2014-07-26
Today from Hiiraan Online:  _
Wararka Maanta- Khamiis, Mar 7 , 2013
Madaxweynaha Somalia oo si Diirran u soo Dhaweeyay Go’aankii Soomaaliya looga qaaday Cunno-qabteynta hubka



Khamiis, Maarso 07, 2013 (HOL) — Madaxweynaha Soomaaliya, Xasan Sheekh Maxamuud ayaa sida diirran u soo dhaweynaya go’aanka Golaha Ammaanka ee Qaramada Midoobay uu cunno-qabteynta hubka kaga qaaday dowladda Soomaaliya.

 “Waxaa jira xisaabtan iyo mas’uuliyad la socota go’aankaas Golaha Ammaanka, go’aankooda wuxuu si sax ah ula socdaa isbedelka siyasadeed ee cusub ee ka jira Soomaaliya,” ayuu yiri madaxweyne Xasan Sheekh oo arrintan ka hadlay.

Cunno-qabateynta hubka ee laga qaaday Soomaaliya oo KMG ah ayaa waxay soconaysaa muddo hal sano ah, waxaana loogu ogolaaday dowladda Soomaaliya inay kusoo iibsato hubka fudud oo keliya.

“Kumannaan ciidamadda xooga dalka ah oo ay soo tababareen dalalka aan saaxibbada nahay ayaa Soomaaliya dib ugu soo laabtay, nasiib-darro qalab la’aan ayaa caqabad ku noqotay si ay howshooda u gutaan. Ciidamadan ayaa si wadajir ah ula shaqeeya ciidamada Midowga Afrika ee AMISOM,” ayuu madaxweynuhu hadalkiisa ku daray.

Dowladda Mareykanka oo dhawaan aqoonsatay dowladda Soomaaliya oo dabada ka riixaysay in cunnoqabateynta hubka laga qaado Soomaaliya ayaa waxay soo dhaweysay go’aanka golaha ammaanka uu gaaray, kaasoo ay ku sheegtay inuu fursad siinayo dowladda cusub ee Soomaaliya.

"Dowladdu waxay uga mahad-celineysaa Golaha Ammaanka, qadarintooda iyo fahamkooda,waxayna dowladda Soomaaliya mas’uuliyad iska saareysaa  dhammaan sharciyadda iyo sharuudaha la socda go’aanka Golaha Ammaanka ay gareen, si waafaqsan nidaamka, kuna dhisan hufnaan,” ayuu yiri madaxweynaha Soomaaaliya.

Ugu dambeyn, madaxweynaha ayaa ugu baaqay shacabka Soomaaliyeed in ay ka qayb-qaatan dib-u-dhiska dalkooda. “Talaabadan ayaa ah guul u soo hoyatay dhammaan shacabka iyo dowladda Soomaaliya”.

Go’aanka cunno-qabateynta looga qaaday Sooamaliya ayaa wuxuu imaanayaa iyadoo maamullada Puntland iyo Somaliland ay dalbadeen inaan dowladda Soomaaliya laga qaadin cunno-qabateynta hubka ee Soomaaliya saaran.

Maxamed Xaaji Xuseen, Hiiraan Online
maxuseen@hiiraan.com
Muqdisho, Soomaaliya





Post your comments

2013-03-07 12:26 PM EST
Khamiis, Maarso 07, 2013 (HOL) —Dagaal culus oo ciidamada dowladda iyo kuwa Al-shabaab ku dhexmaray maanta deegaanka Lafaale oo ka tirasn degmada Xudur ee gobolka Bakool kaddib ayaa waxay ciidammo ka tirsan kuwa dowladda waxay madaxa dagaalyahan ka tirsan Al-shababa oo ay soo jareen geeyeen degmada Xudur.

2013-03-07 12:12 PM EST
Khamiis, Maarso 07, 2013 (HOL) — Xukuumadda Somaliland ayaa sheegtay inay walaac ka qabto cunno-qabateynta hubka ee laga qaaday Soomaaliya, iyagoo wasiirka arrimaha dibadda ee maamulkas uu ku tilmaay go’aanka uu golaha ammaanka qaatay mid aan si wanaagsan looga fiirsan.

2013-03-07 11:13 AM EST
Khamiis, Maarso 07, 2013 (HOL) — Ra’iisal wasaaraha Soomaaliya, Cabdi Faarax Shirdoon (Saacid) oo dib ugu soo laabtay Muqdisho ayaa galabta shir Jara’id oo uu ku qabtay xafiiskiisa kaga warbixiyay safarkii uu ku tagay degmooyin ka tirsan gobolka Galguduud ee bartamaha Soomaaliya iyo cunno-qabateyntii hubka ee laga qaaday Soomaaliya.

2013-03-07 10:46 AM EST
Khamiis, Maarso 07, 2013 (HOL) — Ururka HIRDA ayaa maanta ku qabtay Muqdisho munaasabad lagu soo dhaweynayay laguna xusayay maalinta haweenta adduunka ee 8-da Maarso oo sanad walba xiliyadan oo kale laga xuso Soomaaliya iyo caalamka intiisa kale.

2013-03-07 10:20 AM EST
Khamiis, Maarso 07, 2013 (HOL) — Ciidamada dowladda Soomaaliya oo gacan ka helaya kuwa Itoobiya ayaa saakay 9:00 aroonimo la wareegay degmada Ufuroow ee gobolka Bay, halkaasoo ay ka talinaysay Al-shabaab sannadihii lasoo dhaafay.

2013-03-07 8:32 AM EST
Khamiis, Maarso 07, 2013 (HOL) — Ra’iisul wasaaraha Soomaaliya iyo wasiirkiisa maaliyadda lacagta oo laga dalbaday inay horyimaadaan golaha baarlamaanka Soomaaliya si wax looga weydiiyo hoos u dhaca xoogga leh ee ku yimid doollarka, taasoo dhibaateyn ku ah shacabka Soomaaliyeed.

2013-03-07 8:22 AM EST
Khamiis, Maarso 07, 2013 (HOL) — Wasaaradda horumarinta arrimaha bulshada ee dowladda Soomaaliya iyo xafiiska Jinsiga ee AMISOM ayaa maanta si wadajir ah ugu qabtay Muqdisho xuska maalinta haweenka Adduunka ee 8-da Maarso oo sannad walba laga xuso dunida oo dhan, iyadoo la sheegay in lasoo hormariyay maadaama ay berri Jimco tahay oo laga nasanayo shaqooyinka.

2013-03-07 7:21 AM EST
Khamiis, Maarso 07, 2013 (HOL) — Shirkadda Mubaarak Farsamasi ee dawooyinka soo dejiya ayaa sheegtay in dawooyinkeedda ay ka soo iibiyaan mid ka mid ah shirkadaha sameeya dawooyinka ee dalka Turkiga, kuwaas oo soo saara dawoooyin tayo leh.

2013-03-07 7:19 AM EST
Khamiis, Maarso 07, 2013 (HOL) — Qaar ka mid ah dhibanayaashii dacwadda ku oogay madaxweyne ku xigeenkii hore ee Soomaalya Cali Samatar, ayaa ka hadlay waraaq uu Ra’isal wasaaraha Soomaaliya Saacid u qoray wasaaradda arrimaha dibadda ee Maraykanka oo uu kaga codsanayo in xukunkii lagu xukumay Cali Samatar la buriyo maadama oo uu xaasanad siyaasadeed leeyahay.

2013-03-07 6:31 AM EST
Khamiis, March 07, 2013 (HOL) - Wasiirka gaashaandhiga dalka Kenya Yuusuf Xaaji ayaa noqday senatorka Garissa, kadib markii uu si dirqi ah kaga guulaystay gudoomiye ku xigeenka baarlamaanka Faarax Macallim oo muddo ku dhow labaatan sano ahaa xildhibaanka deegaanka Dhadhaab.

2013-03-07 5:27 AM EST
Xildhibaan Yuusuf Xassan ayaa si aqlabiyad ah markale loogu doortay kursiga degmada Kamakunji oo ah deegaanka ay ka tirsantahay xaafada Islii ee magaalada Nairobi.

2013-03-07 12:45 AM EST
Khamiis, Maarso 07, 2013 (HOL) — Dowladda Soomaaliya iyo ururka Ahlusunna Waljamaca ayaa shalay kala saxiixday heshiis qodobbo badan ah, kuwaasoo ay si wadajir ah u saxiixeen mas’uuliyiinta dowladda iyo kuwa Ahlusunna.

2013-03-07 12:22 AM EST
Khamiis, Maarso 07, 2013 (HOL) — Guddiga doorashooyinka dalka Kenya ayaa sheegay inay dib ugu laabteen tirinta codadka doorashooyinka, kaddib markii ay xumaadeen qalabkii lagu tirin lahaa codadka, iyagoo sheegay inay natiijadu soo bixin doonto berri oo Jimco ah.