2014-10-23
Today from Hiiraan Online:  _
Wararka Maanta- Jimco, July 12, 2013
Ra'iisul Wasaaraha Soomaaliya oo Dhaleeceeyay Weerarkii Is-miidaaminta ahaa ee lala beegsaday Ciidamada AMISOM


Jimco, July 12, 2013 (HOL) — Ra,iisal wasaaraha Soomaaliya, Cabdi Faarax Shirdon (Saacid) ayaa cambaareeyay weerarkii is-miidaaminta ahaa ee lala beegsaday gellinkii dambe ee maanta gaadiid ay wateen ciidamada AMISOM, isagoo tacsi u diray dhamaan qoysaskii dadkii rayidka ahaa ee wax-yeelladu kasoo gaartay weerarkaas.

Weerarkan ayaa waxaa waxyeello ay kasoo gaartay dad shacab ah iyo askar ka tirsan kuwa Midowga Afrika ee AMISOM, iyadoo mas’uuliyadiisa ay durba ku dhawaaqday inay leedahay Xarakada Al-shabaab.

"Waan u tacsiyaynayaa dhammaan qoysaskii ay dadkoodu waxyeellada ka soo gaartay weerarkaas oo ay fuliyeen kooxaha nabadda diiddan. In micno-darro lagu gumaado shacabka Soomaaliyeed waa nasiib-darro aad u weyn, dowladduna dadaal dheeri ah ayay ugu jirtaa in laga hortago falalka noocan oo kale ah eek a dhacaya Muqdisho," ayuu yiri ra'iisal wasaaruhu.

Sidoo kale, war-saxaafadeed laga soo saaray xafiiska ra’iisul wasaare Saacid ayaa lagu sheegay in weerarkan lagu fuliyay gaari waxyaabaha qarxa laga soo buuxiyay ayna ku dhinteen saddex qof oo rayid ah iyo laba qof oo ahaa kuwii watay gaariga ismiidaaminta sameeyay.

Taliska AMISOM ayaa sheegay in weerarka uu ahaa mid qorsheysan oo lala beegsaday gaadiid ay leeyihiin, ayna kaga dhaawacmeen laba askari wax kale oo khasaare ahna aysan kasoo gaarin weerarka.

Xarakada Al-shabaab oo dhankeeda hadashay ayaa sheegtay in weerarkaas uu ahaa mid qorsheysan oo ay la beegsadeen ciidamada ku sugan Soomalia ayna halkaas ku dileen askari ka tirsan ciidamada AMISOM iyo saraakiil Mareykan ah.

“Mujaahidiintu waxay manta weerar ismiidaamin ah la beegsadeen gaadiid ay wateen ciidamada AMISOM, waxaana ku dilnay laba sarkaal u dhashay Mareykanka oo maalmahan aan isha ku haynay dhaqdhaqaqyo ay Muqdisho ka wadeen iyo sideed askari oo ka tirsan ciidamada Afrikaanka,” ayuu yiri sarkaal u hadlay Al-shabaab.

Al-shabaab ayaa bishii hore sheegtay inay kordhinayso weerarrada ay ka geysanayaan Muqdisho, xilli ay weerareen xarunta UNDP ay ku leedahay Muqdisho oo ay ku dhinteen tiro ka tisran shaqaalaha Qaramada Midoobay, iyadoo dowladda Soomaaliya ay u muuqato inay wax ka qaban la’dahay weerarrada soo laalaabtay ee Al-shabaab ay ka geysanayso Muqdisho.

Maxamed Xaaji Xuseen, Hiiraan Online
maxuseen@hiiraan.com
Muqdisho, Soomaaliya





Post your comments

2013-07-12 3:15 PM EST
Jimco, July 12, 2013 (HOL) — Madaxweynaha Somaliland Mudane Axmed Maxamed Maxamuud (Siilaanyo), ayaa xadhiga ka jaray idaacad cusub oo FM ah oo khaas u ah quraanka karriimka iyo Axaadiista Nabiga NNKHA oo lagu soo kordhiyay idaacadda Radio Hargeysa.

2013-07-12 2:14 PM EST
Jimco, July 12, 2013 (HOL) — Urur-siyaasadeedka Wadajir oo kamid ah 6-da urur-siyaasadeed ee Puntland ayaa maanta shaaciyey in uusan ka qayb geli doonin doorashada goleyaasha deegaanka ee Isniinta soo socota la filayo in ay ka qabsoonto deegaanada Puntland.

2013-07-12 1:20 PM EST
Jimco, July 12, 2013 (HOL) — Sideed sano ayaa kasoo wareegtay markii kooxo hubeysan ay xalay oo kale ku toogteen gurigiisa oo ku yaalay degmada Wadajir C/qaadir Yaxye Sheekh Cali oo ka mid ahaa mas’uuliyiintii hay’adda cilmi-baarista iyo wadashiga CRD.

2013-07-12 11:47 AM EST
Jimco, July 12, 2013(HOL)—Suxufiyiinta Soomaaliyeed ayaa sheegay in Dowladda Soomaaliya ay meel marisay sharci qabyo qoraal ah, kaasi oo ay u arkayaan in uu yahay mid xaaladda ku sii adkeyn doona warfidiyeennada Soomaaliyeed oo xaalado ka dhan ah xuquuqdooda aas-aasiga ah la kulmayay sanadihii aynu ka soo gudubnay.

2013-07-12 10:29 AM EST
Jimco, July 12, 2013(HOL) :- Shir maanta ka dhacay xarunta jaamacadda Kismaayo islamarkaana ay goobjoog ka ahaayeen madaxda ugu sareeysa maamulka Jubbaland iyo ergadii soo dhistay maamulka ayaa waqti kordhin loogu sameeyay madaxweeynaha maamulka si uu u soo dhameystiro qeybaha ka dhisman maamulka.

2013-07-12 9:12 AM EST
Jimco, July 12, 2013 (HOL) — Inta la ogyahay shan ruux oo ka mid ah kuwii uu dagaalku u dhexeeyay ayaa ku dhintay sagaal kalena dhaawacyo ayaa ka soo gaaray dagaal ciidamada dowladda Soomaaliya iyo kuwa Al-shabaab ku dhexmaray manta degmada Awdheegle ee gobolka Shabeellada Hoose.

2013-07-12 8:47 AM EST
Jimco, July 12, 2013 (HOL) — Weerar Ismiidaamin ah ayaa goor dhow lala beegsday gaadiid ay wateen ciidamada AMISOM oo marayay agagaarka xarunta hay’adda UNDP ay ku leedahay Muqdisho, iyadoo weerarkaas ay ka dhasheen khasaarooyin isugu jira dhimasho iyo dhaawac.

2013-07-12 8:42 AM EST
Jimco, July 12, 2013 (HOL) — Koox dabley ah ayaa xalay abbaare 12:kii habeennimo jidka u galay gaari nooca xamuulka qaada ah oo ka tegey magaalada Boosaaso, kaas oo marayey inta u dhexeysa tuulooyinka Kalabery iyo Kob-dhexaad oo qiyaastii 70km magaalada Boosaaso bariga ka xiga.

2013-07-12 4:57 AM EST
Jimco, July 12, 2013 (HOL) — Jaaliyadda Soomnaaliyeed ee ku nool xarunta labaad ee dalka Britain ee Birmingham ayaa xaflad soo dhaweyn ah xalay u sameeyay wafdi xildhibaanno ah oo uu hoggaaminayay guddoomiye ku xigeenka labaad ee baarlamaanka Soomaaliya, Mahad Cabdalla Cawad oo socdaal shaqo ku jooga Britain.

2013-07-12 4:13 AM EST
Jimco, July 12, 2013 (HOL) — Madaxweynaha Puntland C/raxmaan Sheekh Maxamed Faroole ayaa ugu baaqay shacabka ku nool Puntland inay ka qayb-qaataan doorashooyinka golaha deegaanka oo billaaban doona Isniinta soo socota oo ku beegan 15-ka bishan July.