2014-11-28
Today from Hiiraan Online:  _
Wararka Maanta- Talaado, Mar 5 , 2013
Madaxweynaha Dowladda Somalia oo khudbad dhinacyo badan Taabanaysay ka jeediyay caawa Telefishinka Al-Jazeera



Talaado, Maarso 05, 2013 (HOL) — Madaxweynaha Soomaaliya, Xasan Sheekh Maxamuud oo safar ku jooga dalka Qatar ayaa khudbad dhinacyo badan taabanaysay ka jeediyay caawa telefishinka Al-jazeera, isagoo markii dambena su’aalo uga jawaabay dadkii dhageysanaya khudbadiisa.

Madaxweynaha ayaa kaga hadlay khudbaddiisa arrimo ay ka mid yihiin Al-shabaab, ammaanka dalka, fikirkooda ku aaddan wadahadallada Somaliland, siyaasadda dowladdu ay kula shaqeynayso dalalka dariska ah sida Itoobiya iyo Kenya iyo weliba kuwo kale oo fara badan.

“Dagaalka laguma dhameyn karo dagaal oo keliya, balse waxaan go’aan ku gaarnay inaan siinno Al-shabaab fursado ay ku hadli karaan si loo dhameeyo fikirka dagaal ee ay rumeysan yihiin,” ayuu yiri madaxweynaha oo ka jawaabayay su’aal ku saabsanayd arrintan.

Madaxweynuhu wuxuu sheegay in Al-shabaab aysan lahayd barnaamij ay ku howlgalaan, balse iyagu ay diyaar u yihiin inay si walba oo ay tahay xiriirro kala duwan ula sameeyaan ayna siinayaan fursado siyaasadeed, wuxuuna ugu baaqay ajaabinta Al-shabaab la safan inay dalka isaga baxaan, kuwa kale ee Soomaalida ahna ay la hadli doonaan, isagoo ka reebay kuwo uu ku sheegay dambiilayaal waaweyn oo caalamku uu doon-doonayo.

Sidoo kale, madaxweynaha oo si kooban uga hadlay ammaanka dalka ayaa sheegay in xilligan ay Soomaaliya ku jirto xaalad ka duwan kuwii ka jiray 20-kii sano ee lasoo dhaafay, wuxuuna xusay in Muqdisho iyo deegaanno kale oo dalka ku yaalla ay yihiin kuwo nabaddooda la isku halleyn karo.

“Maanta 20 safaaradood ayaa ka furan Muqdisho, xaaladda ammaan waa mid aad u wanaagsan, balse waxaan ka codsanaynaa dalalka muslimka ah in ay dalka yimaadaan. Imaanshahooda ma ahan mid aan wax uga doonayno balse waxay noo tahay mid muuqaal ahaan iyo niyad ahaan aad noogu wanaagsan,” ayuu yiri Xasan Sheekh.

Su’aal ku saabsanayd fikirkiisa wadahadallada Soomaaliya iyo Somaliland u dhexeeya ayuu yiri: “Midnimada Soomaaliya waa muhiim, waxaana naga go’an inaan la hadalno cid walba oo nabad doonaysa.”

Mar la weydiiyay su’aal kale oo ahayd qorshaha dowladda Soomaaliya ee ku aaddan sida ay ula macaamilayaan dalalka dariska la ah sida Kenya iyo Itoobiya ayuu kaga jawaabay inay u qorsheysan tahay inay kula noolaadaan nabad iyo deggenaasho, sidoo kalena ay wadaagaan khayraadka labada dhinac, isagoo sheegay in taasi ay qaybta hore kaga jirto howlahooda shaqo.

Isagoo hadalkiisa sii wata ayuu kaga hadlay maamul goboleedyada dalka, isagoo xusay in dowladdiisa ay ka go’an tahay inay dalka oo dhan gaarsiiso habka federaalka ah, maadaama ay dowladdu ku dhisan tahay hab federaal ayna tahay in dalka oo dhan uu noqdo mid federaali ah.

Dhanka kale, su’aal ahayd halka ay dowladda Soomaaliya ka taagan tahay arrimaha haweenka Soomaaliya ayaa sheegay in weligeed aan dastuurka Soomaaliya lagu darin qodob ka hadalaya arrimaha haweenka, taasna ay ahayd ku saleysnayd dhaqanka Soomaaliy, balse dowladda uu horkacayo ay dastuurka ku xustay xuquuqda haweenka, isagoo soo qaatay in wasiiradda arrimaha dibadda ee haween tahay, taasna ay muujinayso heerka ay xilligan dowladdu ka tagan tahay arrimaha haweenka.

Ugu dambeyn, madaxweynaha Soomaaliya ayaa waxaa la guddoonsiiyay hadiyad weyn oo ay Al-jazeera ugu talogashay, waxaana goobta uu ka jeedinayay khudbadda ku sugnaa wafigiisa oo isugu jiray wasiirro iyo xubno kale oo dowladda ka tirsan.

Maxamed Xaaji Xuseen, Hiiraan Online
maxuseen@hiiraan.com
Muqdisho, Soomaaliya





Post your comments

2013-03-05 3:38 PM EST
Talaado, March 05, 2013(HOL): Munaasabad lagu soo dhaweynayay Wasiirka Wasaaradda Horumarinta iyo Adeegga Bulshada Drs. Maryan Qaasim ayaa lagu qabtay magaalada London ee caasimadda dalka Britain.

2013-03-05 1:08 PM EST
Talaado, Maarso 05, 2013 (HOL) — Ra'iisal wasaaraha Soomaaliya, Cabdi Faarax Shirdoon ayaa maanta booqday goob maqaaxi ah oo xildhibaanno ka tirsan baarlamaanka ay ku geeriyoodeen, kuwaasoo kala ahaa: Yuusuf Mire Seeraar iyo C/weli Ow-Maxamuud, kadib markii qof waxyaabaha qarxa isku soo xiray uu isku qarxiyay 02, May 2012, xilli ay halkaas xildhibaannadu u joogeen howlo shaqo.

2013-03-05 12:48 PM EST
Tuesday, March 05, 2013 (HOL) - Xilli la sugayo natiijada doorashada ayaa daqiiqado ka hor waxaa xaafada Islii ka dhacay labo qarax oo is daba joog ah.

2013-03-05 11:29 AM EST
Talaado, Maarso 05, 2013 (HOL) — Ra'iisal wasaaraha Soomaaliya, Cabdi Faarax Shir-doon (Saacid) iyo wafdi ballaaran oo uu hoggaaminayo ayna ka mid yihiin guddoomiye ku-xigeenka koowaad ee baarlamaanka, Jeylaani Nuur Iikar, wasiirada arrimaha gudaha, gaashaandhigga, wasiir ku xigeenno, xildhibaanno iyo saraakiil ciidan ayaa gaaray degmada Caabudwaaq ee gobolka Galgaduud.

2013-03-05 10:51 AM EST
Talaado, Maarso 05, 2013 (HOL) — Golaha wasiirrada Puntland oo maanta isugu yimid kulankoodii todobaadlaha ahaa ayaa ka hadlay arimo dhowr ah oo ay kamid yihiin ammaanka, xaaladda abaaraha iyo maamul u sameynta gobollada Jubbooyinka iyo Gedo.

2013-03-05 9:00 AM EST
Talaado, Maarso 05, 2013 (HOL) — Maxkamadda ciidamada qalabka sida ee Puntland - laanteeda gobollada Bari, Karkaar iyo Sanaag- ayaa maanta xukun ku riddey sadex nin oo dhalinyaro ah, kuwaas oo lagu soo eedeeyey in ay ka tirsanaayeen ururka Al-shabaab.

2013-03-05 8:59 AM EST
Talaado, Maarso 05, 2013 (HOL) — Kooxo hubeysan ayaa xalay gurigiisa ka kaxaystay wiil dhallinyaro ah oo lagu magacaabi jiray, Maxamed Nuur Shacbaan oo 20-jir ahaa iyagoo toogtay markii ay guriga u jirsadeen hal KM, iyadoo ku dhuftay rasaas badan oo keentay in lagu aaso halkii lagu dilay.

2013-03-05 7:12 AM EST
Talaado, Maarso 05, 2013 (HOL) — Madaxweynaha Somaliland, Axmed Maxamed Maxamuud Siillaanyo, ayaa maanta qasriga madaxtooyadda ku soo dhoweeyey qaar ka mid ah ardayda dugsiyadda sare ee magaaladda Hargeysa.

2013-03-05 7:08 AM EST
Talaado, Maarso 05, 2013 (HOL) — Dagaalyahanno badan oo Al-shabaab ka tirsan ayaa ku dhintay qarax weyn oo shalay gellinkii dambe si lama filaan ah uga dhacay degmada Buulo-burte ee gobolka Hiiraan, iyadoo aanay jirin wax war ah oo Al-shabaab kasoo baxay.

2013-03-05 6:51 AM EST
Talaado, Maarso 05, 2013 (HOL) — Inta la ogyahay 10-qof oo dhinacyadii dagaalamay ah ayaa ku dhintay tiro intaas ka badanna dhaawacyo ayaa kasoo gaaray dagaal culus oo duleedka degmada Afgooye ku dhexmaray ciidamada dowladda Soomaaliya iyo kuwa Al-shabaab.

2013-03-05 5:05 AM EST
Talaado, March 05, 2013(HOL) - Uhuru Kenyatta ayaa wali hogaaminaya doorashada, isagoo helay 54% codadka la tiriyay oo gaaraya 4 milyan oo cod.

2013-03-05 2:11 AM EST
Talaado, Maarso 05, 2013 (HOL) — Tirinta doorashooyinka madaxnimo ee dalka Kenya ayaa waxaa weli ku horreeya Uhuru Muigai Kenyatta oo u tartamaya isbahaysiga Jubilee, iyadoo uu ku xigo ra’iisul wasaarihii Kenya, Raila Amollo Odinga.

2013-03-05 1:28 AM EST
Talaado, Maarso 05, 2013 (HOL) — Hay’adda xuquuqda aadanaha ee Amnesty International ayaa ugu digtay golaha ammaanka ee Qaramada Midoobay inay cunno-qabteynta hubka ee 21-ka sano saaran Soomaaliya ay ka qaadaan, taasoo xubnaha goluhu ay qorsheynayaan inay go’aan ka gaaraan berri oo Arbaco ah.