2014-10-23
Today from Hiiraan Online:  _
Wararka Maanta- Sabti, Mar 2 , 2013
Boqollaal Barakacayaal ah oo Lacago loogu Qaybiyay Deegaanno kala duwan oo ku yaalla Gobolka Sool (SAWIRRO)



Sabti, Maarso 02, 2013 (HOL) — Qoysas barakacayaal ah oo tiradoodu tahay 450 qoys oo ku nool degmada Laascaanood, Xuddun iyo Taleex kuwaasoo ka wada-tirsan gobolka Sool ayaa loo qaybiyay lacago ay ku deeqeen hay’adaha  USAID iyo CARE International, taasoo soo martay hay’adda waddaniga ah ee SVO.

Barakacayaasha ku nool degmada Laascaanood oo tiradoodu ay ahayd 320 qoys ayaa qoyskiiba waxaa la siiyay min 80 doollarka Mareykanka ah, sida uu HOL u sheegay madaxa hay’adda SVO, Maxamed C/llaahi Faarax (Cag-madhige).

Sidoo kale 130-qoys oo ku nool tuulooyinka Sarmaanyo iyo Kullaal oo ka kala tirsan degmooyinka Xuddun iyo Taleex ayaa qoyskiiba waxaa la siiyay 80 doollarka Mareykanka ah, taasoo loogu talogalay inay qoysaskan muddo saddex bilood ah ku kabana noloshooda.

Duqa degmada Laascaanood, C/qaadir Jaamac Faarax oo soo maray goobihii lacagaha laga qaybinayay ayaa ammaan ballaaran u jeedieyay mas’uuliyiinta ha'adda SVO iyo hay’adaha kale ee lacagtan soo bixiyayba, isagoo intaas ku daray in deeqdan ay kusoo beegantay waqti dadku aad u jilicsan yihiin loona baahnaa in gargaar la gaarsiiyo.

C/llaahi Jaamac wuxuu hay'adaha deeqaha bixiya ugu baaqay hay’adaha deeqaha bixiya inay ka qaybqaataan sidii ay u caawin lahaayeen dadka ku nool Laascaanood iyo deegaannada ku dhow dhibaatada biyo la'aaneed ee soo food-saartay.

Hay'adda waddaniga ah ee Stead-fast Voluntary Organization (SVO) ayaa sannadihii ugu dambeeyey wadday olole ay kula tacaalayso harraadka soo noq-noqda, iyadoo dayactir ku samaysay in ku dhow 1000 ceel oo nooca biri-qodayda ah (Shallow well), kuwaasoo badankooda ku yaalla dooxada Nugaaleed iyo degaannada ku xeeran sida uu HOL uga warbixiyay Inj. Xasan Ismaaciil Kaatun oo ah hawlwadeenka hay’addaas.

Sidoo kale,SVO waxay ceelal riig ah ka qodday degaanka oomanaha ah ee  Soolasha loo yaqaano siiba magaalooyinka Sarmaayo iyo Awr-boogays, haatanna waxay ka waddaa tuuladda Kulaal oo dhamaantood ka tirsan degmooyinka Xudun iyo Taleex.

Hay’adda SVO waxa kaloo kayd biyoodyo ka samaysay deegaannada Hawd oo inta badan ah dhulka ay biyo la'aantu kusoo noq-noqoto kuwaasoo kala ah Baraago iyo Balliyo.

Hay’addan oo ka howlgasha deegaanno badan oo Soomaaliya ka mid ah siiba gobolladda Sool, Sanaag, Togdheer, Nugaal iyo Mudug ayaa waxaa wax qabadkeeda ka caawiya hay’adaha deeqda bixiya ee ay ka mid tahay CARE, NPA, USAID iyo qaar kale oo badan.






Saynab Cabdi Warsame, Hiiraan Online
xidigtiidhiciwayday@hotmail.com
Laascaanood, Gobolka Sool





Post your comments

2013-03-02 1:37 PM EST
Sabti, Maarso 02, 2013 (HOL) — Guddoomiye ku xigeenka maamulka KMG ah ee Kismaayo, Yaasiin Nuur Gaas ayaa sheegay in maamul u sameynta gobollada Jubbooyinka iyo Gedo uu si wanaagsan u socdo, isagoo sheegay in ergooyinka qaarkood ay weli kusoo wajahan yihiin Kismaayo.

2013-03-02 1:04 PM EST
Sabti, Maarso 02, 2013 (HOL) — Ururka Ahlusunna Waljamaaca ayaa ku doortay maanta degmada Guriceel ee gobolka Mudug guddoomiyaha cusub ee golaha talada, kaasoo loo doortay Cabdi Cali Fiidow kaddib shir dhow casho soo socday.

2013-03-02 12:45 PM EST
Sabti, Maarso 02, 2013 (HOL) — Wafdi ka socday Midowga Yurub oo uu hoggaaminayay ku xigeenka xoghayaha guud ee Midowga u qaabilsan howlaha dibadda, Maciej Popowski ayaa maanta soo gaaray Muqdisho, kuwaasoo kulammo la yeeshay wasiirro ka tirsan dowladda Soomaaliya.

2013-03-02 11:12 AM EST
Sabti, Maarso 02, 2013 (HOL) — Maxkamadda ciidamada Puntland -laanteeda gobolka Nugaal - ayaa maanta xukuntay 2 nin oo ku eedeysnaa in ay ka tirsan yihiin xarakada Al-shabaab. Nimankan oo lagu kala magacaabo Cabdirisaaq Xasan Tahliil iyo Maxamuud Nuux Adam ayaa lagu ridey xukun dil ah.

2013-03-02 7:33 AM EST
Sabti, Maarso 02, 2013 (HOL) — Kooxo aan la aqoonsan ayaa bam-gacmeed ku weeraray duhurnimadii maanta xarunta Radio Baydhabo oo ku yaalla xaafadda Cadaadda ee magaalada Baydhabo, iyadoo qaraxaas uusan geysan wax khasaare ah.

2013-03-02 7:27 AM EST
Sabti, Maarso 02, 2013 (HOL) — Xildhibaanad Faadumo Jaamac Ileeya oo ka mid ah golaha Guurtidda Somaliland, ayaa maanta laga aqbalay iscasilaad ay golaha u soo gudbisay ka dib markii afar sanadood ay kali ku ahayd golaha Guurtidda.

2013-03-02 7:09 AM EST
Sabti, Maarso 02, 2013 (HOL) — Madaxweynaha Soomaaliya, Xasan Sheekh Maxamuud ayaa maanta furay kal-fadhigii labaad ee baarlamaanka Somalia isagoo khudbad dhinacyo badan taabanaysay ka jeediyay munaasabad loogu talo-galay in lagu furo kalfadhigan.

2013-03-02 6:51 AM EST
Sabti, March 02, 2013 (HOL) - Iyadoo maalinta isniinta ah ay dadka waddanka Kenya u dareerayaan goobaha codbixinta ayaa Mid kamid ah 8-da musharrax ee u taagan doorashada madaxtinnimida ee dalka Kenya uu soo booqday xafiiska Hiiraan Online ay ku leedahay magaalada Nairobi.

2013-03-02 6:47 AM EST
Sabti, Maarso 02, 2013 (HOL) — Duqa magaalada Baladweyne, Maxamed Xassan Nuur oo sadaxdii cisho ee lasoo dhaafayba ku xirnaa saldhiga magaalada Baladweyne ayaa markii ugu horeysay waxaa xarigiisa ka hadllay saraakiisha maamulka gobolka.

2013-03-02 6:39 AM EST
Sabti, Maarso 02, 2013 (HOL) — Qaar ka mid ah gaadiidleyda Basaska loo yaqaan ayaa kordhiyey qiimaha gaadiidkoodda lagu raaco, kuwaas oo ka dhigay laba kun oo shilin Somaliland ah, halka uu markii hore ka ahaa kun iyo shan boqol SHSL (1500).

2013-03-02 2:09 AM EST
Sabti, Maarso 02, 2013 (HOL) — Saraakiisha ciidamada Midowga Afrika ee AMISOM ayaa cambaareeyay weerarradii ismiidaaminta ahaa ee shalay ka maqaayad ku taalla xeebta Liido ee magaalada Muqdisho, kaasoo dilay laba qof oo uu ku jiro qofkii weerarka fuliyay, dhaawacayna toddoba qof oo kale.

2013-03-02 1:16 AM EST
Sabti, Maarso 02, 2013 (HOL) — Madaxweynaha dalka Jabuuti, Ismaaciil Cumar Geelle ayaa ka hadlay markii ugu horreysay rabshado ka dhashay doorashooyinkii baarlamaaniga ahaa ee ka dhacay dalkaas, isagoo xusay in dowladdu aysan ogolaan doonin in dhibaatooyin laga buuro magaalada.