2014-10-31
Today from Hiiraan Online:  _
Wararka Maanta- Jimco, July 12, 2013
Suxufiyiinta Soomaaliyeed oo kasoo horjeeda sharci qabyo ah oo Wasiirada Dowladda Soomaaliya ay Meel-mariyeen


Jimco, July 12, 2013(HOL)—Suxufiyiinta Soomaaliyeed ayaa sheegay in Dowladda Soomaaliya ay meel marisay sharci qabyo qoraal ah, kaasi oo ay u arkayaan in uu yahay mid xaaladda ku sii adkeyn doona warfidiyeennada Soomaaliyeed oo xaalado ka dhan ah xuquuqdooda aas-aasiga ah la kulmayay sanadihii aynu ka soo gudubnay.

 

Cumar Faruq Cusmaan- Xoghayaha guud ee NUSOJ
Ururka Qaranka Suxufiyiinta Soomaaliyeed ee NUSOJ ayaa war uu soo saaray maanta waxaa uu uga soo horjeestay sharciga qabyada ah ee saxaafadda, kasoo uu shalay meel mariyay golaha wasiirada Soomaaliya.

 

NUSOJ waxaa ay sheegtay sharcigan qabyada ah ay ku jiraan qodobbo dhowr ah oo ka hor imaanaya xoriyadda saxaafadda iyo madax bannaanida saxaafadda gaarka loo leeyahay ee ka hanaqaaday dalka Soomaaliya.

 

“Waa loo baahan yahay in sharci nidaamiya loo sameeyo saxaafadda, waana soo dhaweyneynaa in sharci loo sameeyo balse marnaba ma aqbali karno sharcigan oo kale oo ka hor-imaanaya xoriyadda saxaafadda, xuquuqda suxufiyiinta iyo xoriyadda ay ku shaqeeyaan saxaafadda xorta ah ee ka howlgasha dalka” ayuu yiri Xoghayaha Guud ee NUSOJ Cumar Faaruuq Cusmaan.

 

Sharcigan qabyada ah ayaa saxaafadda inteeda badan durba ka hortimid maadaama uu ku qasbayo suxufiyiinta in ay sheegaan il-wareedkooda. Saxaafadda ayaa waxaa uu ku qasbayaa suxufiyiintu in ay u raacaan sidii anshaxa saxaafada qodobbo aan marnaba shuqul ku laheyn anshaxa saxaafadda.

 

NUSOJ waxaa ay sidoo kale walaac ka muujisay madax-bannaanida iyo xubnaha uu ka kooban yahay golaha saxaafadda qaranka ee uu dhigayo sharcigan aan weli la horgeynin baarlamaanka federaalka Soomaaliya. Milkiilayaasha warbaahinta ayaa gabi ahaanba lagu soo darin in ay xubin ka noqdaan golaha saxaafadda iyadoo tirada suxfiyiinta ee xubnaha ka noqonayso ay aad ugu yar tahay midda xubnaha wasaaradda warfaafinta iyo xubnaha ka socda baarlamaanka oo la isku daray.

 

“Waan u gudbinay talooyinkii suxufiyiinta iyo bahda saxaafadda wasiirka warfaafinta waxaana nasiib darro ah in sharci sidaani u xanibaya saxaafadda la soo saaro” ayuu ku daray Cumar Faaruuq oo hadalkiisa ku sii daray  “Soomaaliyada cusub ee ku dhisan sharciga iyo cadaaladda ma aha in loo horseedo caburinta xoriyadda saxaafadda iyo in xanibaado lagu soo rogo xoriyatul-qowlka.

 

Qabyo qoraalka sharciga nidaaminaya saxaafadda ayaa sidoo kale waxaa uu meesha ka saaraya madaxbannaanida golaha saxaafadda qaranka, iyadoo suxufiyiinta u shaqeeya wakaaladaha wararka lagu soo rogaayo xanibaado aad u xakameynayo shaqadooda.

 

Ururka NUSOJ waxaa uu sidoo kale tilmaamay in sharciga qabyada ah uu doonayo in uu diiwaan geliyo dhamaan xarumaha warbaahinta oo uu ku jiro jaraa’idka. “Sida ku cad xeerka caalamiha ah ma aha in la diiwaan geliyo oo shati la siiyo” ayuu yiri Cumar Faaruuq.

Halkan ka aqriso Xeerka Saxaafadda ee ay soo gudbisay Xukuumadda. PDF


Salaad Iidow Xasan (Xiis), Hiiraan Online

sxiis@hiiraan.com





Post your comments

2013-07-12 3:15 PM EST
Jimco, July 12, 2013 (HOL) — Madaxweynaha Somaliland Mudane Axmed Maxamed Maxamuud (Siilaanyo), ayaa xadhiga ka jaray idaacad cusub oo FM ah oo khaas u ah quraanka karriimka iyo Axaadiista Nabiga NNKHA oo lagu soo kordhiyay idaacadda Radio Hargeysa.

2013-07-12 2:14 PM EST
Jimco, July 12, 2013 (HOL) — Urur-siyaasadeedka Wadajir oo kamid ah 6-da urur-siyaasadeed ee Puntland ayaa maanta shaaciyey in uusan ka qayb geli doonin doorashada goleyaasha deegaanka ee Isniinta soo socota la filayo in ay ka qabsoonto deegaanada Puntland.

2013-07-12 1:20 PM EST
Jimco, July 12, 2013 (HOL) — Sideed sano ayaa kasoo wareegtay markii kooxo hubeysan ay xalay oo kale ku toogteen gurigiisa oo ku yaalay degmada Wadajir C/qaadir Yaxye Sheekh Cali oo ka mid ahaa mas’uuliyiintii hay’adda cilmi-baarista iyo wadashiga CRD.

2013-07-12 12:40 PM EST
Jimco, July 12, 2013 (HOL) — Ra,iisal wasaaraha Soomaaliya, Cabdi Faarax Shirdon (Saacid) ayaa cambaareeyay weerarkii is-miidaaminta ahaa ee lala beegsaday gellinkii dambe ee maanta gaadiid ay wateen ciidamada AMISOM, isagoo tacsi u diray dhamaan qoysaskii dadkii rayidka ahaa ee wax-yeelladu kasoo gaartay weerarkaas.

2013-07-12 10:29 AM EST
Jimco, July 12, 2013(HOL) :- Shir maanta ka dhacay xarunta jaamacadda Kismaayo islamarkaana ay goobjoog ka ahaayeen madaxda ugu sareeysa maamulka Jubbaland iyo ergadii soo dhistay maamulka ayaa waqti kordhin loogu sameeyay madaxweeynaha maamulka si uu u soo dhameystiro qeybaha ka dhisman maamulka.

2013-07-12 9:12 AM EST
Jimco, July 12, 2013 (HOL) — Inta la ogyahay shan ruux oo ka mid ah kuwii uu dagaalku u dhexeeyay ayaa ku dhintay sagaal kalena dhaawacyo ayaa ka soo gaaray dagaal ciidamada dowladda Soomaaliya iyo kuwa Al-shabaab ku dhexmaray manta degmada Awdheegle ee gobolka Shabeellada Hoose.

2013-07-12 8:47 AM EST
Jimco, July 12, 2013 (HOL) — Weerar Ismiidaamin ah ayaa goor dhow lala beegsday gaadiid ay wateen ciidamada AMISOM oo marayay agagaarka xarunta hay’adda UNDP ay ku leedahay Muqdisho, iyadoo weerarkaas ay ka dhasheen khasaarooyin isugu jira dhimasho iyo dhaawac.

2013-07-12 8:42 AM EST
Jimco, July 12, 2013 (HOL) — Koox dabley ah ayaa xalay abbaare 12:kii habeennimo jidka u galay gaari nooca xamuulka qaada ah oo ka tegey magaalada Boosaaso, kaas oo marayey inta u dhexeysa tuulooyinka Kalabery iyo Kob-dhexaad oo qiyaastii 70km magaalada Boosaaso bariga ka xiga.

2013-07-12 4:57 AM EST
Jimco, July 12, 2013 (HOL) — Jaaliyadda Soomnaaliyeed ee ku nool xarunta labaad ee dalka Britain ee Birmingham ayaa xaflad soo dhaweyn ah xalay u sameeyay wafdi xildhibaanno ah oo uu hoggaaminayay guddoomiye ku xigeenka labaad ee baarlamaanka Soomaaliya, Mahad Cabdalla Cawad oo socdaal shaqo ku jooga Britain.

2013-07-12 4:13 AM EST
Jimco, July 12, 2013 (HOL) — Madaxweynaha Puntland C/raxmaan Sheekh Maxamed Faroole ayaa ugu baaqay shacabka ku nool Puntland inay ka qayb-qaataan doorashooyinka golaha deegaanka oo billaaban doona Isniinta soo socota oo ku beegan 15-ka bishan July.