3/28/2024
Today from Hiiraan Online:  _
Wararka Maanta- Talaado, Mar 5 , 2013
Puntland oo Walaac ka Muujisay in Soomaaliya laga qaado Cunno-qabateynta Hubka ee saaran Muddada dheer


Talaado, Maarso 05, 2013 (HOL) — Golaha wasiirrada Puntland oo maanta isugu yimid kulankoodii toddobaadlaha ahaa ayaa ka hadlay arrimo dhowr ah oo ay ka mid yihiin ammaanka, xaaladda abaaraha iyo maamul u sameynta gobollada Jubbooyinka iyo Gedo.

Fadhiga golaha wasiirada ee maanta oo uu shir gudoominayey madaxweyne ku-xigeenka Puntland Gen. Cabdisamed Cali Shire, waxaa sidoo kale lagu soo qaaday qorshaha uu Maraykanku hormuudka u yahay ee la doonayo in cuna-qabateynta hubka looga qaado Soomaaliya.

Waxaana dood dheer oo goluhu uu arintaas ka yeeshay kaddib, ay isku raaceen in tallaabadaasi ay tahay mid aan xiligan munaasib ahayn, islamarkaana ay khatar badani ka dhalan karto.

Wasiirka warfaafinta ee Puntland Maxamuud Caydiid Dirir oo  kulanka kaddib la hadlay warbaahinta gudaha, ayaa ka warbixiyey qodobadii ugu muhiimsanaa ee lagu soo qaaday.

Wuxuuna sheegay in arimaha sida weyn diiradda loo sooray ay ugu muhiimsanaayeen qorshaha uu golaha ammaanku kaga fiirsanayo in cuna-qabateynta hubka laga qaado Soomaaliya iyo in kale.

Isagoo tilmaamayey mowqifka Puntland ee arintaas ku aadan waxaa hadaladiisii kamid ahaa:

“Dalka xilligan dowlad ka wada arimisaa kama jirto, mana leh ciidamo xooggan oo dalka oo dhan ka howlgala, sidaas darteed waxaa suurtagal ah in haddii xilligan cuna-qabateynta la qaado uu hubku gamco khaldan galo”

Dhinaca kale, waxaa fadhiga todobaadlaha ah ee golaha wasiirrada Puntland ee maanta si weyn loogaga hadlay qorshaha maamulka loogu sameynayo gobollada Jubbooyinka iyo Gedo.

Waxaana lagu taageeray shirka xilligan magaalada Kismaayo ka socda, iyadoo dowladda Federaalka ahna uu goluhu u diray baaq ku aadan in ay joojiso faragelin -la sheegay inay ku hayso-  qorshaha ay gobolladaasi maamulka ku sameysanayaan.

Hadalka Puntland kasoo yeeray ee ku aadan qaadista cuna-qabateynta hubka ee Soomaaliya ayaa imaanaya xilli golaha ammaanka ee Qaramada Midoobey uu maanta yeelanayo fadhi uu go’aan kaga gaarayo in cuna-qabateynta hubka Soomaaliya laga qaado iyo in kale.

Maxamed Salaad Xaaji Dirir, Hiiraan Online
[email protected]
Puntland, Soomaaliya













Click here
3/5/2013 3:38 PM EST
Talaado, March 05, 2013(HOL): Munaasabad lagu soo dhaweynayay Wasiirka Wasaaradda Horumarinta iyo Adeegga Bulshada Drs. Maryan Qaasim ayaa lagu qabtay magaalada London ee caasimadda dalka Britain.

3/5/2013 1:08 PM EST
Talaado, Maarso 05, 2013 (HOL) — Ra'iisal wasaaraha Soomaaliya, Cabdi Faarax Shirdoon ayaa maanta booqday goob maqaaxi ah oo xildhibaanno ka tirsan baarlamaanka ay ku geeriyoodeen, kuwaasoo kala ahaa: Yuusuf Mire Seeraar iyo C/weli Ow-Maxamuud, kadib markii qof waxyaabaha qarxa isku soo xiray uu isku qarxiyay 02, May 2012, xilli ay halkaas xildhibaannadu u joogeen howlo shaqo.

3/5/2013 12:51 PM EST
Talaado, Maarso 05, 2013 (HOL) — Madaxweynaha Soomaaliya, Xasan Sheekh Maxamuud oo safar ku jooga dalka Qatar ayaa khudbad dhinacyo badan taabanaysay ka jeediyay caawa telefishinka Al-jazeera, isagoo markii dambena su’aalo uga jawaabay dadkii dhageysanaya khudbadiisa.

3/5/2013 12:48 PM EST
Tuesday, March 05, 2013 (HOL) - Xilli la sugayo natiijada doorashada ayaa daqiiqado ka hor waxaa xaafada Islii ka dhacay labo qarax oo is daba joog ah.

3/5/2013 11:29 AM EST
Talaado, Maarso 05, 2013 (HOL) — Ra'iisal wasaaraha Soomaaliya, Cabdi Faarax Shir-doon (Saacid) iyo wafdi ballaaran oo uu hoggaaminayo ayna ka mid yihiin guddoomiye ku-xigeenka koowaad ee baarlamaanka, Jeylaani Nuur Iikar, wasiirada arrimaha gudaha, gaashaandhigga, wasiir ku xigeenno, xildhibaanno iyo saraakiil ciidan ayaa gaaray degmada Caabudwaaq ee gobolka Galgaduud.

3/5/2013 9:00 AM EST
Talaado, Maarso 05, 2013 (HOL) — Maxkamadda ciidamada qalabka sida ee Puntland - laanteeda gobollada Bari, Karkaar iyo Sanaag- ayaa maanta xukun ku riddey sadex nin oo dhalinyaro ah, kuwaas oo lagu soo eedeeyey in ay ka tirsanaayeen ururka Al-shabaab.

3/5/2013 8:59 AM EST
Talaado, Maarso 05, 2013 (HOL) — Kooxo hubeysan ayaa xalay gurigiisa ka kaxaystay wiil dhallinyaro ah oo lagu magacaabi jiray, Maxamed Nuur Shacbaan oo 20-jir ahaa iyagoo toogtay markii ay guriga u jirsadeen hal KM, iyadoo ku dhuftay rasaas badan oo keentay in lagu aaso halkii lagu dilay.

3/5/2013 7:12 AM EST
Talaado, Maarso 05, 2013 (HOL) — Madaxweynaha Somaliland, Axmed Maxamed Maxamuud Siillaanyo, ayaa maanta qasriga madaxtooyadda ku soo dhoweeyey qaar ka mid ah ardayda dugsiyadda sare ee magaaladda Hargeysa.

3/5/2013 7:08 AM EST
Talaado, Maarso 05, 2013 (HOL) — Dagaalyahanno badan oo Al-shabaab ka tirsan ayaa ku dhintay qarax weyn oo shalay gellinkii dambe si lama filaan ah uga dhacay degmada Buulo-burte ee gobolka Hiiraan, iyadoo aanay jirin wax war ah oo Al-shabaab kasoo baxay.

3/5/2013 6:51 AM EST
Talaado, Maarso 05, 2013 (HOL) — Inta la ogyahay 10-qof oo dhinacyadii dagaalamay ah ayaa ku dhintay tiro intaas ka badanna dhaawacyo ayaa kasoo gaaray dagaal culus oo duleedka degmada Afgooye ku dhexmaray ciidamada dowladda Soomaaliya iyo kuwa Al-shabaab.

3/5/2013 5:05 AM EST
Talaado, March 05, 2013(HOL) - Uhuru Kenyatta ayaa wali hogaaminaya doorashada, isagoo helay 54% codadka la tiriyay oo gaaraya 4 milyan oo cod.

3/5/2013 2:11 AM EST
Talaado, Maarso 05, 2013 (HOL) — Tirinta doorashooyinka madaxnimo ee dalka Kenya ayaa waxaa weli ku horreeya Uhuru Muigai Kenyatta oo u tartamaya isbahaysiga Jubilee, iyadoo uu ku xigo ra’iisul wasaarihii Kenya, Raila Amollo Odinga.

3/5/2013 1:28 AM EST
Talaado, Maarso 05, 2013 (HOL) — Hay’adda xuquuqda aadanaha ee Amnesty International ayaa ugu digtay golaha ammaanka ee Qaramada Midoobay inay cunno-qabteynta hubka ee 21-ka sano saaran Soomaaliya ay ka qaadaan, taasoo xubnaha goluhu ay qorsheynayaan inay go’aan ka gaaraan berri oo Arbaco ah.