaha gobolka Hiiraan ee Al-shabaab.

Ma ahan markii ugu horreysay oo ay Al-shabaab ku toogato deegaannada ay ka taliso dad ay ku eedeysay jaajuusnimo iyo tuugonimo, iyadoo sannadkan ku toogtay Buulo-burte iyo deegaanno ka tirsan gobolka Shabeellada Hoose dhowr qof oo ay ku eedeeyeen jaajuusnimo, kuwaasoo ay ku jirtay gabar dhallinyaro ah.

Maxamed Xaaji Xuseen, Hiiraan Online
maxuseen@hiiraan.com
Muqdisho, Soomaaliya





Post your comments

2013-09-11 10:59 AM EST
Arbaco, September 11, 2013 (HOL) — Magaalada Baydhabo ayaa waxaa ka furmay maanta shirweynihii lagu dhisayo maamul goboleed, kaasoo si rasmi ah uga furmay xarunta baarlamaanka Soomaaliya uu ku lahaa Baydhabo.

2013-09-11 10:59 AM EST
Arbaco, September 11, 2013 (HOL) — Madaxweynaha Soomaaliya, Xasan Sheekh Maxamuud ayaa maanta khudbad ka jeeediyey furitaanka shirka ka hortaga burcad-badeedda ee ka socda magaaladda Dubai ee dalka Isutagga Imaaraadka Carabta.

2013-09-11 10:15 AM EST
Arbaco, September 11, 2013 (HOL) — Ra’iisul Soomaaliya, Cabdi Faarax Shirdoon (Saacid) ayaa maanta dalka dib ugu soo laabtay kaddib safarro uu ku tagay dalalka Jabuuti, Sucuudiga iyo Yemen, halkaasoo uu heshiisyo kala duwan kula soo saxiixday hay’addo iyo wadammo, waxaana safarkiisa ku wehliyay xubno ka tirsan golaha wasiirrada xukuumadda Soomaaliya.

2013-09-11 9:36 AM EST
Arbaco, September 11, 2013 (HOL) — Shirkadda diyaaradaha Ethiopian Airlines ayaa joojisay duulimaadyadii ay ku tegi jirtay Somalialnd iyadoo aan la ogeyn sababta rasmiga ah ee keentay inay shirkaddaas joojiso socdaalkii ay ku tegi jirtay Somaliland.

2013-09-11 9:35 AM EST
Arbaco, September 11, 2013 (HOL) — Mas'uuliyiin ka tirsan maamulka gobolka Hiiraan, saraakiisha ciidamada Jabuuti ee howlgalka AMISOM, odayaal, waxgarad iyo qaar ka mid ah qurba joogta ka soo jeeda gobolka ayaa maanta kormeeray dhismaha mid ka mid ah jidadka ugu muhiimsan magaalada Beledweyne.

2013-09-11 5:07 AM EST
Arbaco, September 11, 2013 (HOL) — Ciidamada maamulka KMG eee Jubba ayaa howlgallo ay xalay ilaa saaka ka sameeyeen gudaha magaalada Kismaayo ayay kusoo qabqabteen tiro dad ah oo ku eedeysan falal lidi ku ah ammaanka.

2013-09-11 3:33 AM EST
Arbaco, September 11, 2013 (HOL) — Saraakiil ka tirsan milateriga Somalia ayaa lagu wadaa inuu maalmaha soo socda tababar socon doona muddo hal sano ah uu ugu furmo dalka Turkiga, kaasoo qayb ka ah heshiiskii ay horay u gaareen dowladda Soomaaliya iyo dowladda Turkiga.

2013-09-11 3:11 AM EST
Arbaco, September 11, 2013 (HOL) — Madaxweynaha Soomaaliya, Xasan Sheekh Maxamuud iyo wafdi uu hoggaaminayo ayaa xalay gaaray Dubai oo ka tirsan imaaraadka carabta, halkaasoo uu ka furmayo shir looga hadlayo ka hortagga burcad-badeedda.

2013-09-11 3:02 AM EST
Arbaco, September 11, 2013 (HOL) — Kulan ballaaran oo shalay ka dhacay magaalada Brussels ee xarunta dalka Belgium ayaa lagu soo dhaweeyay danjiraha cusub ee Soomaaliya ay u magacowday dalkaas, Cali Siciid Fiqi, iyadoo shirkaas ay ka qaygbaleen mas'uuliyiin, jaaliyadaha Soomaaliyeed ee ku nool dalka Belgium, culummo iyo odayaal.

2013-09-11 2:58 AM EST
Arbaco, September 11, 2013 (HOL) — Guddoomiyaha baarlamaanka Soomaaliya, Prof. Maxamed Sheekh Cismaan (Jawaari) ayaa sheegay in howsha ugu weyn ee hortaalla baarlamaanka ay tahay dib u eegis lagu sameeyo dastuurka dalka, inta looga ansixinayo afti dadweyne.