2014-10-31
Today from Hiiraan Online:  _
Wararka Maanta- Jimco, July 5 , 2013
Xayiraaddii Saarnayd Garoonka Diyaaradaha Aadan Cadde ee Muqdisho intii dagaallada sokeeye socdeen oo si rasmi ah loo qaaday



Jimco, July 05, 2013 (HOL) - Wasiirka warfaafinta, Boostada iyo gaadiidka Soomaaliya C/laahi Ciilmooge Xirsi ayaa shaaciyay in Xayiraad saarnayd ayraboorka Aadan cadde intii dagaallada sokeeye socdeen si rasmi ah loo qaaday.

“Warqad aan ka helnay hay’adda caalamiga ah ee duulimaadyada ee “ICAO”  ayaa naloogu cadeeyay in xayiraad caalami ah oo ayraboorka saarnayd la qaaday” ayuu yiri wasiirku.

Somali_Telecom1.jpg

Isagoo siinayay waraysi gaar ah Hiiraan Online (HOL)ayuu wasiirku sheegay in ayraboorku horay ugu jiray liiska Zone 5 oo ah ayraboorrada xayiraadu saarantahay balse haatan caalamku uu go’aansaday inaysan jirin khatar dhanka ammaanka ah oo xayiraadaasu uu sii saarnaato karto ayraboorka.

Wuxuu kaloo wasiirku sheegay in shirkadda Turkiga ah ee maamuli doonta ayraboorka caalamiga ah ee Aadan Cadde loo ogolaaday kadib markii lix bilood dawladu ay daraasaynaysay.

“Daraasad dheer iyo wadatashi badan oo socday muddo lix bilood ah kadib ayaa golaha wasiirradu arrintaas si guud ku ansixiyeen, maadaama aan ognahay shaqooyinkii hore ee hay’adaha Turkigu waddanka ka qabteen oo lagu wada guulaystay". ayuu sii raaciyay.

Axmed C/samad, Hiiraan Online
asamad@hiiraan.com
Nairobi , Kenya





Post your comments

2013-07-05 5:30 PM EST
Jimco, July 5, 2013(HOL)—Waxaa lagu qabtay Magaalada Wuhan ee Dalka Shiinaha xaflad ballaaran oo lagu maamusayay arday ka qalinjebisay afar Jaamacadood oo ku yaal Magaaladaas, taasoo ahayd tii ugu badneyd arday mar kaliyah ka qalin jabisay jaamacadaha waddanka Shiinaha. Ardayda qalin-jebisay ayay tiradoodu ahayd 78 arday oo kala ahaa 59 Dhakhtar, 18 Engineer iyo Arday bartay luuqadda Shiinaha.

2013-07-05 1:54 PM EST
Jimco, July 05, 2013 (HOL) — Xarakada Al-shabaab ee Soomaaliya oo ka hadasha xukun ka tuuristii madaxweynihii Masar, Maxamed Mursi ayaa sheegay inay tusaale u tahay in awoodda dalkaas oo dhan ay gacanta ugu jirto ciidamada, ururrada Islaamiga ah aan loo ogoleyn inay xukun qabtaan.

2013-07-05 1:54 PM EST
Jimco, July 05, 2013 (HOL) — Maxjarka xannaanada xoolaha ee Jasiira oo ku yaalla duleedka magaalada Muqdisho ayaa waxaa ku jira kumannaan xoolo ah oo loo diyaariyay in ganacsi ahaan dibadda loogu dhoofiyo, waana maxjarka keliya ee ku yaalla Koonfurta iyo Bartamaha Soomaaliya.

2013-07-05 9:56 AM EST
Jimco, July 05, 2013 (HOL) — Maamulka gobolka Hiiraan ayaa siweyn loogu amaanay isbadalka uu ka sameeyay amniga magaalada iyo dib u habeynta ciidamada kadib booqasho maalintii shalay ay ku tageen magaalada Baladweyne saraakiil ka tirsan booliiska AMISOM.

2013-07-05 9:48 AM EST
Jimco, July 05, 2013 (HOL) — Hay’adda caafimaadka adduunka ee WHO ayaa sheegtay in dagaalladii ka dhacay Kismaayo ay ku dhinteen 71-qof ayna ku dhaawacmeen 300 oo qof oo kale, kuwaasoo intooda badan ay ahaayeen shacabkii magaaladaas ku noolaa.

2013-07-05 8:10 AM EST
Jimco, July 05, 2013 (HOL) — Waxaa garoonka kubadda cagta ee Central High School ee magaalada Saint Paul ee gobolka Minnesota lagu soo gaba-gabeeyay ciyaar kubadda cagta ah oo lagu maamuusayay toddobaadka xorriyadda Soomaaliya iyo Mareykanka.

2013-07-05 3:37 AM EST
Jimco, July 05, 2013 (HOL) — Xukuumadaha Soomaaliya iyo Koonfur Afrika ayaa kawada hadlay sidii xal loogu heli lahaa dhibaatooyinka Soomaalida ku nool dalkaas loo geysto, iyadoo kulan arrintaas ku saabsan ay magaalada Pretoria ay ku yeesheen wasiirro ka kala tirsan labada dowladood.

2013-07-05 2:51 AM EST
Jimco, July 05, 2013 (HOL) — Wasiirka Maaliyadda iyo qorsheynta dowladda Soomaaliya, Maxamuud Xasan Suleymaan oo markii ugu horreysay ka hadlay warbixin ay kooxda la socodka arrimaha Soomaaliya iyo Eriteriya ay ku sheegeen in lacago badan oo sharci-darro ah laga baxay bangiga dhexe ee Soomaaliya ayaa sheegay inaysan jirin lacago lagala baxay bangiga dhexe ee Soomaaliya.

2013-07-05 2:49 AM EST
Jimco, July 05, 2013 (HOL) — Xildhibaan Maxamed Cumar Dalxa oo ka mid ah xubnaha baarlamaanka Soomaaliya ayaa ku taliyay in dowladda Soomaaliya ay magacowdo guddi baaris ku sameeya dagaalladii ka dhacay magaalada Kismaayo, kuwaasoo u dhexeeyay rag isku haysta xilka madaxweynenimo ee maamulka Jubbaland.

2013-07-05 2:46 AM EST
Jimco, July 05, 2013 (HOL) — Ugu yaraan saddex qof ayaa ku dhintay tiro intaas ka badanna way ku dhaawacmeen dagaal culus oo xalay ciidamada dowladda Soomaaliya iyo xoogagga Al-shabaab ku dhexmaray deegaanka Ow-diinle oo ku dhow degmada Baydhabo ee xarunta gobolka Bay.