2014-11-26
Today from Hiiraan Online:  _
Wararka Maanta- Isniin, Mar 4 , 2013
Xukuumadda Seychelles oo Maxaabiis ku xukuman Burcadbadeednimo kusoo wareejisay Dowladda Puntland [SAWIRRO]



Isniin, Maarso 04, 2013 (HOL) — Waxaa duhurnimadii maanta garoonka magaalada Boosaaso soo caga dhigatay diyaarad siddey sagaal maxbuus oo Soomaali ah, kuwaas oo loo qabtay ku lug lahaanshaha falal burcad-badeednimo.

Maxaabiistan oo dhamaantood Soomaali ah ayaa muddo ku xirnaa xabsiyo ku yaalla jasiirada Seychelles, halkaas oo la geeyey kaddib markii  ciidamada caalamiga ah ee la dagaalanka burcad-badeedku ay qabteen.

Mas'uuliyiin ka tirsan dowladda Puntland oo uu horkacayey wasiirka dekedaha, gaadiidka badda iyo la-dagaalanka burcad-badeedka Eng. Siciid Maxamed Raage, ayaa garoonka kula wareegey maxaabiistan oo ay weheliyeen mas'uuliyin ka tirsan waaxda la-dagaalanka burcad-badeedka ee Seychelles.

Wasiirka oo garoonka dhexdiisa warbaahinta kula hadlay ayaa  ka warbixiyey qaabkii ay ku suurtagashay in maxaabiistan burcad-badeednimada ku xukuman Puntland lagu soo wareejiyo, wuxuuna tilmaamay in arintani ay tahay mid ay horay labada dhinac -Seychelles iyo Puntland- ugu heshiiyeen.

Mar la weydiiyey ujeedada laga leeyahay wuxuu xusay in ay tahay si maxaabiistan, maadaama ay Soomaali yihiin fursad loogu siiyo in xukunkooda inta uga dhiman ay dalkooda ku qaataan, haseyeeshee aan wax isbedel ah haba yaraatee lagu sameyn doonin xukunkii horay ugu dhacay.

Hanry Joseph oo ah kaaliyaha Booliska Seychelles ee dhanka la-dagaalanka burcad-badeedka, islamarkaana weheliyey maxaabiista maanta Boosaaso laga soo dejiyey ayaa isna dhankiisa si weyn ugu mahad celiyey dowladda Puntland, wuxuuna tilmaamay in tallaabadani ay hordhac u tahay heshiis ay Seychelles iyo Puntland horay u kala saxiixdeen.

Maxaabiista qaarkood oo iyaguna warbaahinta si kooban ula hadlay ayaa muujiyey dareen farxad leh oo ku aadan in ay dalkooda hooyo dib ugu soo laabtaan, waxayna ammaan u jeediyeen dowladda Seychelles iyo maamulka Puntland.

Sagaalka nin ee maanta magaalada Boosaaso laga soo dejiyey waxay hordhac u yihiin 25-nin oo burcad-badeednimo ku xukuman, kuna jira xabsiyo ku yaalla jasiiradda Seychelles, kuwaasoo ay horay maamulka Puntland iyo Seychelles ugu heshiiyeen in inta xukunkooda ku dhiman ay ku qaataan xabsiyada waaweyn ee Puntland.


Maxamed Salaad Xaaji Dirir, Hiiraan Online
xaajidirir@hiiraan.com
Puntland, Soomaaliya





Post your comments

2013-03-04 3:25 PM EST
Halkaan ka daawo (Video) kulankii madaxweyne Xasan Sheekh iyo Amiirka dalka Qadar Hamad Bin Khalifa uu kula kulamy magaalada Dooxa.

2013-03-04 1:27 PM EST
Isniin, March 04, 2013 (HOL) - Uhuru Kenyatta oo hogaamiya isbahaysiga Jubilee ayaa ku horreeya codadka ilaa iyo haatan la tiriyay.

2013-03-04 12:19 PM EST
Isniin, Maarso 04, 2013 (HOL) —Hotel casri ah ayaa maanta laga hirgaliyay magaalada Boorama ee gobolka Awdal, waxaana furintaankii hoteelkan oo lagu magcaaabo Ramada ka qaybgalay dadweynaha degmada, waxgarad iyo mas’uuliyiin kala duwan.

2013-03-04 11:13 AM EST
Isniin, Maarso 04, 2013 (HOL) — Ra'iisal wasaaraha Soomaaliya, Cabdi Faarax Shirdoon (Saacid) iyo wafdi ballaaran oo uu hoggaaminayo ayna ka mid yihiin guddoomiye ku-xigeenka koowaad ee baarlamaanka, Jeylaani Nuur Iikar, wasiirada arrimaha gudaha, wasiirka gaashaandhiga, wasiir ku xigeenno, xildhibaanno iyo saraakiil ciidan ayaa maanta gaaray degmada Dhuusamareeb ee xarunta gobolka Galgaduud.

2013-03-04 9:21 AM EST
Isniin, March 04, 2013(HOL) - Kumannaan Soomaali ah oo ku nool degmada Kamakunji, gaar ahaanna xaafada Islii ayaa galay safafka dhaadheer oo inta badan codbixiyayaasha dalka Kenya oo dhan ay taagnaayeen maanta.

2013-03-04 9:08 AM EST
Isniin, Maarso 04, 2013 (HOL) — Madaxweynaha Soomaaliya, Xasan Sheekh Maxamuud iyo wafdigii uu hoggaaminayay ayaa maanta la kulmay Amiirka dalka Qadar Amiir Hamad Bin-Khalifah Al-Thani, kaasoo ay uga hadleen sidii iskaashi guud oo dhan walba ah uu u dhexmari lahaa Soomaaliya iyo Qadar.

2013-03-04 8:48 AM EST
Isniin, Maarso 04, 2013 (HOL) — Ciidamada Booliiska Somaliland, ayaa shalay xabsiga u taxaabay Sheekh Maxamuud Cabdillaahi Geelle, ka dib markiii uu dhaliilo usoo jeediyey wasiirka Arrimaha gudaha Maxamed Nuur Caraale Duur iyo wasiirka Maaliyadda Somaliland Cabdicasiis Samaale.

2013-03-04 7:23 AM EST
Isniin, March 04, 2013 (HOL) - Xaafada Islii oo ah goob ay ku yaallaan ganacsiyada waawayn ee Soomaalidu ay ku leedahay Kenya ayaa si habsami leh ay u socotaa codbixintu.

2013-03-04 7:18 AM EST
Isniin, Maarso, 04, 2013 (HOL) – Wafdi uu horkacayo ra’iisal wasaaraha xukuumada Soomaaliya Cabdi Faarax Shirdoon Saacid ayaa goor dhaw gaaray degmada Dhuusa-mareeb ee gobolka Galguduud

2013-03-04 4:00 AM EST
Isniin, March 04, 2013 (HOL) - 14 milyan oo ah muwaadiniinta u dhashay dalka Kenya ayaa saaka 6-dii subaxnimo loo furay goobaha codbixinta si ay codkooda u dhiibtaan.

2013-03-04 1:58 AM EST
Isniin, Maarso 04, 2013 (HOL) — Kooxo hubeysan oo aan heybtooda la aqoon ayaa xalay fiidkii gudaha magaalada Kismaayo ku dilay laba askari oo katirsanaa ciidamada dowladda Soomaaliya.

2013-03-04 12:35 AM EST
Isniin, Maarso 04, 2013 (HOL) — Kooxo bastoolado ku hubeysan ayaa ku dilay saakay oo Isniin ah xaafadda Nnasteexo ee degmada Wadajir gabar ka howlgalaysay mid ka mid ah isbitaallada gaarka loo leeyahay ee ku yaalla magaalada Muqdisho.

2013-03-04 12:13 AM EST
Isniin, Maarso 04, 2013 (HOL) — Ugu yaraan 11-qof oo shan ka mid ay ahaayeen ciidammo booliis ah ayaa ku dhintay rabshado siyaabo kala duwan xalay uga dhacay degmada Gaarisa ee gobolka Waqooyi-bari ee Kenya iyo magaalada xeebta ku taalla ee Mombassa, iyadoo doorashooyinkii ay si caadi ah saakay uga billowdeen.

2013-03-04 12:12 AM EST
Isniin, Maarso 04, 2013 (HOL) — Madaxweynaha Soomaaliya, Xasan Sheekh Maxamuud iyo wafdi uu hoggaaminayo ayaa xalay gaaray magaalada Dooxa ee dalka Qatar, halkaasoo uu kula kulmi doono mas’uuliyiinta dalka Qatar.

2013-03-04 12:10 AM EST
Isniin, Maarso 04, 2013 (HOL) — Waxgaradka degmada Xuddun ee gobolka Sool ayaa si aad ah uga dayriyay xaaladda nololeed ee dadka ku sugan degmadaas oo marba marka kasii dambaysa sii xoogaysanaysa, kaddib xiisad colaadeed oo dhexmara ciidamada Somaliland iyo kuwa Khaatumo ee isku-horfadhiya deegaankaas.