2014-04-18
Today from Hiiraan Online:  _
Wararka Maanta- Sabti, Jun 8 , 2013
Qarax Khasaare Geystay oo Degmada Dayniile lagula eegtay Mas’uuliyiin ka Tirsan Maamulka Gobolka Banaadir

Sabti, Juun 08, 2013 (HOL) — Qarax miino oo khasaare geystay ayaa maanta lagula eegtay degmada Dayniile ee gobolka Banaadir mas’uuliyiin ka tirsan maamulka gobolka Banaadir oo uu hoggaaminayay guddoomiye ku xigeenka maamulkaas, Cali Axmed Guure.

Hal askari oo ka tirsan ciidamadii ilaalinayay mas’uuliyiintan ayaa ku dhintay laba kalena way ku dhaawacmeen, iyadoo la sheegay in gaari ka mid ah kuwii ay wateen mas’uuliyiintan uu burbur xooggan soo gaaray.

Guddoomiyaha degmada Dayniile, Xiireey Muxyadiin Cumar ayaa saxaafadda u sheegay inaysan jirin wax khasaare ah oo soo gaaray guddoomiye ku xigeenka gobolka, isagoo xusay in askartii ilaalada u ahayd uu kasoo gaaray qaraxa dhimasho iyo dhaawac.

“Qaraxan wuxuu ahaa miino dhulka lagu aasay, waxaana ku dhintay askari, laba kalena dhaawacyo ayaa kasoo gaaray, ma jiraan wax khasaare ah oo soo gaaray mas’uuliyiintii maamulka gobolka,” ayuu yiri guddoomiyaha degmada Dayniile.

Mas’uuliyiintan oo ay ka mid ahayd guddoomiyaha degmada Wardhiigley ee gobolka Banaadir, Deeqo C/qaadir ayaa waxay u socdeen kormeer ay kusoo sameynayeen xaafado ka tirsan degmada Dayniile.

Goobjoogayaal ayaa sheegay inay arkeen burbur xooggan oo gaaray mid ka mid ah gaadiidkii ay wateen mas’uuliyiinta maamulka gobolka Banaadir, sidoo kalena ay arkeen dhimashada hal askari iyo dhaawaca laba kale.

Ma jiraan dad shacab ah oo khasaare uu u geystay qaraxaan, waxaana tani ay kusoo beegmaysaa iyadoo dhawaanahan ay degmooyinka gobolka laga waday howgallo lagu sugayo ammaanka, laguna raadinayo kooxo la sheegay inay Al-shabaab ka tirsan yihiin oo Muqdisho ku dhuumaaleysanaya.

Howgallo ay ciidammo ka tirsan kuwa dowladda ka sameeyaan degmadaas ayaa lagu soo qabqabtay dhowr qof oo lagu eedeeyay inay qaraxaas lug ku lahaayeen, kuwaasoo ciidamadu sheegeen in la baarayo.

Maxamed Xaaji Xuseen, Hiiraan Online
maxuseen@hiiraan.com
Muqdisho, Soomaaliya





Post your comments

2013-06-08 3:51 PM EST
Sabti, Juun 08, 2013 (HOL) — Afhayeenka kooxda Raaskambooni ee uu hogaaminayo Sheekh Axmed Maxamed Islaam (Sheekh Axmed Madoobe) ayaa sheegay in dagaalladii ka dhacayay Jimichii shalay iyo Sabtidii maanta ay ahaayeen shir-qoollo ay soo abaabushay dowladda Soomaaliya ayna ku guuleysteen inay fashiliyaan.

2013-06-08 3:10 PM EST
Sabti, Juun 08, 2013 (HOL) — Afhayeenka guud ee Al-shabaab, Sheekh Cali Maxamuud Raage (Sheekh Cali Dheere) oo la hadlayay idaacado taageera Al-shabaab ayaa sheegay maanta inay gacanta ku hayaan ciidammo ka tirsan kuwa Midowga Afrika ee AMISOM.

2013-06-08 2:53 PM EST
Sabti, Juun 08, 2013 (HOL) — Madaxweynaha Somaliland Mudane Axmed Maxamed Maxamuud (Siilaanyo), ayaa maanta xafiiskiisa ku qaabilay wefti ganacsato ah oo ka socda dalka Yeman.

2013-06-08 2:08 PM EST
Sabti Juun 8, 2013 (HOL) - Wariye Ibraahim Cumar Baafo ayaa wareysi la yeeshay Col. Iftiin Xasan Baasto, Madaxweynaha Jubalanda ee dhawaan lagu doortay magaalada Kismayo.

2013-06-08 10:53 AM EST
Sabti, Juun 08, 2013 (HOL) — Ugu yaraan lix qof oo ka kala tirsan AMISOM iyo Al-shabaab ayaa ku dhintay dagaal culus oo ciidamada Midowga Afrika iyo kuwa Al-shabaab maanta ku dhexmaray deegaan ku yaalla duleedka degmada Buurhakaba oo lagu magacaabo Buundo-Madow.

2013-06-08 10:36 AM EST
Sabti, Juun 08, 2013 (HOL) — Ciyaartoyga gobolka Togdheer oo maanta la ciyaari lahaa gobolka Sool, ayaa xabsiga loo taxaabay ka dib markii ay ku kaceen falal ka hor imanaya habsami u socodka tartanka kubadda cagta.

2013-06-08 10:29 AM EST
Sabti, Juun 08, 2013 (HOL) — Madaxweynaha Soomaaliya, Xasan Sheekh Maxamuud oo maanta dib ugu soo laabtay Muqdisho ayaa ugu baaqay dadka Soomaaliyeed inay la shaqeeyaan ergeyga cusub ee xoghayaha guud ee QM uu u soo magacaabay Soomaaliya iyo xafiiskiisa cusub ee UNSOM.

2013-06-08 10:05 AM EST
Sabti, June 08, 2013(HOL) :- Ciidamadii taabacsan maamulka uu hogaamiyo Sheekh Axmed Max’ed Islaam (Axmed Madoobe) ayaa maanta si buuxda ula wareegay gacan ku heynta magaalada Kismaayo kadib dagaal qaraar oo ay gudaha magaalada kula galeen ciidamo taabacsanaa Iftiin Xasan oo ka mid ah masuuliyinta sheeganeeysa madaxweeynenimada Jubbaland.

2013-06-08 8:10 AM EST
Sabti, Juun 08, 2013 (HOL) — Ciidamadda amniga Somaliland ayaa hawlgalo balaadhan oo ay dad ku soo qabqabteen ka fulinayey maalmihii ina dhaafay magaaladda Hargeysa iyo Burco, kuwaas oo baadhitaankoodu ka socdo xarumaha dambibaadhista ee magaalooyinkaasi.

2013-06-08 8:06 AM EST
Sabti, Juun 08, 2013 (HOL) — Ugu yaraan 10-qof oo dhinacyadii dagaalku u dhexeyay iyo shacab isugu jira ayaa ku dhintay dagaal saaka oo Sabti ah ka qarxay bartamaha magaalada Kismaayo, kaasoo u dhexeeya mas’uuliyiin isku haysta xilka madaxweynenimo ee maamulka Jubbaland oo bishii hore looga dhawaaqay Kismaayo.

2013-06-08 3:15 AM EST
Sabti, Juun 08, 2013 (HOL) — Deeqdaan waxbarasho oo gaaraysa illaa labo kun oo doolarka Mareykanka ah, ayna iska soo ururiyeen dhallinyaro Soomaali ah hay’ad lagu magacaabo Shanta Foundation ayaa waxaa la guddoonsiiyey labo gabdhood oo ka mid ah arday wax ka barata mid ka mid ah iskuullada sare ee ay Soomaalidu maamusho ee ku yaala gobolka Minnesota.

2013-06-08 2:47 AM EST
Sabti, Juun 08, 2013 (HOL) — Dagaal culus oo la isku adeegsanayo hubka noocyadiisa kala duwan ayaa ka qarxay goor-dhow bartamaha magaalada Kismaayo ee xarunta gobolka Jubbada Hoose, dagaalkan oo daba socda dagaalkii shalay.