2014-07-23
Today from Hiiraan Online:  _
Wararka Maanta- Arbaco, Jan 9 , 2013
MADAXWEYNE CABDIRAXMAAN FAROOLE: "Isku dhejin mayno xilka, Dikteytar Maahin, Dastuuri baan nahay"


Arbaco, Jannaayo 09, 2013 (HOL) — Madaxweynaha Puntland oo xalay ka khudbadeynayey munaasabad lagu xusayey sanad guuradii 4-aad ee kasoo wareegtey markii xilka loo doortay, ayaa soo hadal qaaday arimo badan oo ku saabsan ammaanka Puntland, howlihii shidaal-baarista iyo eedeymaha xiligan xukuumaddiisa uga imaanaya dhinaca siyaasiyiinta mucaaradka ah.

Waxyaabaha uu ku dheeraaday waxaa kamid ahaa dagaalka ay dowladda Puntland kula jirto Al-shabaab iyo weeraro dhowaan xoogagga Al-shabaab ee buuraleyda Golis ay kusoo qaadeen ciidamada Puntland ee ku sugan deegaanka Sugurre.

Wuxuuna intaas raaciyey in weerarrada Al-shabaab ay yihiin kuwo aan  waxba u dhimi Karin ammaanka iyo xasiloonida Puntland, isagoo ku eedeeyey weerarkii dhowr habeen kahor lagu soo qaaday Hotelka Panorama in ay Shabaabku ka danbeeyeen.

“Al-shabaabka argagixisada ah oo ciidamadeena bishan 3-deedii iyo 5-teedii Hotelka jirri ay soo direen ay xabado ku tuurtuureen aysan waxba gaarsiin iyo ciidanka buurta difaaca kaga jira, oo uu ka hadlaayey midkaan Cali-dheere la yiraahdo oo yiri Puntland baan burburineynaa oo ma waxbuu hagran lahaa haduu sameyn karo?” Faroole ayaa yiri.

Madaxweyne Faroole ayaa dhinaca kale ka warbixiyey halka uu ku danbeeyey mashruucii shidaal-baarista Puntland ee dooxada Dharoor, wuxuuna tilmaamay in labadii ceel ee Puntland laga qodayey mid kamid ah shidaal laga helay, haseyeeshee midka kale aan wax natiijo ah laga gaarin.

“Waatii aan ku guuleysney in Batroolkii Puntland lagu sheegay aan keennay Riig, ceelashii labada ahaa ee la qoday mid waxbaa laga helay midkii kale sidii la filaayey waa noqon waayey, hadaad aragteen birtii oo tagtay ha moodinina quus, birtii way soo noqonaysaa”

Mar uu ka hadlayey muranka ka aloosan wakhtiga xukuumadda iyo eedeymaha uga imaanaya dhinaca siyaasiyiinta mucaaradka ah waxaa hadaladiisii kamid ahaa:

“Isku dhejin mayno, dikteytar maahin xukun maroorsi maahin, dastuuri baan nahay, dastuurkaa aad arkeyseen baan ku joognaa, isagaan fulineynaa, hannaanka axsaabtuna waa dastuuri, hadde xeer shareecada Islaamka waafaqsan hadii la dhigto waa in lagu dhaqmaa”

Afar sano kahor ayey ahayd markii doorasho Baarlamaani ah ay kusoo baxeen madaxweynaha xiligan ee Puntland Dr. Cabdiraxmaan Faroole iyo ku-xigeenkiisa Jen. Cabdisamed Cali Shire.

Maxamed Salaad Xaaji Dirir, Hiiraan Online
xaajidirir@hiiraan.com
Puntland, Soomaaliya





Post your comments

2013-01-09 2:22 PM EST
Arbaco, Jannaayo 09, 2013 (HOL) — Wasiiradda wasaaradda horumarinta iyo adeegga bulshada xukuuumadda Soomaaliya, Maryan Qaasim Axmed ayaa maanta oo Arbaco ah dib ugu soo laabatay Muqdisho, kadidb safaro ay toddobaadyo ku maraysay dalalka Turkiga iyo Tuuniisiya, waxaana la socday wufuud ka socday dowladda Turkiga uu u kuurlgalaya sidii horumarin loogu sameyn lahaa dalka.

2013-01-09 1:43 PM EST
Arbaco, Jannaayo 09, 2013 (HOL) — Hay’adda dhakhaatiirta aan xuduudda lahayn ee MSF ayaa weydiistay dowladda Soomaaliya in baaritaan dhab ah lagu sameeyo gacan-ku-dhiigle ku dilay Muqdisho laba shaqaalahooda ka mid ah bishii December ee sannadkii 2011 oo dhawaan xabsiga dhexe ee Muqdisho laga sii-daayay.

2013-01-09 12:36 PM EST
Arbaco, Jannaayo 09, 2013 (HOL) — Munaasabad uu xilka kula wareegayay xoghayaha dowladda hoose ee Laascaanood oo maanta ka dhacday xarunta gobolka Sool ee Laascaanood, iyadoo xoghayahan uu ka mid ahaa xubihii ku soo baxay doorashooyinkii golaha degaanka ee bishii lasoo dhaafnay ka dhacay Somaliland.

2013-01-09 12:05 PM EST
Arbaco, Jannaayo 09, 2013 (HOL) — Hoggaamiyaha kooxaha burcabadeedda ah ee gobollada dhexe ee Soomaaliya, Maxamed Cabdi Xasan [Af-weyne] ayaa maanta kaga dhawaaqay degmada Cadaado ee gobolka Galguduud in isaga iyo raggii la shaqeynayay ay joojiyeen falalka burcadbdeednimo oo uu sheegay nay ku kalliftay inay tanaasulaan codsiyo dhowr jeer loosoo jeediyay iyo dhibaato ay kala kulmeen burcadbadeednimada.

2013-01-09 11:36 AM EST
Arbaco, Jannaayo 09, 2013 (HOL) — Guddoomiyaha gobolka Banaadir ahna duqa Muqdisho, Maxamuud Axmed Nuur (Tarsan) ayaa sheegay in maamulkiisu uu wado qorshayaal uu kusoo celinayo ammaanka guud ee caasimadda, sidoo kalena ay ku duminayaan dhismayaasha sharci-darrada ah ee laga dhisay hareeraha waddooyinka Muqdisho.

2013-01-09 11:35 AM EST
Arbaco, Jannaayo 09, 2013 (HOL) — Askar ka tirsan ciidamada dowladda Soomaaliya iyo xoogagga Ahlusunna ee ku sugan gobolka Gedo oo dhawaan ay ka dhaceen dagaallo culus ayaa maanta loo dhoofiyay dalka Itoobiya si loogu soo daweeyo.

2013-01-09 8:05 AM EST
Arbaco, Jannaayo 09, 2013 (HOL) — Hal qof ayaa ku dhintay, illa toban kalana way ku dhaawacmeen mudaharaad saaka ka dhacay magaaladda Saylac, ka dib markii dad ka xanaaqsan maayarka cusub ee loo doortay degmada saylac ay isku xeereen dawladda hoose ee magaaladaasi. Ciidamadda milatariga iyo booliska ayaa saaka aroortii hore isku dayey inay dadkaasi ka dareeriyaan xaruntaasi, balse way u suurtogali wayday ilaa markii dambe ay xoog u adeegsadeen, waxaana rasaastii ciidankaasi rideen ku dhaawacmay ilaa toban qof oo mid ka mid ahi la sheegay inuu dhaawacii u dhintay.

2013-01-09 8:02 AM EST
Arbaco, Jannaayo 09, 2013 (HOL) — Madaxweynaha Somaliland Mudane Axmed Maxamed Maxamuud (Siilaanyo), ayaa maanta digreeto madaxweyne ku Dhaqan-geliyey Xeerka Hay’adda Sirdoonka Qaranka Xeer Lr. 59/2012.

2013-01-09 3:24 AM EST
Arbaco, Jannaayo 09, 2013 (HOL) — Munaasabad ballaaran oo lagu xusayey sanad guuradii afaraad ee kasoo wareegtey xiligii la doortay madaxweynaha Puntland iyo ku xigeenkiisa, islamarkaana muddo 5-saac ka badan socotey ayaa xalay ka dhacday xarunta madaxtooyada ee magaalada Boosaaso.

2013-01-09 1:45 AM EST
Arbaco, Jannaayo 09, 2013 (HOL) — Kaddib kulan saraakiisha ciidamada Jabuuti AMISOM ay la qaateen mas’uuliyiinta maamulka gobollka Hiiraan iyo odayaasha dhaqanka magaalada Baladweyne ayaa waxaa leysku weydaarsaday macluumaad iyo aragtiyo ku saabsan isbadalka dhinaca nabad-galyada ah ee ka jira waqtigan magaalada iyo wada shaqeyn buuxda oo ay yeeshaan odayaasha iyo saraakiisha AMISOM.

2013-01-09 1:09 AM EST
Arbaco, Jannaayo 09, 2013 (HOL) — Madaxweynaha Puntland, C/raxmaan Sheekh Maxamed Faroole oo ka hadlayay dabbaal-deg loo sameeyay afar sano guuuradii kasoo wareegtay markii loo doortay madaxweynenimada Puntland oo xalay ka dhacday Boosaaso ayaa ka digay in dib u habeyn lagu sameeyo dastuurka dowladda federaalka Soomaaliya.

2013-01-09 12:33 AM EST
Wasiirka Arrimaha Dibadda ee Soomaaliya Marwa Fowziya Yuusuf Xaaji Aadan ayaa Booqatay qaar ka mid ah xaruumihii hantida ma guurtada ah ee Soomaaliya ku laheyd dalka Talyaaniga.