2014-04-23
Today from Hiiraan Online:  _
Wararka Maanta- Jimco, July 5 , 2013
Dagaal Ciidanka Dowladda Soomaaliya iyo kuwa Al-shabaab ku dhexmaray duleedka Magaalada Baydhabo ee Gobolka Bay

Jimco, July 05, 2013 (HOL) — Ugu yaraan saddex qof ayaa ku dhintay tiro intaas ka badanna way ku dhaawacmeen dagaal culus oo xalay ciidamada dowladda Soomaaliya iyo xoogagga Al-shabaab ku dhexmaray deegaanka Ow-diinle oo ku dhow degmada Baydhabo ee xarunta gobolka Bay.

Dagaalkan oo ahaa mid culus ayaa socday muddo saacad ka badan, iyadoo dhinacyadu ay isku adeegsadeen hubka noocyadiisa kala duwani, iyadoo ay goobihii lagu dagaalamay ku sugan yihiin ciidamada dowladda Soomaaliya.

Saraakiil u hadlay dowladda Soomaaliya ayaa sheegay in dagaalku uu yimid kaddib markii ciidamada dowladda ee saldhigga ku leh deegaanka Ow-diinle ay ku jireen howlgallo ay kaga hortagayaan weerarro qorsheysan oo ay Al-shabaab doonaysay inay saldhigyadaas ku qaaddo.

“Ciidamada dowladda oo howlgal ku jira ayaa waxay iska horyimaadeen dagaalyahanno ka tirsan Al-shabaab waxaan halkaas ka dhacay dagaal culus oo socday muddo saacad ka badan, dhankeenna khasaare ayaa jirta,” ayuu yiri sarkaal u hadlay ciidamada dowladda ee ku sugan Ow-diinle.

Sidoo kale, sarkaalku wuxuu sheegay in ciidamada dowladdu ay hadda ku sugan yihiin goobihii lagu dagaalamay, kuwii Al-shabaabna ay dib ugu laabteen halkii ay markii hore kazoo duuleen.

Afhayeen u hadlay Al-shabaab ayaa isaguna sheegay in dagaal ay xalay kula galeen duleedka Baydhabo ciidammo ka tirsan kuwa dowladda Soomaaliya ayna halkaas ku dileen tiro askar ah, balse ma sheegin khasaaraha dhankooda kasoo gaaray dagaalka.

Goobjoogayaal ku suagn deegaanka lagu dagaalamay ayaa sheegay in saaka ay arkeen maydadka saddex qof oo dhinacyadii dagaalamay ka tirsan, balse ma sheegin ciidamada ay ka tirsanaayeen, maadaama labada dhinacba ay wateen tuutayaal.

Ma ahan markii ugu horreysay oo ciidamada dowladda Soomaaliya iyo kuwa Al-shabaab ay ku dagaalamaan deegaanno ku dhow degmada Baydhabo ee xarunta gobolka Bay, waxaana toddobaadkii hore dagaal culus oo khasaare geystay uu ciidamada dowladda iyo kuwa Al-shabaab ku dhexmaray goob u dhexeysa degmooyinka Baydhabo iyo Qansax-dheere.

Maxamed Xaaji Xuseen, Hiiraan Online
maxuseen@hiiraan.com
Muqdisho, Soomaaliya





Post your comments

2013-07-05 5:30 PM EST
Jimco, July 5, 2013(HOL)—Waxaa lagu qabtay Magaalada Wuhan ee Dalka Shiinaha xaflad ballaaran oo lagu maamusayay arday ka qalinjebisay afar Jaamacadood oo ku yaal Magaaladaas, taasoo ahayd tii ugu badneyd arday mar kaliyah ka qalin jabisay jaamacadaha waddanka Shiinaha. Ardayda qalin-jebisay ayay tiradoodu ahayd 78 arday oo kala ahaa 59 Dhakhtar, 18 Engineer iyo Arday bartay luuqadda Shiinaha.

2013-07-05 1:54 PM EST
Jimco, July 05, 2013 (HOL) — Xarakada Al-shabaab ee Soomaaliya oo ka hadasha xukun ka tuuristii madaxweynihii Masar, Maxamed Mursi ayaa sheegay inay tusaale u tahay in awoodda dalkaas oo dhan ay gacanta ugu jirto ciidamada, ururrada Islaamiga ah aan loo ogoleyn inay xukun qabtaan.

2013-07-05 1:54 PM EST
Jimco, July 05, 2013 (HOL) — Maxjarka xannaanada xoolaha ee Jasiira oo ku yaalla duleedka magaalada Muqdisho ayaa waxaa ku jira kumannaan xoolo ah oo loo diyaariyay in ganacsi ahaan dibadda loogu dhoofiyo, waana maxjarka keliya ee ku yaalla Koonfurta iyo Bartamaha Soomaaliya.

2013-07-05 9:56 AM EST
Jimco, July 05, 2013 (HOL) — Maamulka gobolka Hiiraan ayaa siweyn loogu amaanay isbadalka uu ka sameeyay amniga magaalada iyo dib u habeynta ciidamada kadib booqasho maalintii shalay ay ku tageen magaalada Baladweyne saraakiil ka tirsan booliiska AMISOM.

2013-07-05 9:48 AM EST
Jimco, July 05, 2013 (HOL) — Hay’adda caafimaadka adduunka ee WHO ayaa sheegtay in dagaalladii ka dhacay Kismaayo ay ku dhinteen 71-qof ayna ku dhaawacmeen 300 oo qof oo kale, kuwaasoo intooda badan ay ahaayeen shacabkii magaaladaas ku noolaa.

2013-07-05 8:24 AM EST
Jimco, July 05, 2013 (HOL) - Wasiirka warfaafinta, Boostada iyo gaadiidka Soomaaliya C/laahi Ciilmooge Xirsi ayaa shaaciyay in Xayiraad saarnayd ayraboorka Aadan cadde intii dagaallada sokeeye socdeen si rasmi ah loo qaaday.

2013-07-05 8:10 AM EST
Jimco, July 05, 2013 (HOL) — Waxaa garoonka kubadda cagta ee Central High School ee magaalada Saint Paul ee gobolka Minnesota lagu soo gaba-gabeeyay ciyaar kubadda cagta ah oo lagu maamuusayay toddobaadka xorriyadda Soomaaliya iyo Mareykanka.

2013-07-05 3:37 AM EST
Jimco, July 05, 2013 (HOL) — Xukuumadaha Soomaaliya iyo Koonfur Afrika ayaa kawada hadlay sidii xal loogu heli lahaa dhibaatooyinka Soomaalida ku nool dalkaas loo geysto, iyadoo kulan arrintaas ku saabsan ay magaalada Pretoria ay ku yeesheen wasiirro ka kala tirsan labada dowladood.

2013-07-05 2:51 AM EST
Jimco, July 05, 2013 (HOL) — Wasiirka Maaliyadda iyo qorsheynta dowladda Soomaaliya, Maxamuud Xasan Suleymaan oo markii ugu horreysay ka hadlay warbixin ay kooxda la socodka arrimaha Soomaaliya iyo Eriteriya ay ku sheegeen in lacago badan oo sharci-darro ah laga baxay bangiga dhexe ee Soomaaliya ayaa sheegay inaysan jirin lacago lagala baxay bangiga dhexe ee Soomaaliya.

2013-07-05 2:49 AM EST
Jimco, July 05, 2013 (HOL) — Xildhibaan Maxamed Cumar Dalxa oo ka mid ah xubnaha baarlamaanka Soomaaliya ayaa ku taliyay in dowladda Soomaaliya ay magacowdo guddi baaris ku sameeya dagaalladii ka dhacay magaalada Kismaayo, kuwaasoo u dhexeeyay rag isku haysta xilka madaxweynenimo ee maamulka Jubbaland.