12/20/2014
Today from Hiiraan Online:  _
Wararka Maanta- Isniin, July 15, 2013
Ciidamada Kenya ee ku sugan Magaalada Kismaayo oo iska diiday eedeyntii ay u soo jeediyeen Guddiga Qaramada Midoobay


Isniin, July 15, 2013 (HOL) — Ciidamada Kenya ee ku sugan Kismaayo ayaa iska fogeeyay eedeyn ay guddiga la socodka Soomaaliya iyo Eritrea maalin ka hor soo saareen, taasoo ay ku sheegeen in ciidamada Kenya ay gacan ku siiyaan maamulka Axmed Madoobe dhoofinta dhuxusha.

Sarkaal u hadlay ciidamada Kenya oo lagu magacaabo Bongita Ongeri ayaa u sheegay Telefishin ay xaruntiisu tahay Nairobi in ka ganacsiga iyo dhoofinta dhuxusha Soomaaliya aysan ahayn mid u taalla ciidamada Kenya.

“Ujeeddada ay ciidamada Kenya u galeen gudaha Soomaaliya waa in laga joojiyo Al-shabab dhoofinta dhuxusha oo ay dhaqaale badan ka heli jireen, iyagoo xilligaas ka talinayaya magaalada Kismaayo. Howshaas ayayna weli ku taagan yihiin ciidamadeenna,” ayuu yiri Ongeri.

Afhayeenku wuxuu sheegay in baaristan ay sameyeen guddiga Qarmaada Midoobay ay tahay mid aan xaqiijo ahayn oo laga soo xigtay ilo hal dhinac ah, isagoo xusay in ciidamadooda aysan howshoodu ahayn inay dhoofinta dhuxusha ilaaliyaan.

“Shaqadeennu waa sugidda ammaanka iyo nabad kusoo dabaalidda dalka, run ahaantiina ciidamadeennu shaqadaas si wanaagsan ayay u qabtaan. Annagu shaqadeennu ma ahan dhoofinta dhuxusha iyo ilaalinteeda,” ayuu sarkaalkan ku daray hadlakiisa.

Golaha ammaanka ee Qaramada Midoobay ayaa bishii Feberaayo 2012 ka mamnuucday Soomaaliya dhoofinta dhuxusha, si Al-shabaab looga jaro lacago badan oo ay sheegtay inay ka helaan dhoofinta dhuxusha.

Hase yeesheen warbixin ay soo saareen maalin ka hor guddi u xilsaaran la socodka arrimaha Soomaaliya iyo Eritrea ayaa ku sheegay in ciidamada Kenya ee ku sugan Kismaayo ay gacan ku siiyaan maamulka Sheekh Axmed Madoobe dhoofinta dhuxusha.

Guddigu waxay sheegeen in dhoofinta dhuxushaas laga helo lacago badan, waxaana eedeyntan ay imaanaysaa iyadoo dowladda Somalia ay dhawaan ku eedeysay ciidamada Kenya inay mas’uul ka ahaayeen dagaalladii ka dhacay dhawaan magaalada Kismaayo.

Maxamed Xaaji Xuseen, Hiiraan Online
maxuseen@hiiraan.com
Muqdisho, Soomaaliya





Post your comments


7/15/2013 10:52 AM EST
Isniin, July 15, 2013 (HOL) —Wasiirka Duulista iyo hawada Somaliland Maxamuud Xaashi Cabdi, ayaa sheegay inuu xayiraaddii ka qaaday duulimaadyadii diyaaradaha Qaramada midoobay ee si ku meelgaadh ah uga joojiyey madaaradda Somaliland.

7/15/2013 7:47 AM EST
Isniin, July 15, 2013 (HOL) — Xildhibaanada baarlamaanka Soomaaliya ayaa maanta diiday hindise-sharciyeedka Gar-doon oo ay soo gudbisay wasaarada cadaalad, owqaafta iyo arrimaha diinta xukuumadda Soomaaliya, iyadoo ay inta badan mudanayaashu u codeeyeen diidmada sharcigan.

7/15/2013 7:27 AM EST
Isniin, July 15, 2013 (HOL) — Madaxweynaha Somaliland, Axmed Maxamed Maxamuud (Siilaanyo) ayaa xalay casuumad ugu sameeyey culimadda Somaliland xarunta madaxtooyada.

7/15/2013 6:54 AM EST
Waxaa xalay magaalada Nairobi ka dhacay kulan ballaaran oo isugu yimaadeen siyaasiyiin caan ah oo ku jira siyaasada wadamada Soomaaliya iyo Kenya.

7/15/2013 3:58 AM EST
Isniin, July 15, 2013 (HOL) — Laba qarax oo waaweyn ayaa saakay aroortii hore ka dhacay jidka soddonka oo isku xira degmooyin ka tirsan Muqdisho, iyadoo la sheegay in qaraxayadaas oo miino ahaa lagu burburiyay qaar ka mid ah baallayaasha korontada ku shaqeeya ee ku yaalla jidkaas.

7/15/2013 3:38 AM EST
Isniin, July 15, 2013 (HOL) — Magaalada Nairobi ee xarunta dalka Kenya ayaa lagu soo gabgabeeyay shalay oo Axad ahayd shir looga hadlayay dhaqaalaha iyo maal-gashiga Soomaaliya, kaasoo socday laba maalmood, waxaana shirkaas ka qaybgalay ganacsato Soomaaliyeed iyo kuwo ajnabi ah.

7/15/2013 2:55 AM EST
Isniin, July 15, 2013 (HOL) — Dalka Kenya waxaa ku sugan hal milyan oo qoxooti Soomaaliyeed ah, kuwaasoo intooda badan ay ku nool yihiin xeryaha qoxootiga Dhadhaab oo ku yaalla soohdinta ay wadaagaan Soomaaliya iyo Kenya.