2014-09-21
Today from Hiiraan Online:  _
Wararka Maanta- Arbaco, Sept 11, 2013
Saraakiishii ugu Horeeyay oo ka tirsan ciidamada Xoogga dalka oo dhawaan uu Tababar uga furmayo Dalka Turkiga


Arbaco, September 11, 2013 (HOL) — Saraakiil ka tirsan milateriga Soomaaliya ayaa lagu wadaa inuu maalmaha soo socda tababar socon doona muddo hal sano ah uu ugu furmo dalka Turkiga, kaasoo qayb ka ah heshiiskii ay horay u gaareen dowladaha Soomaaliya iyo  Turkiga.

Saraakiishan oo tiradoodu tahay 120 ayaa noqonaya kuwii ugu horreeyay oo tababar ciidan ku qaata dalka Turkiga, tan iyo markii la ansixiyay heshiiskii ay gaareen wasaaradaha gaashaandhigga Soomaaliya iyo Turkiga, kaas oo dhigayey in Turkiga ay qayb mug leh ka qaataan dib u dhiska ciidamada xoogga dalka.

“Maalin kahor ayay saraakiishan soo gaareen Turkiga, waxaana tababarkan uu qayb ka yahay tababarro ay Turkigu siin doonaan ciidamada xoogga dalka, waana tallaabo aanu soo dhaweynayno,” ayuu yiri xog-hayaha koowaad ee safaaradda Soomaaliya ay ku leedahay Turkiga, Cabdulqaadir Maxamed Nuur oo arrintan ka warbixinayay.

Turkiga ayaa wuxuu labadii sano ee ugu dambeysay ku howlanaa caawinta dowladda iyo shacabka Soomaaliyeed, iyadoo lagu wado in howlo kale oo lagu dhisayo waddooyinka, isbitaallada iyo iskuullada Soomaaliya uu bilaha soo socda ka billaabo Muqdisho.

Xukuumadda Ankara ayaa dhawaan shaacisay inay dowladda Soomaaliya ka taageerayso dhinaca tababarrada ciidamada, kaddib markii safaaradda Turkiga ee Muqdisho lagu weeraray gaari miineysan, halkaasoo uu kaga dhintay mid ka mid ah saraakiishooda jooga Soomaaliya saddex kalena uu dhaawac kasoo gaaray.

Madaxweynaha Soomaliya ayaa uga mahadceliyay Turkiga howlaha samafalka ah ee ay ka wadaan gudaha Soomaaliya, xilli uu booqanayay isbitaalka Digfeer oo Turkigu uu dib u habeyn ballaaran ku sameeyay.

Dalka Turkiga ayaa tababarro bilooyin ah horay u siiyay ciidammo ka tirsan kuwa booliiska Soomaaliya oo isugu jiray haween iyo rag, kuwaasoo lasoo baray habka looga hortago falal-dambiyeedyada qarsoodiga ah.

Maxamed Xaaji Xuseen, Hiiraan Online
maxuseen@hiiraan.com
Muqdisho, Soomaaliya





Post your comments

2013-09-11 10:59 AM EST
Arbaco, September 11, 2013 (HOL) — Magaalada Baydhabo ayaa waxaa ka furmay maanta shirweynihii lagu dhisayo maamul goboleed, kaasoo si rasmi ah uga furmay xarunta baarlamaanka Soomaaliya uu ku lahaa Baydhabo.

2013-09-11 10:59 AM EST
Arbaco, September 11, 2013 (HOL) — Madaxweynaha Soomaaliya, Xasan Sheekh Maxamuud ayaa maanta khudbad ka jeeediyey furitaanka shirka ka hortaga burcad-badeedda ee ka socda magaaladda Dubai ee dalka Isutagga Imaaraadka Carabta.

2013-09-11 10:15 AM EST
Arbaco, September 11, 2013 (HOL) — Ra’iisul Soomaaliya, Cabdi Faarax Shirdoon (Saacid) ayaa maanta dalka dib ugu soo laabtay kaddib safarro uu ku tagay dalalka Jabuuti, Sucuudiga iyo Yemen, halkaasoo uu heshiisyo kala duwan kula soo saxiixday hay’addo iyo wadammo, waxaana safarkiisa ku wehliyay xubno ka tirsan golaha wasiirrada xukuumadda Soomaaliya.

2013-09-11 9:36 AM EST
Arbaco, September 11, 2013 (HOL) — Shirkadda diyaaradaha Ethiopian Airlines ayaa joojisay duulimaadyadii ay ku tegi jirtay Somalialnd iyadoo aan la ogeyn sababta rasmiga ah ee keentay inay shirkaddaas joojiso socdaalkii ay ku tegi jirtay Somaliland.

2013-09-11 9:35 AM EST
Arbaco, September 11, 2013 (HOL) — Mas'uuliyiin ka tirsan maamulka gobolka Hiiraan, saraakiisha ciidamada Jabuuti ee howlgalka AMISOM, odayaal, waxgarad iyo qaar ka mid ah qurba joogta ka soo jeeda gobolka ayaa maanta kormeeray dhismaha mid ka mid ah jidadka ugu muhiimsan magaalada Beledweyne.

2013-09-11 7:50 AM EST
Arbaco, September 11, 2013 (HOL) — Xarakada Al-shabaab ayaa maanta ku toogatay degmada Buulo-burte ee gobolka Hiiraan, laba dhallniyaro oo mid ka mid ah ay ku sheegeen inuu ahaa jaasuus u shaqeynayay dalal shisheeye inkastoo aysan sheegin magacyadooda, halka ruuxa kalena ay ku eedeeyeen inuu ahaa tuug dhacayay gaadiid xamuul ah oo ay ciidamadooda amnigu soo qabteen.

2013-09-11 5:07 AM EST
Arbaco, September 11, 2013 (HOL) — Ciidamada maamulka KMG eee Jubba ayaa howlgallo ay xalay ilaa saaka ka sameeyeen gudaha magaalada Kismaayo ayay kusoo qabqabteen tiro dad ah oo ku eedeysan falal lidi ku ah ammaanka.

2013-09-11 3:11 AM EST
Arbaco, September 11, 2013 (HOL) — Madaxweynaha Soomaaliya, Xasan Sheekh Maxamuud iyo wafdi uu hoggaaminayo ayaa xalay gaaray Dubai oo ka tirsan imaaraadka carabta, halkaasoo uu ka furmayo shir looga hadlayo ka hortagga burcad-badeedda.

2013-09-11 3:02 AM EST
Arbaco, September 11, 2013 (HOL) — Kulan ballaaran oo shalay ka dhacay magaalada Brussels ee xarunta dalka Belgium ayaa lagu soo dhaweeyay danjiraha cusub ee Soomaaliya ay u magacowday dalkaas, Cali Siciid Fiqi, iyadoo shirkaas ay ka qaygbaleen mas'uuliyiin, jaaliyadaha Soomaaliyeed ee ku nool dalka Belgium, culummo iyo odayaal.

2013-09-11 2:58 AM EST
Arbaco, September 11, 2013 (HOL) — Guddoomiyaha baarlamaanka Soomaaliya, Prof. Maxamed Sheekh Cismaan (Jawaari) ayaa sheegay in howsha ugu weyn ee hortaalla baarlamaanka ay tahay dib u eegis lagu sameeyo dastuurka dalka, inta looga ansixinayo afti dadweyne.