2014-04-19
Today from Hiiraan Online:  _
Wararka Maanta- Sabti, May 11, 2013
Taliyaha cusub ee Ciidamada Booliiska Soomaaliya, Jeneneraal Saacid oo si Rasmi ah ula Wareegay Xilkiisa (SAWIRRO)


Sabti, May 11, 2013 (HOL) — Taliyaha cusub ee ciidanka booliiska Somalia Jen. C/kariin Daahir Siciid (Saacid) oo toddobaad ka hor loo magacaabay xilkan ayaa si rasmi ah maanta ula wareegay xilkiisa, waxaana xafladdii lagu wareejinayay xilka ka qaybgalay ra’iisal wasaaraha Somalia, Cabdi Faarax Shirdoon (Saacid), guddoomiya maxkamadda sare, Avv. Caydiid Cabdullaahi Ilka-xanaf iyo wasiirka arrimaha guddaha iyo ammaanka Qaranka, C/kariin Xuseen Guuleed.

“Hoggaanka cusub ee aanu u magacownay ciidamada difaaca iyo ammaanka dalku wuxuu qayb weyn ka yahay dadaalka aan ugu jirno sugidda amniga iyo isbedelka cusub ee aan ku doonaynno inaan si buuxda ugu xasilinno dalka,” ayuu yiri ra’iisal wasaaraha oo hadal kooban ka jeediyay xafladdii xil-wareejinta oo ka dhacday dugsiga tababarka booliiska ee Jen. Kaahiye loona yaqaano (Scuola Polizia).

Jen. Sharif Shiikhunaa Maye ayaa labo sano ahaa taliyaha ciidanka booliiska, waxaana lagu amaanay inuu qeyb weyn ka qaatay dib-u-dhiska ciidanka oo muddadii uu taliyaha ahaa saddex jibaaray tirada ciidanka booliiska Somalia. Taliyaha oo munaasabaddii maanta ka hadlay ayaa sheegay in loo baahan yahay qorshe sare loogu qaadayo tayada iyo tirada ciidanka si loo gaarsiiyo howlaha ciidanka dalka oo dhan.

“Waxaan soo dhaweynayaa taliyaha cusub ee ciidanka booliiska, waxaana u rajeynayaa in Illaahay u fududeeyo xilka weyn ee uu qaaday. Waxaan kula dar-daarmayaa inuu u hawlgallo kordhinta tirada ciidanka iyo sidii kor loogu qaadi lahaa tayadooda,” ayuu yiri Jen. Maye oo ku amaanay ciidanka sida ay naftooda ugu huraan sugidda ammaanka dalka iyo difaaca xuquuda shacbiga Soomaaliyeed.

Wasiirka arrimaha guddaha iyo amniga Qaranka, C/kariin Xuseen Guuleed ayaa mahad gooni ah u soo jeediyay taliyihii hore ee booliiska Jen. Shariif Shiikhuna isagoo ku ammaanay wada-shaqeyntii ay lahaayeen lixdii bilood ee lasoo dhaafay. Waxayna ra’iisal wasaaraha iyowasiirku goobtaas billad Sharaf ku guddoonsiiyeen Jen. Maye.



Jen. Saacid ayaa ah taliyihii 10-aad ee qabta jagada ugu sarreeysa ciidanka booliiska Soomaaliya tan iyo markii la aasaasay 1943-kii oo ahaa xiliggii uu dalku gumaysiga ku jiray. Waxaana goobta xil-wareejinta laga xusay in Jen. Saacid abaahii Daahir uu waqti dheer u soo shaqeeyay ciidanka booliiska Soomaaliyeed. Halka uu isna yaraan ku galay shaqada ciidanka illaa uu ka qabto hoggaanka ugu sarreeya ciidanka.

“Waxaan mudnaanta kowaad siinayaa daryeelka ciidanka iyo cadaalad inaan u sameeyo. Askariga aan ku aaminayno mas’uuliyada illaalinta sharciga iyo amniga waa inuu xaqiisa helo, si aan uga guul-gaarno la dagaalanka musuq-maasuqa iyo dambiyada abaabulan, una difaacno xuquuqda shacbigeenna,” ayuu yiri Jen. Saacid oo munaasabadda ka hadlay.

Ra’iisul wasaaraha Somalia ayaa hadalkii uu ka jeediyay munaasabadda xil-wareejinta wuxuu ku xusay taariikhda dheer ee ciidanka booliiska Somalia, iyo sida ay laf-dhabar ugu ahaayeen nidaamka dawligaa ee Soomaaliya. Isagoo sheegay inay lagama maar-maan tahay inay kaalintaas buuxiyaan sida ugu dhaqsaha badan.

Ugu dambeyn, ra’iisul wasaaruhu wuxuu kula dardaarmay taliyaha cuusb ee ciidanka booliiska Soomaaliya inuu ka yimaado qorshe dhamaystiran oo lagu illaalinayo sharciga dalka, amniga iyo sharafta muwaadinka Soomaaliyeed.







Maxamed Xaaji Xuseen, Hiiraan Online
maxuseen@hiiraan.com
Muqdisho, Soomaaliya





Post your comments

2013-05-11 4:33 PM EST
Sabti, May 11, 2013(HOL)—Waxaa maalintii labaad ka socda xarunta International Coffee Organization shir looga hadlayo hawlaha ay AMISOM ka waddo Soomaaliya iyo sida ay qurba joogta soomaaliyeed uga faa,ideysan karaan fursadaha shaqo iyo sidii ay dalkooda wax ugu qaban lahaayeen.

2013-05-11 2:27 PM EST
Magaalada Minneapolis ee dalka Mareykanka ayaa waxaa lagu qabtay dood aad u xiisa badneyd ee lagu falanqeynayey arrimaha la xiriira Federalka Soomaaliya. Doodaada ayaa waxaa ka qayb-galay: Prof. Axmed I Samatar, Dr. Abdinur Sheekh Mohamed iyo Dr. Hodan Ciise

2013-05-11 12:21 PM EST
Sabti, May 11, 2013 (HOL) — Xarunta SWDC (Somali Women Developments Center ayaa waxay maanta ku wareejisay deeq isugu jirta qalab waxbarasho iyo mid caafimaad ku wareejisay maanta oo Sabti ah wasaarada adeegga bulshada xukuumadda Soomaaliya, waxaa deeqdan ay ka mid timid dadka Mareykanka, taasoo ay ugu talogaleen inay ku caawiyaan Soomaaliya.

2013-05-11 8:34 AM EST
Jimco, May 10, 2013 (HOL) — Hay’adda UN-OCHA oo isku-dubaridka gargaarka bani’aadamnimo u qaabilsan Qaramada Midoobay ayaa sheegtay in daad ka dhashay roobab mahiigaan ah oo ka da’ay Koonfurta Soomaaliya ay dileen toddoba caruur ah, 50,000 oo kalena ku qasbay inay guryahooda ka barakaac, sidoo kalena ay u baaba’een daadadkaas 6,400 oo hektar oo dhul-beereed ah.

2013-05-11 8:28 AM EST
Sabti, May 11, 2013 (HOL) — Wsaaradda Boosaha iyo isgaadhsiinta Somaliland ayaa sheegtay inay ogolaatay lambaradda fureyaasha cusub ee shirkadda TELESOM ku soo kordhisay Mobile-keeda gacanta.

2013-05-11 2:26 AM EST
Sabti, May 11, 2013 (HOL) — Gaadiidleyda ka shaqeysa degmooyinka gobolka Shabeellada Hoose ayaa saakay ku dhaqaaqay shaqo-joojin, kaddib markii ay sheegeen in isbaarooyin fara badan lasoo dhigtay waddooyinka isku xira degmooyinka gobolka.

2013-05-11 2:04 AM EST
Sabti, May 11, 2013 (HOL) — Askari ka tirsan ciidamada dowladda Somalia iyo laba qof oo rayid ah ayaa xalay ku dhintay xaafadda suuqa xoolaha ee degmada Huriwaa, kaddib shaqaaqooyin is-daba socday oo xaafaddaas ka dhacay.

2013-05-11 2:01 AM EST
Sabti, May 11, 2013 (HOL) — Ugu yaraan 10-qof ayaa ku dhintay tiro intaas ka badanna way ku dhaawacmeen dagaal u dhexeeya laba beelood oo shalay ka dhacay deegaanka Raamo oo ku dhow degmada Mandheera ee gobolka Waqooyi-bari dalka Kenya.