2014-04-17
Today from Hiiraan Online:  _
Wararka Maanta- Talaado, Mar 5 , 2013
Dagaal khasaare badan geystay oo Cidamada Dowladda iyo kuwa Al-shabaab ku dhexmaray Duleedka Afgooye

Talaado, Maarso 05, 2013 (HOL) — Inta la ogyahay 10-qof oo dhinacyadii dagaalamay ah ayaa ku dhintay tiro intaas ka badanna dhaawacyo ayaa kasoo gaaray dagaal culus oo duleedka degmada Afgooye ku dhexmaray ciidamada dowladda Soomaaliya iyo kuwa Al-shabaab.

Dagaalkan ayaa qarxay markii xoogagga Al-shabaab ay weerar lama filaan ah ku qaadeen ciidammo ku sugnaa koontarool lacago looga qaado gaadiidka, iyadoo dagaalku uu socday muddo saacad ka badan.

“Hub kala duwan ayay labada dhinac adeegsanayeen, waxaan aragnay 10 dhinacyadii dagaalamay ah oo goobta ku dhintay, toddoba ka mid ah waxay ahaayeen ciidamadii dowladda ee goobta ku sugnaa,” ayuu yiri goobjooge ku sugan deegaanka Tixsiile oo dagaalkan uu ka dhacay.

Mas’uul u hadlay maamulka gobolka Shabeellada Hoose si kooban uga hadlay dagaalka ayaa sheegay inay ku dileen afar dagaalyahan oo Al-shabaab ka tirsan ayna ku qabsadeen gaari dagaal oo ay Al-shabaab wateen, isagoo xusay in dhankooda aysan jirin khasaare kasoo gaartay dagaalka.

Sarkaalka u hadlay maamulka gobolka oo lagu magacaabo Mahdi Xasan ayaa ku daray hadalkiisa in ciidamada ay dagaalka la galeen ay ahaayeen kuwii kasoo baxay degmada Buur-hakaba, isagoo xusay in goobtii uu ka dhacay dagaalka ay iyagu ku sugan yihiin.

Al-shabaab kama aysan hadlin weli dagaalka ay la gashay ciidamada dowladda Soomaaliya, iyadoo Al-shabaab ay dagaalladeeda u bedeshay kuwo ku-dhufo-oo-ka-dhaqaaq ah, kuwaasoo ay ku qaadeen saldhigyada ay ciidamada dowladda iyo kuwa AMISOM ku leeyihiin gobollada dalka qaarkood.

Sannad iyo barkii lasoo dhaafay Xarakada Al-shabaab waxaa laga qabsaday degmooyin badan oo ay gacfanta ku hayeen, kuwaasoo ayka mid yihiin degmooyinka Kismaayo iyo Baydhabo oo ay xoog badan ku lahaayeen.

Maxamed Xaaji Xuseen, Hiiraan Online
maxuseen@hiiraan.com
Muqdisho, Soomaaliya





Post your comments

2013-03-05 3:38 PM EST
Talaado, March 05, 2013(HOL): Munaasabad lagu soo dhaweynayay Wasiirka Wasaaradda Horumarinta iyo Adeegga Bulshada Drs. Maryan Qaasim ayaa lagu qabtay magaalada London ee caasimadda dalka Britain.

2013-03-05 1:08 PM EST
Talaado, Maarso 05, 2013 (HOL) — Ra'iisal wasaaraha Soomaaliya, Cabdi Faarax Shirdoon ayaa maanta booqday goob maqaaxi ah oo xildhibaanno ka tirsan baarlamaanka ay ku geeriyoodeen, kuwaasoo kala ahaa: Yuusuf Mire Seeraar iyo C/weli Ow-Maxamuud, kadib markii qof waxyaabaha qarxa isku soo xiray uu isku qarxiyay 02, May 2012, xilli ay halkaas xildhibaannadu u joogeen howlo shaqo.

2013-03-05 12:51 PM EST
Talaado, Maarso 05, 2013 (HOL) — Madaxweynaha Soomaaliya, Xasan Sheekh Maxamuud oo safar ku jooga dalka Qatar ayaa khudbad dhinacyo badan taabanaysay ka jeediyay caawa telefishinka Al-jazeera, isagoo markii dambena su’aalo uga jawaabay dadkii dhageysanaya khudbadiisa.

2013-03-05 12:48 PM EST
Tuesday, March 05, 2013 (HOL) - Xilli la sugayo natiijada doorashada ayaa daqiiqado ka hor waxaa xaafada Islii ka dhacay labo qarax oo is daba joog ah.

2013-03-05 11:29 AM EST
Talaado, Maarso 05, 2013 (HOL) — Ra'iisal wasaaraha Soomaaliya, Cabdi Faarax Shir-doon (Saacid) iyo wafdi ballaaran oo uu hoggaaminayo ayna ka mid yihiin guddoomiye ku-xigeenka koowaad ee baarlamaanka, Jeylaani Nuur Iikar, wasiirada arrimaha gudaha, gaashaandhigga, wasiir ku xigeenno, xildhibaanno iyo saraakiil ciidan ayaa gaaray degmada Caabudwaaq ee gobolka Galgaduud.

2013-03-05 10:51 AM EST
Talaado, Maarso 05, 2013 (HOL) — Golaha wasiirrada Puntland oo maanta isugu yimid kulankoodii todobaadlaha ahaa ayaa ka hadlay arimo dhowr ah oo ay kamid yihiin ammaanka, xaaladda abaaraha iyo maamul u sameynta gobollada Jubbooyinka iyo Gedo.

2013-03-05 9:00 AM EST
Talaado, Maarso 05, 2013 (HOL) — Maxkamadda ciidamada qalabka sida ee Puntland - laanteeda gobollada Bari, Karkaar iyo Sanaag- ayaa maanta xukun ku riddey sadex nin oo dhalinyaro ah, kuwaas oo lagu soo eedeeyey in ay ka tirsanaayeen ururka Al-shabaab.

2013-03-05 8:59 AM EST
Talaado, Maarso 05, 2013 (HOL) — Kooxo hubeysan ayaa xalay gurigiisa ka kaxaystay wiil dhallinyaro ah oo lagu magacaabi jiray, Maxamed Nuur Shacbaan oo 20-jir ahaa iyagoo toogtay markii ay guriga u jirsadeen hal KM, iyadoo ku dhuftay rasaas badan oo keentay in lagu aaso halkii lagu dilay.

2013-03-05 7:12 AM EST
Talaado, Maarso 05, 2013 (HOL) — Madaxweynaha Somaliland, Axmed Maxamed Maxamuud Siillaanyo, ayaa maanta qasriga madaxtooyadda ku soo dhoweeyey qaar ka mid ah ardayda dugsiyadda sare ee magaaladda Hargeysa.

2013-03-05 7:08 AM EST
Talaado, Maarso 05, 2013 (HOL) — Dagaalyahanno badan oo Al-shabaab ka tirsan ayaa ku dhintay qarax weyn oo shalay gellinkii dambe si lama filaan ah uga dhacay degmada Buulo-burte ee gobolka Hiiraan, iyadoo aanay jirin wax war ah oo Al-shabaab kasoo baxay.

2013-03-05 5:05 AM EST
Talaado, March 05, 2013(HOL) - Uhuru Kenyatta ayaa wali hogaaminaya doorashada, isagoo helay 54% codadka la tiriyay oo gaaraya 4 milyan oo cod.

2013-03-05 2:11 AM EST
Talaado, Maarso 05, 2013 (HOL) — Tirinta doorashooyinka madaxnimo ee dalka Kenya ayaa waxaa weli ku horreeya Uhuru Muigai Kenyatta oo u tartamaya isbahaysiga Jubilee, iyadoo uu ku xigo ra’iisul wasaarihii Kenya, Raila Amollo Odinga.

2013-03-05 1:28 AM EST
Talaado, Maarso 05, 2013 (HOL) — Hay’adda xuquuqda aadanaha ee Amnesty International ayaa ugu digtay golaha ammaanka ee Qaramada Midoobay inay cunno-qabteynta hubka ee 21-ka sano saaran Soomaaliya ay ka qaadaan, taasoo xubnaha goluhu ay qorsheynayaan inay go’aan ka gaaraan berri oo Arbaco ah.