2014-09-02
Today from Hiiraan Online:  _
Wararka Maanta- Sabti, July 13, 2013
AFHAYEENKA AMISOM: “Shacabku waa inay gacan ka geystaan sidii Amniga Muqdihso iyo kan Dalka lagu sugi lahaa”



Sabti, July 13, 2013 (HOL) — Afhayeenka AMISOM, Col. Cali Aadan Xumad oo saxaafadda la hadlay ayaa shacabka Soomaaliyeed ka dalbaday inay kala shaqeeyaan ciidamadoda iyo kuwa dowladda Soomaaliya sidii lagu sugi lahaa ammaanka guud ee caasimadda Soomaaliya.

Col. Xumad ayaa sheegay in Al-shabaab ay doonayaan inay dhibaatooyin u geystaan shacabka Soomaaliyeed, isagoo xusay in haddii aan si wadajir ah looga hortegin ay noqonayso inay ku guuleystaan hadafkooda gurracan.

“Dowladda Soomaaliya iyo AMISOM waxay dadaal ugu jiraan sidii looga hor-tagi lahaa falalka ammaan-darro ee Al-shabaab ay ka geysanayso gudaha Muqdisho, shacabkana waxaan ka dalbanaynaa inay gacan nagu siiyaan oo ay soo sheegaan cid walba oo ay u arkaan inay ammaanka khatar ku tahay,” ayuu yiri afhayeenka AMISOM.

Sidoo kale, afhayeenka AMISOM ayaa xusay in weerarkii shalay ciidankooda lala beegsaday uu ahaa mid ay khasaaraha ugu badan kasoo gaartay dadka rayidka ah, uuna aad uga xun yahay falalka ay kooxda nabadda diiddan ka waddo dalka Soomaaliya oo dhan.

“Ciidamada AMISOM mar walbana waxay diyaar u tahay inay ka hortagto wax walba oo dhibaatooyin ah oo shacabka soo gaaraya. Dadaal maqanna ma jiro, balse dadka ayaan weydiisanaynaa inaysan soo dhexmarin kuwa doonaya inay dhibaatooyinka geystaan,” ayuu yiri afhayeenka AMISOM.

Dhanka kale, afhayeenku wuxuu sheegay in Al-shabaab aysan marnaba ku guuleysan doonin hadafyadooda ku aaddan inay qaraxyo iyo dhibatooyin kale ka geystaan magaalada Muqdisho iyo deegaannada kale ee dalka.

Weerarkii ismiidaaminta ahaa ee shalay lala beegsaday ciidamada AMISOM ayaa noqonaya kii ugu horreeyay noociisa oo ay Al-shabaab ku weerarto gaadiidka AMISOM baabuur waxyaabaha qarxa laga soo buuxiyay.

Al-shabaab ayaa sheegtay inay weerarkaas ku dishay sideed askari oo kuwa AMISOM ah iyo laba sarkaal oo Mareykan ah, inkastoo aysan sheegin dadka shacabka ah ee wax ku noqday weerarkaas, balse afhayeenka AMISOM ayaa sheegay in weerarkaas ay kaga dhaawacmeen laba askari oo keliya.

Maxamed Xaaji Xuseen, Hiiraan Online
maxuseen@hiiraan.com
Muqdisho, Soomaaliya





Post your comments

2013-07-13 9:58 AM EST
Sabti, July 13, 2013 (HOL) — Madaxweynaha Soomaaliya, Xasan Sheekh Maxamuud ayaa maanta xafiiskiisa kula kulmay guddiga loo saaray inay soo diyaariyaan qodobbada la hordhigayo shirka lagu qabanayo September 16-keeda magaalada Brussels ee xarunta Belgium.

2013-07-13 8:44 AM EST
Sabti, July 13, 2013 (HOL) — Xukuumadda Kenya ayaa sheegtay inay xadka ay la wadaagto Soomaaliya iyo Itoobiya xoojinayso, iyadoo sheegtay inay ka soo galaan hubka sharci-darrada ah ee ay isticmaalaan kooxaha xag-jiriinta ah ee dalkeeda weerarrada ka geysta.

2013-07-13 8:42 AM EST
Sabti, July 13, 2013 (HOL) — Ergeygga gaarka ah ee xoghayaha guud ee Qaramadda Midoobay (SRSG), Nicholas Kay ayaa maanta booqasho ku tagay magaalada Garoowe ee xarunta Puntland, taasoo ahayd booqashadii ugu horreysay ee Kay uu ku tago Puntland oo ka mid ah maamullada dalka ka jira ee taageersan dowladda Soomaailya.

2013-07-13 8:23 AM EST
Sabti, July 13, 2013 (HOL) - Shirkad dhawaanahaanba hawlo shidaal baaris ah ka waday deegaanka Modogashe oo ka tirsan magaalada Gaarisa ee xarunta gobolka waqooyi bari ayaa ku hanjabtay inay gabi ahaanba shaqada joojin doonto.

2013-07-13 8:05 AM EST
Sabti, July 13, 2013 (HOL) — Maxkamadda gobolka Banaadir ayaa maanta u fariisatay dhageysiga dacwado loo haystay 16-qof oo ku kala eedeysnaa dil, kufsi iyo dhac, waxaana maxkamaddu 12 qof oo ka mid ah ay ku ridday xukunno isugu jira xabsi iyo dil toogasho.

2013-07-13 4:03 AM EST
Sabti, July 13, 2013 (HOL) — Wasiirka arrimaha gudaha iyo ammaanka Qaranka xukuumadda Soomaaliya, C/kariin Xuseen Guuleed ayaa sheegay in wadahadalladii dowladda Soomaaliya iyo Somaliland ku dhexmaray dalka Turkiga ay ahaayeen kuwo lagu qancinayo Somaliland.

2013-07-13 3:16 AM EST
Sabti, July 13, 2013 (HOL) — Taliska booliiska Soomaaliya ayaa faahfaahin ka bixiyay weerarkii ismiidaaminta ahaa ee shalay Muqdisho lagu beegsaday ciidamada Midowga Afrika ee AMISOM, iyagoo sheegay in baaritaanno ay ku hayaan gaariga iyo ciddii iska lahayd.