2014-11-23
Today from Hiiraan Online:  _
Wararka Maanta- Isniin, Mar 25, 2013
Wasiirka Gaashaandhigga Soomaaliya oo Maanta Kormeeray Xerooyin Ciidan oo ku yaalla Magaalada Kismaayo (SAWIRRO)



Isniin, Maarso 25, 2013 (HOL) — Wasiirka gaashaandhigga Soomaaliya, Cabdixakiin Maxamuud Xaaji Fiqi ayaa galabta booqday xerooyin ciidan oo ku yaalla magaalada Kismaayo ee xarunta gobolka Jubbada Hoose, waxaana kormeerkiisan ku wehliyay sarkaalka ugu sareeya ciidammada Kenya ee qeybta ka ah AMISOM iyo saraakiisha ugu sarreysa ciidammada Xoogga dalka ee Kismaayo ku sugan.

Wasirka ayaa ugu horreyntii booqday xaruntii ciidamada Shiirkolo oo haatan saldhig u ah ciidamada xoogga, gaar ahaana qaybta labaad, waxaana halkaa uu kula kulmay saraakiisha ugu sarreysa ciidamada iyagoo uga warbixiyay xaaladaha nololeed ee ciidanka, waxayna si gaar ah uga warrameen dayactir lagu sameeyay qeybo ka mid ah xaruntan.

C/xakiin Fiqi ayaa kormeeray ceelal dhawaan laga qoday xerada iyo dhismayaal si KMG ah loogu diyaariyay inay ku shaqeeyaan ciidamada, isagoo sidoo kale  kormeer ku tagay madaxtooyadii hore ee Kismaayo; halkaasoo iyadana ay ku sugan yihiin ciidammo ka tirsan kuwa maamulka Raas-kaambooni.

Sidoo kale, wasiirka oo markii uu soo gabagabeeyay kormeerka la hadlay warbaahinta ayaa u sheegay in kulammo kala duwan uu la qaatay saraakiil ciidamada dowladda ka tirsan oo ku sugan Kismaayo iyo kuwa ciidamada Kenya ee qaybta ka ah AMISOM, wuxuuna xusay inay kawada hadleen arrimo khuseeya amniga iyo iskaashiga ciidamada labada dhinac, wuxuuna xaqiijiyay in dhawaan uu magaalada Muqdisho soo booqan doono sarkaalka ugu sarreeya ee ciidamada Kenya.

Ugu dambeyn, wasiirka gaashaandhigga ayaa ammaanay ciidamada kala duwan ee ka howlgala magaalada Kismaayo iyo qaybaha kale ee gobolka, wuxuuna si gaar ah ugu bogaadiyay kaalintii ay ka qaateen dagaalkii looga saaray Al-shabaab gobolka Jubbada Hoose. isagoo u ballan-qaaday in la qarameyn doono kuwa aan weli la qarameyn, isla markaana loo billaabi doono si deg-deg ah mushaaraadkooda iyo xaquuqdooda kale ee ciidan ay u heli lahaayeen. maadaama buu yiri laga qaaday dowladda Soomaaliya xayiraadii hubka ee saarnayd.

Wasiirka gaashaandhigga ayaa wuxuu qayb ka ahaa wafdi ka socda dowladda Soomaaliya oo gaaray Kismaayo, kuwaasoo hordhac u ahaa booqasho uu ra’iisul wasaare Cabdi Saacid ku tegi doono magaaladaas maalmaha soo socda.









Maxamed Xaaji Xuseen, Hiiraan Online
maxuseen@hiiraan.com
Muqdisho, Soomaaliya





Post your comments

2013-03-25 2:39 PM EST
Isniin, Maarso 25, 2013 (HOL) — Taliyaha ciidamada Booliska Somaliland Sareeyo guute, Cabdilaahi Fadal Iimaan, ayaa sheegay in sharciga la marinayo saddex askari oo loo qabtay dilka wiil dhalinyaro ah oo dhowaan lagu dilay magaaladda Hargeysa.

2013-03-25 1:25 PM EST
Isniin, Maarso 25, 2013 (HOL) — Arday wax ku baranaysay dugsi ood ka sameysan oo ku yaalla deegaanka Manaas ayaa la fasaxay kaddib markii roobab mahiigaan ah ay waxyeello u geysteen dugsigooda, waxana ay ka cawdeen macallimiinta gusigaas inaysan helin kaalmooyin ay dugsiga ku dhisaan.

2013-03-25 10:09 AM EST
Maxkamada sare ee dalka Kenya ayaa maantay ka fariisatay go'aan ka gaarista murankii ka dhashay doorashadii dalka ka dhacday 4-tii bishii March ee lasoo dhaafay.

2013-03-25 9:36 AM EST
Isniin, Maarso 25, 2013 (HOL) — Iyadoo sii kordhayaan tirada dadka uu soo ridanayo cudurka shuban biyoodka magaalada Baladweyne, ayaa haddana dhinaca kale waxaa socda gurmadka caafimaad ee loo sameynayo dadka la ildaran cudurka oo ku jira xarumo gaar ah oo laga sameeyay dulleedka magaalada Baladweyne.

2013-03-25 8:37 AM EST
Isniin, Maarso 25, 2013 (HOL) — Kaddib markii uu agaasimihii hay’adda nabadsugidda Qaranka, Axmed Macallin Fiqi uu ku dhawaaqay inuu xilkaas iska casilay maanta ayaa waxaa madaxweynuhu uu goor dhow agaasime KMG ah u magacaabay haya’adda, kaasoo magaciisa uu kusoo gaabiyay Cabdikariin.

2013-03-25 8:18 AM EST
Isniin, Maarso 25, 2013 (HOL) — Munaasabad lagu xusayay maalinta loo asteeyey la-dagaalanka cudurka Qaaxada (TB) ayaa shalay lagu qabtay isbitaalka guud magaalada Laascaanood ee gobolka Sool.

2013-03-25 8:08 AM EST
Isniin, Maarso 25, 2013 (HOL) — Guddoomiyaha baarlamaanka Soomaaliya, Prof. Maxamed Sh. Cismaan (Jawaari) ayaa maanta kula kulmay magaalada Baydhabo ee gobolka Bay saraakiisha ciidamada Itoobiya, waxgarad iyo xildhibaannadii halkaas horay ugu sugnaa.

2013-03-25 7:13 AM EST
Isniin, Maarso 25, 2013 (HOL) — Taliyihii hay’adda nabadsugidda Qaranka Soomaaliyeed, Axmed Macallin Fiqi ayaa ku dhawaaqay maanta inuu xilkiisii iska casilay, isagoo sheegay inuu go’aanka is casilaaddiisa uu yahay mid uu isagu gaaray.

2013-03-25 3:01 AM EST
Isniin, Maarso 25, 2013 (HOL) — Ra'iisul wasaaraha Soomaaliya, Cabdi Faarax Shirdoon (Saacid) iyo wafdi uu hoggaaminayo ayaa maanta oo Isniin ah ku wajahan magaalada Kismaayo ee xarunta gobolka Jubbada Hoose oo lagu wado inuu ka furmo shirka maamul u sameynta gobollada Jubbooyinka.

2013-03-25 2:53 AM EST
Isniin, Maarso 25, 2013 (HOL) — Safaaradda Soomaaliya ee dalka Koonfur Afrika ayaa casuumaad ugu sameysay gudaha dhismaha Safaaradda dublamaasiyiinta ka tirsan wasaaradda arrimaha dibadda iyo iskaashiga caalamiga ee Soomaaliya oo ku tababaranaya dugsiga sare ee akadeemiyada dublamaasiyadda ee wasaaradda xiriirka caalamiga iyo iskaashiga ee Koonfur Afrika.

2013-03-25 2:45 AM EST
Isniin, Maarso 25, 2013 (HOL) — Kooxo hubeysan ayaa xalay ku dilay xaafadda Towfiiq ee degmada Yaaqshiid gabar wariye ahayd oo lagu magacaabi jiray, Raxmo Cabdulqaadir, iyadoo aan la ogeyn kooxaha dilkeeda ka dambeeya.