2014-07-23
Today from Hiiraan Online:  _
Wararka Maanta- Arbaco, Mar 27, 2013
Hay’adda Human Rights Watch oo sheegtay in Ciidamada Dowladda ay Kufsi u geystaan Haweenka Barkacayaasha ah



Arbaco, Maarso 27, 2013 (HOL) — Warbixin ay soo saartay Hay’adda xaquuqda aadanaha ee Human Rights Watch ayaa sheegtay in ciidamda dowladda iyo dabley hubeysan ay kufsi u geystaan haweenka ku jira xeryaha barakacayaasha ee ku yaalla Muqdisho, iyadoo dowladda ka dalbaday inay ka shaqeyso sidii ammaanka barakacyaasha loo xaqiijin lahaa.

Hay’addu waxay sheegtay in dhibaatooyinka ugu badan ay geystaan kooxo isku xiran oo ay ku sheegtay ciidamada dowladda, dabely taabacsan iyo horjoogayaasha kaamamka ay geystaan dhibaatooyinka.

Warbixinta hay’adda oo ka koobnayd 80-bog ayaa waxaa laga soo ururiyay 70-qof oo wareysiyo kala duwan lala yeeshay, iyadoo ha’yaddu sheegtay inay jiraan dhibbanayaal badan aysan dhibaatadii gaartay sheegi Karin sababo la xiriira inay ka baqayaan in aargoosi ay u geystaan kooxihii markii hore dhibaateeyay.

“Dhibbanayaasha aan sheegin wixii loo geystay waxay kaloo ka baqayaan in lagu ceebeeyo bulshada dhexdeeda, taasoo hakisay in dhibbanayaal badan ay sheegi waayaan gabood-falladii loo geystay,” ayaa lagu yiri warbixinta ay soo saartay HRW.

Sidoo kale, hay’addu waxay sheegtay in dadka dhibaatada loo geystay ay yihiin kuwii caasimadda soo gaaray 2011 xilliyadii ay dhaceen abaaro aad u daran oo sababay macluusha, dadkaasna ay filayeen inay nabad–galaan balse ay la kulmeen dhibaatooyin.

Hay’addu waxay ugu baaqday dowladda Soomaaliya inay wax ka qabato guul-darrooyinkii ayna k shaqeyso badbaadinta dadka barakacayaasha ah ayna la xisaabtanto xubnaha ciidamada dowladda ka tirsan ee dadka kale ee mas’uulka ka ah kufsiga.

Warbixinta ayaa lagu sheegay in haweeney iyo gabadheeda oo uur leh ay mar qura kufsadeen saddex ka mid ah askarta ciidamada dowladda oo hub sitay, iyadoo sheegtay in dhibaatooyin badan loo geystay.

Haweeney kale oo magaceeda kusoo koobtay Sacdiyo ayaa iyaduna HRW u sheegtay in la kufsaday lagana toogtay mid ka mid ah lugaheeda, iyadoo ku sheegtay hadalkeeda in kufsiga iyo xabbadu ay isku xanuun ahaayeen.

Dowladda Soomaaliya ayaan weli ka hadlin warbixinta ay hay’adda xuquuqda aadanaha ee HRW ku sheegtay in ciidamada dowladda ay weli kufsi ka geystaan xeryaha ay ku jiraan barkacayaasha ee ku yaalla Muqdisho.

Maxamed Xaaji Xuseen, Hiiraan Online
maxuseen@hiiraan.com
Muqdisho, Soomaaliya





Post your comments

2013-03-27 1:23 PM EST
Arbaco, Maarso 27, 2013 (HOL) — Madaxweynaha Somaliland Mudane Axmed Maxamed Maxamuud (Siilaanyo) iyo weftigii uu Hoggaaminayay, ayaa galabta dalka dib ugu soo laabtay ka dib markii uu soo dhamaystay safar shaqo oo shan maalmood qaatay oo uu ku tagay dalka Imaaraadka carabta.

2013-03-27 1:09 PM EST
Arbaco, Maarso 27, 2013 (HOL) — Kaddib muddo dib u dhac ah ayaa lagu wadaa in ciidammo ka socda dalka Sierra Leone ay ka mid noqdaan howgalka ciidamada Midowga Afrika ee AMISOM, kuwaasoo ku sugan qaybo ka mid ah dalka Soomaaliya.

2013-03-27 12:20 PM EST
Arbaco, Maarso 27, 2013 (HOL) — Hay’adda caalamiga ah ee shaqada (ILO) iyo hay'adda horumarinta haweenka Soomaaliyeed ee IIDA ayaa maanta ku qabatay Muqdisho dabaal-deg loo sameeyay bisha ganacsiga haweenka Soomaaliyeed, Women Entrepreneur (MOWE). Waxaana halkaas lagu soo bandhigay ganacsiyo yaryar iyo kuwo dhexe oo ay haweenku ka shaqeystaan oo soo jiirtay dadkii kasoo goobtaas ku sugnaa.

2013-03-27 10:50 AM EST
Arbaco, 27 Maarso, 2013(HOL) :- Maamulka KMG ee magaalada Kismaayo ayaa ka warbixiyay xaaladda ammaan ee magaalada Kismaayo iyo weliba shirar ay mudooyinkii u danbeeyay gudaha magaalada kismaayo ku qaadanayeen wafdi ka socday dowladda Soomaaliya oo uu horkacayo ra'isul wasaaraha Soomaaliya iyo masuuliyiinta maamulka KMG ee kismaayo.

2013-03-27 10:03 AM EST
Arbaco, Maarso 27, 2013 (HOL) — Afhayeenka Al-Shabaab, Sheekh Cali Maxamuud Raage (Cali Dheere) ayaa ka warbixiyay xaaladda dalka iyo dagaallada ay kula jiraan dowladda iyo caawinaya iyo la wareegistii degmada Xudur ee xarunta gobolka Bakool.

2013-03-27 9:41 AM EST
Arbaco, Maarso 27, 2013 (HOL) — Kooxo hubeysan oo ka kooban shan qof ayaa dhac u geystay baqonimadii maanta xarunta shirkadda xawaaladda Kaah ay ku leedahay magaalada Boosaaso ee xarunta gobolka Bari, iyadoo lagu dilay halkaas maamulkii xaruntaas iyo mid ka mid ah waardiyeyaasha.

2013-03-27 9:28 AM EST
Arbaco, Maarso 27, 2013 (HOL) — illaa laabtan xidhibaan oo ka tirsan baarlamaanka Soomaaliya ayaa maanta gaaray degmada Jowhar ee xarunta gobolka Shabeellada dhexe, iyagoo kulammo la qaatay maamulka gobolka iyo kan degmada.

2013-03-27 9:10 AM EST
Arbaco, Maarso 27, 2013 (HOL) — Maxamadda rafcaanka Ciidamadda Militariga, ayaa dib u eegis ku samaynaysa go’aankii maxkamadda hore ugu xukuntay 17 qof oo sanadkii hore soo weerartay xero ciidanka militarig ku leeyihiin bariga magaaladda Hargeysa.

2013-03-27 3:16 AM EST
Arbaco, Maarso 27, 2013 (HOL) —Al-shabaab iyo Raaskabooni ayaa guulo kala kala sheegtay dagaal shalay ka dhacay degmada Afmdow ee gobolka Jubbada Hoose oo ay Al-shabaab gudaha ugu gashay degmadaas kuna sugnayd muddo kooban.

2013-03-27 2:15 AM EST
Arbaco, Maarso 27, 2013 (HOL) — Wasiirka arrimaha dibadda ee Somaliland Maxamed Cabdullaahi Cumar oo ka jawaabayay warar ku saabsa inay Dubai ku kulmi doonaan madaxweynaha Soomaaliya, Xasan Sheekh Maxamuud iyo madaxweynaha Somaliland, Axmed Maxamed Maxamuud (Siilaanyo) ayaa sheegay inuusan jirin kulan dhexmari doona labada madaxweyne.