2014-10-01
Today from Hiiraan Online:  _
Wararka Maanta- Jimco, July 12, 2013
Dilkii Cabdulqaadir Yaxye Sh. Cali oo ay Siddeed Sano kasoo Wareegtay iyo Hadalladii Xusuusta lahaa ee uu ka tagay


Jimco, July 12, 2013 (HOL) — Sideed sano ayaa kasoo wareegtay markii kooxo hubeysan ay xalay oo kale ku toogteen gurigiisa oo ku yaalay degmada Wadajir C/qaadir Yaxye Sheekh Cali oo ka mid ahaa mas’uuliyiintii hay’adda cilmi-baarista iyo wadashiga CRD.

C/qaadir Yaxye oo isagoo dalka dibaddiisa ku noolaa wuxuu go’aansaday in uu dalka dib ugu soo laabto si uu uga shaqeeyo nabadeynta Soomaalida oo dagaallo kusoo jiray muddo tobaneeyo sanno ah.

Wayaabixii uu ka digi jiray oo ay ka mid ahaayeen qabyaaladda iyo nabad la’aanta ayaa weli ka socda Soomaaliya, waxaana la toogtay isagoo hoygiisa ku sugan xilli habeenimo ah, markasoo ku beegmayd 11-kii July 2005.

Shirar badan oo uu ka qeybgalay ayuu ka sheegay hadallo weli taagan oo ku aadan dhibatada Soomaaliya ka jirta sida dilalka, xaalufinta kheyraadka iyo weliba sida ay Soomaaliya u noqotay meel laga isaga tallaabiyo waxyaabaha shaci-darrada ah.

“Marxuum C/qaadir Yaxye wuxuu ahaa nin wax badan ku baraarujin dadka Soomaaliyeed sida inay aayahooda ka tashadaan, ayna kala gartaan wixii ay dhibaato ugu jirto iyo wixii ay faa’iido ugu jirto. Wanaaggaas uu ummadda u sheegayay darted ayaana loo dilay,” sidaa waxaa goobtii aaskiisa ka yiri waxgarad kala duwan oo kasoo qaybgalay duugtiisa.

C/qaadir Yaxye ayaa waxaayabaha lagu xusuusto waxaa ka mid ah inuu si aad ah ula dagaalami jiray qabyaaladda, waxaana hadalladii uu ka tagay ka mid ahaa: “Ma jiro qof doortay in uu noqdo reer hebel, Sidaas darteed waa qalad in qof loo waxyeelleeyo ama loo dilo waa reer hebel.”

Hay’addii CRD ee uu qaybta weyn ku lahaa aasaaskiisa ayaa weli shaqeysa iyadoo dadaallo badan ugu jirta sidii dalka loo gaarsiin lahaa nabad iyo inuu ka baxo colaadaha uu kusoo jiray muddada 22-ka sano ka badan.

“Muqdisho dadka ayaa lagu dilayaa, Soomaaliduna dhaqan yo caado midna uma lahayn in ninka wax dila uu dadka iska dhexmaro, qof la hadlana aysan jirin. Dadkiina dad nool oo sharaf, diin, dhaqan iyo caado leh waaye, waxba kama duwana marka dhurwaa intuu ri’ iska qabsado iska dilo oo halkaas iska maro, dadka waa ka sheekeynayaan dhibaatadaas waxba kama qabanayaan, dadkaas annaga ayaa ka mid ah, idinka ayaa ka mid ah, kuwa naga maqan ayaa ka mid ah. Dad badan oo diinta iiga fiican ayaa idinku jira, Soomaaliya xaaladdeeda waxay taagan tahay ‘Aleysa Minkum Rajulun Rashiidun’ mala waayay hal nin oo fiican oo idinka mid ah,” eraydan waxay ka mid ahaayeen kuwii ka tagay marxuum C/qaadir Yaxye.

Dad badan oo Soomaaliyeed oo la mid ahaa C/qaadir Yaxye dadaalna ugu jiray sidii ay Soomaaliya nabad u noqon lahayd ayaa sidan oo kale naftooda ku waayay, iyadoo kooxihii dilay aan weli gacanta lagu dhigin.

Allaha u naxariisteen, C/qaadir Yaxye Sheekh Cali Cibaar wuxuu ku dhashay magaalada Muqdisho sannadkii 1957, wuxuuna wax ku bartay Muqdisho, isla markaana wuxuu kasoo shaqeeyay wasaaraddii beeraha xilligii Kacaanka. Safaaraddii Mareykanka ee Somalia ayuu kasoo shaqeeyay, wuxuuna ka mid ahaa dadkii ka shaqeeyay howgalkii rajo soo celinta Soomaaliya ee UNOSOM II.

Dhanka kale, wuxuu lasoo shaqeeyay Midowga Yurub, wuxuu xubin ka ahaa bahda isboortiga Soomaaliyeed, wuxuu la soo shaqeeyay hay’adda Daryeel Bulsho Guud (DBG), markii ugu dambeysayna wuxuu ka tirsanaa madaxda hay’adda cilmi-baarista iyo wada-tashiga ee CRD.

Maxamed Xaaji Xuseen, Hiiraan Online
maxuseen@hiiraan.com
Muqdisho, Soomaaliya





Post your comments

2013-07-12 3:15 PM EST
Jimco, July 12, 2013 (HOL) — Madaxweynaha Somaliland Mudane Axmed Maxamed Maxamuud (Siilaanyo), ayaa xadhiga ka jaray idaacad cusub oo FM ah oo khaas u ah quraanka karriimka iyo Axaadiista Nabiga NNKHA oo lagu soo kordhiyay idaacadda Radio Hargeysa.

2013-07-12 2:14 PM EST
Jimco, July 12, 2013 (HOL) — Urur-siyaasadeedka Wadajir oo kamid ah 6-da urur-siyaasadeed ee Puntland ayaa maanta shaaciyey in uusan ka qayb geli doonin doorashada goleyaasha deegaanka ee Isniinta soo socota la filayo in ay ka qabsoonto deegaanada Puntland.

2013-07-12 12:40 PM EST
Jimco, July 12, 2013 (HOL) — Ra,iisal wasaaraha Soomaaliya, Cabdi Faarax Shirdon (Saacid) ayaa cambaareeyay weerarkii is-miidaaminta ahaa ee lala beegsaday gellinkii dambe ee maanta gaadiid ay wateen ciidamada AMISOM, isagoo tacsi u diray dhamaan qoysaskii dadkii rayidka ahaa ee wax-yeelladu kasoo gaartay weerarkaas.

2013-07-12 11:47 AM EST
Jimco, July 12, 2013(HOL)—Suxufiyiinta Soomaaliyeed ayaa sheegay in Dowladda Soomaaliya ay meel marisay sharci qabyo qoraal ah, kaasi oo ay u arkayaan in uu yahay mid xaaladda ku sii adkeyn doona warfidiyeennada Soomaaliyeed oo xaalado ka dhan ah xuquuqdooda aas-aasiga ah la kulmayay sanadihii aynu ka soo gudubnay.

2013-07-12 10:29 AM EST
Jimco, July 12, 2013(HOL) :- Shir maanta ka dhacay xarunta jaamacadda Kismaayo islamarkaana ay goobjoog ka ahaayeen madaxda ugu sareeysa maamulka Jubbaland iyo ergadii soo dhistay maamulka ayaa waqti kordhin loogu sameeyay madaxweeynaha maamulka si uu u soo dhameystiro qeybaha ka dhisman maamulka.

2013-07-12 9:12 AM EST
Jimco, July 12, 2013 (HOL) — Inta la ogyahay shan ruux oo ka mid ah kuwii uu dagaalku u dhexeeyay ayaa ku dhintay sagaal kalena dhaawacyo ayaa ka soo gaaray dagaal ciidamada dowladda Soomaaliya iyo kuwa Al-shabaab ku dhexmaray manta degmada Awdheegle ee gobolka Shabeellada Hoose.

2013-07-12 8:47 AM EST
Jimco, July 12, 2013 (HOL) — Weerar Ismiidaamin ah ayaa goor dhow lala beegsday gaadiid ay wateen ciidamada AMISOM oo marayay agagaarka xarunta hay’adda UNDP ay ku leedahay Muqdisho, iyadoo weerarkaas ay ka dhasheen khasaarooyin isugu jira dhimasho iyo dhaawac.

2013-07-12 8:42 AM EST
Jimco, July 12, 2013 (HOL) — Koox dabley ah ayaa xalay abbaare 12:kii habeennimo jidka u galay gaari nooca xamuulka qaada ah oo ka tegey magaalada Boosaaso, kaas oo marayey inta u dhexeysa tuulooyinka Kalabery iyo Kob-dhexaad oo qiyaastii 70km magaalada Boosaaso bariga ka xiga.

2013-07-12 4:57 AM EST
Jimco, July 12, 2013 (HOL) — Jaaliyadda Soomnaaliyeed ee ku nool xarunta labaad ee dalka Britain ee Birmingham ayaa xaflad soo dhaweyn ah xalay u sameeyay wafdi xildhibaanno ah oo uu hoggaaminayay guddoomiye ku xigeenka labaad ee baarlamaanka Soomaaliya, Mahad Cabdalla Cawad oo socdaal shaqo ku jooga Britain.

2013-07-12 4:13 AM EST
Jimco, July 12, 2013 (HOL) — Madaxweynaha Puntland C/raxmaan Sheekh Maxamed Faroole ayaa ugu baaqay shacabka ku nool Puntland inay ka qayb-qaataan doorashooyinka golaha deegaanka oo billaaban doona Isniinta soo socota oo ku beegan 15-ka bishan July.