2014-11-28
Today from Hiiraan Online:  _
Wararka Maanta- Khamiis, July 4 , 2013
Ra’iisul wasaaraha Xukuumadda Soomaaliya oo maanta daah-furay Qorshe wax looga qabanayo Ammaanka Muqdisho



Khamiis, July 04, 2013 (HOL) — Ra’iisul wasaaraha Somalia, Cabdi Faarax Shirdoon ( Saacid) oo ay wehliyaan xubno ka tirsan wasiirrada xukuumadda, guddoomiyaha gobolka banaadir, taliyayaasha ciidamada dowladda iyo gudoomiyeyaasha degmooyinka gobolka Banaadir ayaa si rasmi ah u furay barnaamij muddo laga soo shaqaynayay oo lagu xoojinayo amniga Muqdisho.

Mudane Saacid ayaa sheegay in dowladdu toddobadii bilood ee lasoo dhaafay ay wax weyn ka qabatay amniga, inkastoo ay jireen falal ammaan liddi ku ah oo ka dhacay caasimadda Soomaaliya,

“Dowladdu waxay mudnaanta kowaad iyo tan labaadba siisay sidii amniga lagu xaqiijin lahaa, waxaana nala soo weeraray maalin cad, dagaalka na haystana waa mid caalami ah, sidaa daraadeed dagaalka aan kula jirno kuwa nabadda diiddan waa inuu noqdo mid ballaaran oo laga wada qayb-qaato, Toddobadii bilood ee ugu dambaysay amniga waxaan galinnay waqti badan, balse kama aynaan badbaadin qaraxyo iyo dilal,” ayuu yiri Saacid oo ka hadlayay furitaanka kulanka.

Sidoo kale, ra’iisul wasaaruhu wuxuu yiri: “Xukuumaddu waxay way ballan-qaadaysaa in ciidamada booliisku ay u helaan mushaaraadkooda si joogta ah laga bilaabo bishaan. Waxay sidoo kale helayaan gunnooyin iyo raashinkii ay xaqa u lahaayeen, mana noqon doono mushaarkaas mid ay hay’ado ay bixin doonaan. Waxay kaloo dowladdu diyaarisay dhammaan agabayadii ay ku howlgeli lahaayeen ciidamada, lixda bilood ee soo socota waxaan ku rajo ka qabnaa in caasimadda ammaankeeda uu noqdo mid ka wanaagsan meesha uu hadda taagan yahay.”

Dhanka kale, guddoomiyaha gobolka Banaadir ahna duqa Muqdisho, Maxamud Axmed Nuur Tarsan oo kulanka ka hadlay ayaa sheegay in qaabka ugu habboon oo amniga loo xoojin karo uu yahay in laga hortago caqabadaha soo noq-noqday ee khatarta ku ah amniga Muqdisho

 

“Dhammaan degmooyinka gobolka waxaan ka billownay darisayn, waxaana illaa hada lagu guulaystay 14-degmo, waxaana la isku xirayaa dhammaan qaybaha kala duwan ee bulshada, markii lasoo dhamaystiro barnaamijkan darisaynta ah, waxaan rajo fiican ka qabnaa in si buuxda loosoo celiyo amniga magaalada,” ayuu yiri Tarsan.

Duqa Muqdisho wuxuu sidoo kale xusay in caasimadda Soomaaliya ay ka ammaan fiican tahay caasimadaha dunida qaarkood sida: Baqdaad iyo Kaabuul, balse la sheego in Muqdisho ka khatar badan tahay, taasna ay sabab u tahay hubka faraha badan ee lagu dhex wato.

Wasiirka arrimaha gudaha iyo amniga Qaranka, Cabdikariin Xuseen Guuleed ayaa dhankiisa sheegay in labadii munaasabadood ee lagu xusayay markii ay Soomaaliya ka xorowday gumeysiga Soomaaliya laga hortagay falal la doonayay in lagu waxyeelleeyo ammaanka.

“Haddii aysan jirin bulsho ku xiran guddoomiyeyasha degmooyinka iyo sidoo kale taliyeyaasha ciidamada way adagtahay in ammaanka wax laga qabto, waana in la dhiso guddi amni oo heer degmo ah, markii gobolka Banaadir uu soo dhamaystiro barnaamijka darisaynta ayaan u samaynaynaa qorshe wax looga qabanayo nabad ku soo dabaalidda caasimadda,” ayuu yiri Guuleed.

Ugu dambayntii, ra’iisul wasaaraha ayaa sheegay inuu jiro qorsha kale oo loogu magac daray Shabeel, kaasoo ay xukuumaddu dhamaystirtay lana daah-furi doono dhawaan, qorshaasoo uu ku sheegay inuu yahay mid guud ahaan dalka looga saarayo Al-shabaab iyo kuwa nabadda diiddan, si guud ahaan dalka la isugu furo.





Maxamed Xaaji Xuseen, Hiiraan Online
maxuseen@hiiraan.com
Muqdisho, Soomaaliya





Post your comments

2013-07-04 2:33 PM EST
Khamiis, July 04, 2013 (HOL) — Ururka dhallinyarada SYL II oo ah urur ka shaqeeya arrimaha horumarinta dhallinyarada Soomaaliyeed ayaa maanta ku qabtay Muqdisho xaflad shahaadooyin lagu guddoonsiiyay arday bartay xifado kala duwan oo ay ku shaqeystaan.

2013-07-04 2:09 PM EST
Khamiis, July 04, 2013 (HOL) — Marwda madaxweyaha Soomaaliya, Qamar Cali Cumar ayaa maanta deeq gaarsiisay xarunta waxbarashada gabdhaha agoonta ah ee degmada Boondheere ee magaalada Muqdisho.

2013-07-04 10:51 AM EST
Khamiis, July 04, 2013 (HOL) — Maxkamadda Rafcaanka Gobolka Maroodi-jeex, ayaa damaanad ku siidaayey masuuliyiin ka tirsanaa wargeyska HUBAAL oo shalay xukun xadhig ahi lagu riday.

2013-07-04 7:40 AM EST
Khamiis, July 04, 2013 (HOL) — Dowladda Soomaaliya ayaa warqad ay kaga cabanayso ciidamada Kenya ee ku sugan Koonfurta Soomaaliya u diray ururka Midowga Afrika oo ay ciidammo kaga sugan yihiin Soomaaliya, warqaddan oo lagu tilmaamay qarax siyaasadeed oo soo dhexgalay dalalka Soomaaliya iyo Kenya.

2013-07-04 7:21 AM EST
Khamiis, July 04, 2013 (HOL) — Madaxweynaha cusub ee dalka Masar Cadli Maxamed Mansuur ayaa maanta loo dhaariyay xilka madaxweynimo ee dalkaas, kaddib markii xilka laga tuuray Arbacadii shalay madaxweynihii hore ee lasoo doortay Maxamed Mursi

2013-07-04 6:53 AM EST
Khamiis, July 04, 2013 (HOL) — Kooxo bastoolado ku hubeysan ayaa laba oo kala ahaa ganacsade iyo suldaan ayaa ku dilay degmada Marko ee xarunta gobolka Shabeellada Hoose, iyadoo kooxahaas ay u suurogashay inay ka baxsadaan goobaha ay dilka ka geysteen.

2013-07-04 3:37 AM EST
Khamiis, July 04, 2013(HOL):- Baaq ay soo saareen qaar kamid ah odoyaasha dhaqanka iyo waxgaradka kasoo jeeda gobollada Jubooyinka iyo Gedo ayay si kulul ugu cambaareeyeen ciidamada dowladda Kenya ee ku sugan ku sugan gobolladaasi, iyagoona ka dalbaday in ay si degdeg ah ciidamadeeda ugala baxdo gobollada Jubooyinka iyo Gedo.

2013-07-04 2:27 AM EST
Khamiis, July 04, 2013 (HOL) — Col. Barre Aadan Shire (Hiiraale) oo ka mid ah madaxweynayaashii is-magacaabay ee maamulka Jubbaland ayaa sheegay inuu ku sugan yahay duleedka magaalada Kismaayo uuna wado abaabul dagaal oo uu ku doonayo inuu dib ugu qabsado Kismaayo oo dhawaan laga saaray.

2013-07-04 2:18 AM EST
Khamiis, July 04, 2013 (HOL) — Ra’iisul wasaaraha Soomaaliya, Cabdi Faarax Shirdoon (Saacid) oo ay weheliyaan wasiirro ka tirsan xukuumaddiisa ayaa booqasho ku tagay garoonka diyaaradaha Muqdisho iyo dekedda oo ah ilaha ugu waaweyn ee uu dhaqaaluhu kasoo galo dowladda Soomaaliya.