2014-10-24
Today from Hiiraan Online:  _
Wararka Maanta- Jimco, Mar 29, 2013
Madaxweynaha Soomaaliya oo Magaalada Dubai kula Kulmay Caawa Mas'uul ka tirsan Dowladda Imaaraadka Carabta (SAWIRRO)



Jimco, Maarso 29, 2013 (HOL) — Madaxweynaha Soomaaliya, Xasan Sheekh Maxamuud ayaa maanta safar shaqo ku tagay dalka Imaaraadka Carabta oo ka mid ah dalalka ku yaalla Khaliijka Carabta, isagoo caawa wadahadallo la yeeshay dhaxal-sugaha dalkaas, Maxamed Bin Zayed Al-Nahyan, iyagoo uga hadlay kulankooda arrimo la xiriira: ammaanka, dib u heshiisiinta harumarka iyo siyaasadda.

Kulankan ayaa waxaa goobjoog ka ahaa: ra’iisul wasaare ku xigeenka ahna wasiiradda arrimaha dibadda Soomaaliya, Fowziyo Yuusuf Xaaji Aadan, wasiirka maaliyadda iyo qorsheynta, Maxamuud Xasan Suleymaan, wasiir-u-dowlaha madaxtooyada Faarax Sheekh Cabdulqaadir, wasiir-u-dowlaha wasaaradda arrimaha dibadda, Dr. Maxamed Nuur Gacal iyo danjiraha Soomaaliya u fadhiya Imaaraadka Carabta, C/qaadir Sheekey Al-Xaatimi.

Intii ay wadahadalladu socdeen madaxweynuhu wuxuu ka warbixiyay horumarka dhinaca ammaanka ah ee ay Soomaaliya ku tallaabsatay, iyo dib u soo laabashada deggenaasha qaybo badan oo Soomaaliya ka tirsan.

“Waxaan doonaynaa horumar intaas ka badan iyo in deggenaashaha dalka la xoojiyo. Sidoo kale waxaa socda dib u habeyn lagu sameynayo ciidamada ammaanka. Ciidamadeennu hadda waxay ku jiraan tababar, dhawaanna waxay awoodi doonaan inay howshooda u gutaan si hufan u gutaan,” ayuu yiri madaxweynaha Soomaaliya.



Sidoo kale, madaxweynuhu wuxuu hadalkiisa ku daray: “Xukuumaddu waxay ku howlan tahay inay ka hir-geliso deegaanno ku yaalla dalka mashaariic loogu talogalay horumarinta adeegyada bulshada. Waxaana ka dhisaynaa deegaannadaas shan mashruuc oo kala ah: isbitaallo, iskuullo, xarumaha maamulka, saldhigyada booliiska iyo ceelal degmo walba laga hirgelinayo, si dadkeennu u helaan adeegyada aasaasiga ah.”

Madaxweynaha ayaa uga mahadceliyay madaxda iyo shacabka Imaaradka Carabta taageeradoodii hagar la’aanta ahayd ee ay siiyeen Soomaaliya iyo gacanta ay ka geysteen dib u heshiisiinta.

Ugu dambeyn, kulanka ayaa waxaa lagu gaaray heshiis ah in Imaaraadka Carabta ay dib uga furato Soomaaliya safaaraddeedii kaddib 22-sano oo ay xirnayd. Tallaabadan ayaa waxay muhiim u tahay xoojinta xiriirka labada dal u dhexeeya. Safaaradda Soomaaliya ee dalka Imaaraadka Carabta ayaa si caadi ah u shaqeynaysay labaatankii sano ee lasoo dhaafay.

Maxamed Xaaji Xuseen, Hiiraan Online
maxuseen@hiiraan.com
Muqdisho, Soomaaliya





Post your comments

2013-03-29 3:44 PM EST
Khamiis, Maarso 28, 2013 (HOL) - Duqa magaalada Ottawa ee dalka Kanada Jim Watson oo ay wehliyaan xubno ka tirsan madaxda degaanada magaalada Ottawa ayaa guddoonsiiyey Fartuun Cabdisalaam Adan abaalmarin ay ku muteysatay howlaha sama-falka oo ay ka waddo magaalada Moqdisho. Xafladdaas oo ay soo abaabuleen hay'adda "City for All Women Initiative" laguna qabtay xaruunta magaalada Ottawa (City Hall)

2013-03-29 1:29 PM EST
Jimco, Maarso 29, 2013 (HOL) — Roobabkan oo billowday saqdii dhexe ee xalay oo socday illaa barqonimadii maanta ayaa waxay ka da’een deegaanno iyadoo degaannadaas ay kasoo baxayaan in roobabku ay geysteen khasaare isugu jirta naf iyo maal.

2013-03-29 12:49 PM EST
Jimco, Maarso 29, 2013 (HOL) — Ra'iisul wasaaraha Soomaaliya, Cabdi Faarax Shirdoon (Saacid) iyo wafdigii uu hoggaaminayay oo gellinkii dambe ee maanta dib ugu soo laabtay Muqdisho, ayaa warbaahinta uga warbixiyay natiijada kasoo baxday wadahalladii Kismaayo iyo kulamadii uu la qaatay qaybaha kala duwan ee bulshada Kismaayo.

2013-03-29 10:29 AM EST
Jimco, 29 Maarso, 2013(HOL) :- Ciidamo aad u tiro badan oo katirsan dowladda Soomaaliya islamarkaasina mudooyinkii u danbeeyay ku sugnaa duleedka magaalada ayaa maanta gudaha usoo galay magaalada Kismaayo, iyadoona ciidamadani la dajiyay saldhigyo ku yaal gudaha magaalada.

2013-03-29 10:13 AM EST
Jimco, 29 Maarso, 2013(HOL) - Wafdigii uu hogaaminayay ra’isul wasaaraha dowladda Federaalka Soomaaliya ee maalmihii ugu danbeeyay ku sugnaa magaalada Kismaayo ayaa maanta dib ugu laabtay magaalada Muqdisho ee caasimadda dalka Soomaaliya.

2013-03-29 3:47 AM EST
Jimco, Maarso 29, 2013 (HOL) — Xaflad ballaaran oo lagu sagootinayey 135 arday oo ka qalin jebiyey fasalka afraad ee dugsiga sare ayaa shalay galab ka dhacday xarunta dugsiga sare Imaamu Shaafici ee magaalada Boosaaso.

2013-03-29 3:34 AM EST
Jimco, Maarso 29, 2013 (HOL) — Madaxweynaha Soomaaliya ayaa sheegay inay socdaan baaritaanno ku saabsan eedeymaha ku saabsan in ciidamada dowladda ay dhibaatooyin u geystaan shacabka Soomaaliyeed oo ay ahayd inay difaacaan, isagoo xusay in haddii askari lagu helo dambi wax laga weydiin doono sarkaalkii xukumayay.

2013-03-29 3:05 AM EST
Jimco, Maarso 29, 2013 (HOL) — Ururka Qaranka Suxufiyiinta Soomaaliyeed ee NUSOJ ayaa soo dhaweeyay xukunkii ay maxkamadda ciidamada ku ridday gacan ku dhiiglihii dilay wariye Xasan Yuusuf Absuge, iyadoo xoghayah guud ee NUSOJ, Cumar Faaruuq uu xukunkaas ku tilmaamay mid hoos u dhigaya dilalka loo geystay suxufiyiinta Soomaaliyeed.

2013-03-29 2:29 AM EST
Jimco, Maarso 29, 2013 (HOL) — Wadahadalladii u dhexeeya xukuumadda Soomaaliya iyo maamulka KMG ah ee Kismaayo ayaa guul-darro ku dhammaaday kaddib markii la isku fahmi waayay wadahadallo socday shantii maalmood ee lasoo dhaafay.

2013-03-29 1:58 AM EST
Jimco, Maarso 29, 2013 (HOL) — Dhallinyaro kooxo-kooxo u abaabulan ayaa la sheegay inay dhibaatooyin isugu jira dhac iyo kufsi ka geystaan xilliyada habeenkii ah magaalada Hargeysa ee xarunta Somaliland, iyadoo taliyaha booliiska uu sheegay inay xirxireen kooxo kuwaas ka mid ah.

2013-03-29 1:42 AM EST
Jimco, Maarso 29, 2013 (HOL) — Madaxweynaha Soomaaliy, Xasan Sheekh Maxamuud ayaa sheegay inay rajeynayaan inay helaan hubkii ugu horreeyay tan iyo markii laga qaaday cunno-qabateyntii hubka ee saarnayd Soomaaliya in ka badan 20 sano, si ay u xoojiaan ciidamadooda dagaalka kula jira Al-shabaab.