3/28/2024
Today from Hiiraan Online:  _
Wararka Maanta- Jimco, May 3 , 2013
Madaxda Ururka IGAD oo isku-raacay in Dowladda Somalia ay hoggaanka u qabato Dadaallada lagu dhisayo Maamullada Dalka


Jimco, May 03, 2013 (HOL) — Madaxda dalalka ku bahoobay IGAD ayaa isku raacay in dowladda Soomaaliya ay hormuud u noqoto dadaallada maamul u sameynta gobollada Soomaaliya, iyadoo warkan lagu sheegay war-murtiyeed laga soo saaray shirkii madaxda IGAD uga socday magaalada Addis Ababa ee xarunta dalka Itoobiya.

Qodobkan ayaa wuxuu ka mid ahaa qodobbbadii uu hordhigay madaxweyne Xasan Sheekh madaxda dalalka IGAD, iyadoo sidoo kale la isku raacay in dowladda Soomaaliya lagu ixtiraamo dastuurkeeda, lana taageero qorshaha ay dowladdu ku sameynayso maamullada.

Sidoo kale, war murtiyeedka waxaa lagu sheegay in urur-goboleedka IGAD uu taageero qorshaha ay dowladda Soomaaliya iyo AMSIOM ku doonayaan inay Al-shabaab kaga saaraan deegaannada ay gacanta ku hayso.

War-murtiyeedka ayaa sidoo kale lagu sheegay in la xoojiyo ciidamada dowaldda Soomaaliya la tayeeyo si ay awood buuxda ugu yeeshaan inay la wareegaan ammaanka guud ee Soomaaliya, haddii ciidamada caawinaya ay isaga baxaan dalka.

Madaxda IGAD ayaa sidoo kale isku raacay in wafdi heer sare ah loo diro magaalada Kismaayo ee xarunta Jubbada Hoose, waxaana lagu sheegay qodobka 10-aad ee war-murtiyeedka in wafdigaas ay hoggaamin doonaan madaxda IGAD, howlwadeennada ururka iyo xubno ka socda waddamada ku jira ururka.

Howsha guddigan ayaa waxay noqon doontaa inay soo indho-indheeyaan xaaladda degmada Kismaayo ayna soo ururiyaan warbixinno lagu soo bandhigi doono shirka soo socda ee IGAD ay ku yeelanayso magaalada Addis Ababa ee dalka Itoobiya dhammaadka bishan May.

Degmada Kismaayo ayaa waxaa ka socda shir maamul loogu sameynayo gobollada Jubbooyinka iyo Gedo, kaasoo ay dowladda Soomaaliya kasoo hor-jeesatay kuna tilmaantay mid aan waafaqsanayn dastuurka dalka u yaalla.

Shirkan oo looga hadlayay ammaanka Soomaaliya ayaa waxaa shirkaan uga qaybgalay madaxweyanha Soomaaliya, Xasan Sheekh Maxamuud iyo wafdi uu hoggaaminayo, iyadoo madaxweynuhu uu sharraxaad ka siiyay madaxdii IGAD shirka lagu qabanayo London ee looga hadlayo arrimaha Soomaaliya.

Maxamed Xaaji Xuseen, Hiiraan Online
[email protected]
Muqdisho, Soomaaliya













Click here
5/3/2013 1:52 PM EST
Jimco, May 03, 2013 (HOL) — Golaha ammaanka ee Qaramada Midoobay ayaa meel-mariyay qorshe lagu billaabayo howlgal cusub oo Qaramada Midoobay ay ka billaabayso Soomaaliya, kaasoo loogu magac-daray UN-SOM, howlgalkaas oo fududeynaya in Soomaaliya ay nabad buuxda ka dhalato.

5/3/2013 1:31 PM EST
Jimco, May 03, 2013 (HOL) — Maanta oo ku beegan maalinta war-baahinta aduunka, waxaa siweyn looga xusay magaalooyin badan oo dalka ka tirsan, kuwaasoo ay kamid tahay xarunta maamulka Puntland ee Garoowe.

5/3/2013 11:40 AM EST
Jimco, May 03, 2013 (HOL) — Dowladda Puntland ayaa ka hadashay mowqifkeeda ku aaddan shirka London ee toddobaadka soo socda ka furmaya magaalada London ee xarunta dalka Brirtain, kaasoo dhaqaale loogu raadinayo Soomaliya.

5/3/2013 10:56 AM EST
Jimco, May 03, 2013 (HOL) — Waxaa maanta magaalada Baydhabo ka dhacday xaflad ay ku qalinjabinayeen arday dhameystray waxbarashaeda jaamacadda Koonfurta Soomaaliya ee xarunteedu tahay Baydhabo, iyadoo ay xafladda kasoo qaybgaleen mas’uuliyiin kala duwan.

5/3/2013 10:17 AM EST
Jimco, May 03, 2013 (HOL) — Guddoomiyaha baarlamaanka Soomaaliya, Prof. Maxamed Sheekh Cismaan Jawaari iyo wafdi uu hoggaaminayo ayaa maanta dib ugu soo laabtay dalka kaddib socdaal shaqo oo uu ku tagay dalka Turkiga, isagoo lasoo kulmay mas’uuliyiinta Turkiga iyo ardayda Soomaaliyeed ee wax ka barta dalkaas.

5/3/2013 7:10 AM EST
Jimco, May 03, 2013 (HOL) — AMISOM ayaa warsaxaafadeed ay soo saartay ku sheegtay inay fashilisay weerarro ay Al-shabaab doonaysay inay ka fuliso magaalada Kismaayo ee xarunta gobolka Jubbada Hoose, halkaasoo sanadkii hore laga qabsaday Al-shabaab iyadoo aysan ka dhicin wax dagaallo ah.

5/3/2013 6:39 AM EST
Jimco, May 03, 2013 (HOL) — Kal-fadhigii 43-aad ee St. Gallen Symposium ayaa si rasmi ah uga furmay magaalada St. Gallen ee dalka Switzerland, waxanaa kulankan kasoo qaybgalay siyaasiin caan ah iyo qubaro magic-weyn ku leh caalamka.

5/3/2013 6:32 AM EST
Jimco, May 03, 2013 (HOL) — Golaha wasiirrada xukuumadda Soomaaliya ayaa ansixiyay qorshe loogu talogalay dib u habeynta maamulka maaliyadda dalka, kaasoo ay soo diyaarisay wasaaradda maaliyadda iyo qorsheynta dowladda Soomaaliya.