2014-04-24
Today from Hiiraan Online:  _
Wararka Maanta- Arbaco, Jun 5 , 2013
Madaxweynaha Soomaaliya iyo Madaxweynaha Kenya oo kulan ku yeeshay Magaalada Nairobi ee Xarunta dalka Kenya

xasan-shiikh-Iyo-Uhur.jpg
Arbaco, Juun 05, 2013 (HOL) — Madaxweynaha Soomaaliya, Xasan Sheekh Maxamuud iyo madaxweynaha Kenya Uhuru Keyatta ayaa kulan ku yeeshay shalay oo Talaado ahayd madaxtooyada Kenya, kaasoo ay labada mas’uul uga hadleen xiriirka labada dal u dhexeeya.

Kulankan oo saacado qaatay ayaa waxay labada mas’uul diiradda ku saareen iskaashi dhexmara labada dal iyo danaha ka dhexeeya, waxaana sidoo kale ay kaga hadleen amaanka iyo xal u helidda Soomaaliya.

Inkastoo kulankooda aysan wax faahfaahin ah ka bixin ayaa wararka laga helayo waxay sheegayaan inay isku afgarteen dhammaan qodobbadii ay kaga hadleen kulankooda.

Madaxweynaha Soomaaliya ayaa waxaa kulanka ku wehlinayay afadiisa, Qamar Cali Cumar, wasiir u dowlaha madaxtooyada Soomaaliya, Faarax Sheekh C/qaadir iyo danjiraha Soomaaliya u fadhiya dalka Kenya, Maxamed Cali Nuur Ameerika.

Sidoo kale, madaxweynaha Kenya ayaa waxaa isagana kulanka kala qayb-galay afadiisa  Margaret Kenyatta iyo xoghayihiisa joogtada ah, Thuita Mwangi.

Madaxweyne Xasan Sheekh Maxamuud oo kasoo laabtay dalka Japan oo uu kaga qaybgalay shirkii horumarinta Qaaradda Afrika ayaa wuxuu Kenya ku yimid booqasho saddex maalmood qaadanaysa.

Kulanka labada madaxweyne ayaa wuxuu kusoo beegmayaa iyadoo Xasan Sheekh uu warbaahinta ka sheegay in ciidamada Kenya ee ku sugan gudaha Soomaaliya ay ka gudbeen waajibaadkoodii shaqo, ayna diideen inay amniga xildhibaanno ay dowladdu magaaladaas u dirtay sugaan.

Sidoo kale, madaxweynuhu wuxuu ku sheegay kulan uu kula yeeshay Japan madaxweyne ku xigeenka Kenya, William Ruto in xukuumadda Soomaaliya aysan wax dagaal ah kula jirin dalka Kenya, ayna ku faraxsan yihiin howsha ay ciidamadoodu ka hayaan Koonfurta Soomaaliya.

Dhanka kale, waxaa lagu wadaa in madaxweynaha Soomaaliya uu la kulmo maanta oo Arbaco ah madaxweynaha Puntland, C/raxmaan Faroole oo safar ku jooga Nairobi, waxayna kulankooda kaga hadli doonaan arrimo ay ka mid yihiin dastuurka iyo maamulka Jubbaland oo bishii hore looga dhawaaqay magaalada Kismaayo.

Wararka laga helayo Nairobi ayaa waxay sidoo kale sheegayaan inuu ku sugan yahay halkaas madaxweynaha maamulka Jubaland, Axmed Madoobe oo laga yaabo inuu kulan la yeesho madaxweynaha Soomaaliya, Xasan Sheekh.

Maxamed Xaaji Xuseen, Hiiraan Online
maxuseen@hiiraan.com
Muqdisho, Soomaaliya





Post your comments

2013-06-05 6:45 PM EST
Arbaco, June 6, 2013(HOL)— Ururka Somaliska Ungdomsnätverket (SUN) ee ka dhisan magaalada Eskilstuna ee dalka Sweden ayaa wuxuu ku guuleystay abaalmarin sanadle ah oo ay degmada Eskilstuna bixiso, taasi oo la siiyo ciddii loo garto in ay gacan ka geysatay dhowrista deegaanka.

2013-06-05 4:12 PM EST
Arbaco, Juun 05, 2013 (HOL) — Ugu yaraan laba askari oo ka tirsan ciidamada dowladda Soomaaliya ayaa ku dhintay tiro kalena way dhaawacyo ayaa kasoo gaaray dagaal maanta ciidammo kawada tirsan dowladda Soomaaliya ku dhexmaray gobolka Bay.

2013-06-05 4:05 PM EST
Arbaco, Juun 05, 2013 (HOL) — Prof. Axmed Ismaaciil Samatar ayaa si weyn loogu soo dhaweeyay maanta magaalada Boorame ee xarunta gobolka Awdal, isagoo sheegay inay ugu dambeysay muddo 40-sano ah balse uu aad ugu faraxsan yahay inuu dib ugu soo laabto.

2013-06-05 4:05 PM EST
Arbaco, Juun 05, 2013 (HOL) — Madaxweynaha Soomaaliya, Xasan Sheekh Maxamud iyo Madaxweynaha Kenya, Uhuru Kenyatta ayaa muddo labo cisho ah wada-hadal ku yeeshay xarunta madaxtooyada Nagana ee gobolka Nyere ee dalka Kenya.

2013-06-05 4:05 PM EST
Arbaco, Juun 05, 2013 (HOL) — Tababar muddo toddobaad ah u soconayay tababarayaal caafimaad ayaa maanta lagu soo gabgabeeyay magaalada Laascaanood ee xarunta gobolka Sool, iyadoo ka qaybgalayaashii loo soo xiray tababarka la guddoonsiiyay shahaadooyin iyo agab caafimaad iyo dawooyin.

2013-06-05 11:02 AM EST
Arbaco, Juun 05, 2013 (HOL) — Wasaaradda amniga ee Puntland ayaa shaacisay magaca nin la sheegay in uu yahay sarkaal sare oo ka tirsan ururka Al-shabaab, kaasoo shalay ay ciidamada ammaanku howlgal ay magaaalada Boosaaso ka sameeyeen kusoo qabteen.

2013-06-05 10:38 AM EST
Arbaco, Juun 05, 2013 (HOL) — Aroornimadii hore saaka aabaarihii 03:15 daqiiqo saacadda London ayaa waxaa dab la qabadsiiyay duqsi lagu barto Qur’aanka kariimka iyo daruusaha kale ee Islaamiga ah oo ku yaalla waqooyiga London.

2013-06-05 10:13 AM EST
Arbaco, Juun 05, 2013 (HOL) — Xogyaha guud ee Qaramada Midoobay ayaa sheegay in dambiyada ugu badan ee ka dhaca gudaha Soomaaliya ay 63% geysato Xarakada Al-shabaab oo dagaal kula jirta Dowladda Soomaaliya.

2013-06-05 7:36 AM EST
Arbaco, Juun 05, 2013 (HOL) — Maxkamadda ciidamada qalabka sida ee dowladda Soomaaliya ayaa maanta ka hadashay dadka lagu soo qabqabto howgallada ka socda degmooyinka gobolka Banaadir iyo ciidamada hubka wata aan xiran dharka caadiga ah.

2013-06-05 7:24 AM EST
Arbaco, Juun 05, 2013 (HOL) — Ciidamada dowladda Soomaaliya iyo kuwa AMISOM ayaa howgallo guri-guri ah oo ay maanta ka sameeyeen degmada Shibbis ee gobolka Banaadir waxay kusoo qabqabteen boqolaal qof oo u badan dhallinyaro.

2013-06-05 7:13 AM EST
Arbaco, Juun 05, 2013 (HOL) — Maamulka goboleedka Galmudug ee dalka Soomaaliya ayaa ku wargeliyay hay’adaha samafalka ee ka holwgala deegaannada uu maamulkaas ka taliyo inay is-diiwaangeliyaan, waxaana hadalkan ku dhawaaqay madaxweynaha Galmudug, Cabdi Xasan Cawaale (Qaybdiid).

2013-06-05 3:09 AM EST
Arbaco, Juun 05, 2013 (HOL) — Ciidamada ammaanka ee Puntland ayaa howlgal ay shalay gelinkii danbe ka sameeyeen magaalada Boosaaso ee xarunta gobolka Bari, waxay kusoo qabteen nin la sheegay in uu ahaa sarkaal sare oo ka tirsan xarakada Al-shabaab.

2013-06-05 3:07 AM EST
Arbaco, Juun 05, 2013 (HOL) — Wafdi ka socda xafiiska cusub siyaasadda ee Qaramada Midoobey UNSOM ayaa shalay gaaray magaalada Baydhabo ee xarunta gobolka Bay, waxaana garoonka diyaaradaha kusoo dhaweeyay maamulka gobalka Baay iyo qaar ka tirsan qaybaha kala duwan ee arrimaha bulshada.